Pok meyaom anek saih, saih megru, dam dara bangsa takik, naih gheih mbang XI kayua UB Bangsa peih ngak, meda peih ngak di harei 27/12 anak tal di Ha Noi. Thun ini, hu 125 anek saih, sinh vien, dam dara mai meng 33 bangsa di 39 tinh, ban dalam negar  hu meyaom. Tapa bruk pok meyaom hu brei mboh bruk sangka di Ndang, Karja dalam bruk pato pakai urang naih joi, pabak urang ngak bruk hu ilamo glong di bhum urang bangsa takik saong bhum ceik, meng nan rik tame daong bruk cak rok patagok di taneh ia. Tapa 10 mbang meyaom dalam 10 thun tapa  hu labaih 1.300 anek saih, sinh vien, dam dara bangsa takik  naih gheih lambaok ka dom bangsa, bhum palei, karja hu meyaom.

Harak pathau khan kinh ke yaok thun angan haong kadha “Kinh te Ban raya HCM: Pasiam veik saong kuhria caga yam tame jaman barau” hu mboh thun 2024, kinh te TPHCM khik hu bruk patagok tani tanat, min oh ka yau meng tukvak dahlau jit COVID-19. Tui kuhria mboh dahlau, thun 2025 kinh te Ban raya HCM daok pasiam veik kayua gah yitvu, kong nghiep saong padak padang hu patagok. Khan brei thau kinh te Ban raya HCM jang lac hu 3 kan kandah praong di thun 2025 saong dom thun anak tal di Ban raya lac: manuac ngak bruk naih joi min oh ka patagok gilac, bruk buh jien tame di dom doanh nghiep dalam saong lingiu nagar daok suai damuai, co so ha tang daok trak damak dalam tukvak dui atah.

Di xa Phước Kháng, huyen Thuận Bắc, tinh Ninh Thuan birau peih bruk jak ba pakacah gauk “ Daong gauk ngak abih baoh sang taik tahak” di tỉnh. Brei panuac di var nan, Akok UB Bhap bini  tinh Ninh Thuan Trần Quốc Nam khan lac: Urak ini, dalam tỉnh daok labaih 2.600 baoh sang kan kandah ka sang daok. Yau nan ye, caong khin dom pakat, dom gah pataom tame jak ba likau di karja, urang ngak mbang pablei salih saong taong abih bhap bini rik daong prein, harei ngak bruk padang ngak ka abih sang taik tahak, daong rahra “hu labik daok, sahanang hatai padang mbang ngui”, kuhria bruk ngak mbang, duah jien tame, dak harei dak tapa truh kathaot hu khang kajap. 

Kapul Urang umo taha tinh Tra Vinh barau peih harei pataom mbaok pok mayaom dom urang hadah krah di bruk padak padang he thong chinh tri bhum palei vaktu 2019 – 2024. 5 thun tapa, Kapul Urang umo praong thun dom pakat dalam tinh kham marat pathau khan dom sarak nghi quyet, danak dak di tinh saong sarak pambak tal manuac umo praong thun, tui nan patagok bruk ngak di dom urang umo taha dalam bruk patagok kinh te – xa hoi saong khik salamat nagar bhum palei. Di harei pataom mbaok, UB Bhap bini tinh Tra Vinh alin harak mayaom 5 urang umo praong thun saong harak mayaom ka 30 urang hadah krah.

Langik hajan hangin lagaih  yau nan ye urang ngak nong tinh Kien Giang paik menaih brei hu ralo baoh, mek hu laba 120 trieu dong sa hecta. Dom bhum palei hu padang ngak ralo labik ngak tabiak pandap meng baoh menaih yau ia menaih, ahar menaih, siro menaih, menaih pambu thu…, rik tame pambak praong darak pasar, paglong kein laba kaya nong saong jien mek tame ralo ka bhap bini. Tukvak anak tal, tỉnh Kiên Giang  patui veik  bruk pala menaih hu tanut chuan, da-a urang buh jien tame padang sang mac ngak pandap piah tani tanat yaom kaom piah bruk pala menaih di tỉnh hu patagok karo kajap.

Danak dak “Var huak kreh pandiak oh mek jien” hu khan di var  meraik gauk ngak Tong thong Indonesia Prabowo Subianto hu peih ngak meng harei 02/01/2025 anak tal, kuhria mboh lac daong ka labaih 80 trieu urang dalam 2 thun ngak bruk camereip. Akaok mati, danak dak khin daong ka anek naih bac mau giao saong anek saih, hadei nan hu daong kamei matian, amaik daok raong anek meng ia tasau saong anek naih barau thau nao. Tui Jabat Kaya mbang nagar Indonesia, yaok sa var huak kuhria hu abih jien jaik 1 USD. Lac jaik 4,6 ty USD piah buh tame ka danak ni di gilang pariak karja yaok thun di Indonesia.

Labik ngak radaih oto dang akaok di Nhat Ban Toyota birau  khan lac daok iek veik piah padang birau sa sang mac ngak tabiak radaih oto ndien di Thượng Hải (Trung Quoc). Sang mac birau di Thượng Hải brei pataom tame ngak dom janih oto ndien rai birau  angan Lexus. Tui Hoi ndong quan tri di Toyota, darak pasar Trung Quoc  saong rilo taneh ia karei di dunya, oto ndien dak harei dak ralo, ngak kadun veik brulk blei dom janih radaih mac peih meng xang menyek yau dahlau mai. Langiu di nan, bruk meriak gauk  ka yaom kaom dak harei dak kan kandah.

Pusak Pasang iek saong Pacang caga Jit ruak (CDC) chau Phi kuhria lac manuac ruak ndau mua khỉ daok tagok glaong di adit anak tal, dahlau tuk patrun takik di akaok thun 2025. Ndau mua khỉ tamuh tabiak kayua virus saong pambak kayua daok jaik gauk, barau mboh lac ruak hanyol, min khin hu sangka y te. Urakni chau Phi daok pandar dom kapul y te, dich te hoc saong urang ilimo pacang caga jit ruak nao daong labik hu manuac ruak. Thun ni, chau Phi khan hu labaih 59.000 urang ruak saong labaih 1.000 urang plang lahik abih umo.