Page ini, di Phu Chu tich, Jabat Akaok negar peih ngak Adat Jao bruk ngak di Tong Bi thu Tô Lâm saong Akok negar Lương Cường. Hu mbaok di Thu tuong Rajaei Phạm Minh Chính; Akok Quoc hoi Trần Thanh Mẫn; dom Uy vien Mentri Chinh tri, Bi thu Trung uong Ndang…Brei panuac di var nan, Tong Bi thu Tô Lâm uan tabuan tadhau yuh ong Lương Cường hu Quoc hoi palih ruah pok ngak Akok negar CHXHCN Viet Nam. Akok negar Lương Cường khan lac hatai mboh druat druai saong hadah mbaok meta hu BCH Trung uong, Mentri Chinh tri saong Tong Bi thu Tô Lâm hatai jia yaih khan, hu Quoc hoi palih ruah pok ngak Akok negar CHXHCN Viet Nam; khan lac hu mai ngak bruk di labik Wa Ho praong uranam bhian daok ngak bruk lac bruk biak sahanak gireih saong hadah mbaok meta.

Akaok UB Bhap bini Ban Raya Ho Chi Minh Phan Văn Mãi bahrau ba tabiak Sarak ka yaom taneh dalam ban raya. Sarak ini hu ba tame pandar meng harei 31/10/2024 tal harei 31/12/2025. Tui yaom taneh bahrau, yaom taneh daok glaong abih lac 3 jalan Nguyễn Huệ, Lê Lợi, Đồng Khởi haong 687,2 trieu dong/m². Dut haong yaom taneh klak ye yaom bahrau tagok 120 trieu dong/m2 (tagok labaih 21%). Biar abih lac yaom taneh di labik daok rahra Thiềng Liềng, huyen Cần Giờ haong 2,3 trieu dong/m2. Langiu di taneh daok, Ban raya HCM jeng salih yaom taneh ngak nong, taneh daok di labik cong nghe glaong saong dom janih taneh karei…

Pho akaok UB bhap bini tinh Dong Nai Nguyễn Sơn Hùng birau ngak bruk haong dom so, dom gah, don vi pambuak tal burk peih ngak Harei pataom Ilamo - The thao dom bangsa takik tinh Dong Nai mbang 5 thun 2024. Mbang Bangsa tinh Dong Nai khan lac, harei pataom thun ini hu mbaok di 12 don vi huyen, ban saong 2 sang bac lac Sang bac pho thong Bangsa gam bac gam daok tinh saong Sang Trung cap Ilamo nghe thuat Dong Nai, ngan haong labaih 900 urang pakacah lac bangsa takik. Harei pataom ilamo hu peih meng harei 25 tal harei 27 bilan 10 anak tal.

Tinh Gia Lai hu 757 sang bac mam non saong pho thong hu labaih 418.000 anek saih. Dalam nan, anek saih bangsa takik hu labaih 46%. Bruk jhul khang bruk pato bac, sangka, raong ba anek saih gam bac gam daok jala pandiak di tinh Gia Lai hu yaom glaong dalam bruk jak ba saong khik tani tanat anek saih dalam thun umo nao bac, paglaong bruk pato megru bhum bangsa takik. Anek saih dom sang bac THPT gam bac gam daok, gam bac gam daok meteh harei hu khik kajap 3 bruk ginup “ginup mbang, ginup cuk, ginup tapuk siphau”. Langiu di nan, anek saih dom Sang bac bangsa gam bac gam daok, gam bac gam daok jala padiak hu mbang tui rilo sarak daong paglaong var mbang huak, bac da-a, prein yawa ka anek saih.

Di huyen Thuận Nam, tinh Ninh Thuan buh jien tame ngak jalan mbak lac bruk brei ngak dahlau piah jhul pakhang bruk patagok kinh te - xa hoi di bhum urang bangsa takik di bhum. Dalam bruk kham merat ngak brei trun baoh sang kathaot, jaik kathaot, patagok rilo baoh sang mbiah jhul patagok bruk cakrok kinh te, duah bruk ngak ka bhap bini. Dalam nan, pataom tame ralo patagok bruk salih janih phun pala, athur raong; pasram ilamo pala padai ia, tacei pato duah bruk ngak birau ka labaih 11.000 urang ngak.

Abih tih dom bang saong bhum taneh di Australia urak ini jeng pakauk anek saih pandar phone dalam sang bac. Sarak ini daok hu ngak jak jeng, daong ka dom adei pataom tame jang ka bruk bac megru saong paglaong bruk ndom meyai haong yut cuai. Bang Meraong Australia ngak bruk pasang iek haong gru pato, anek saih saong dom urang dalam sang anek saih saong bruk mek hu dalam mbang pasang iek brei mboh bruk pataom tame bac megru di anek saih hu tagok 70%, anek saih hu mbaok tame dom danak dak siam mekre dalam dom tuk padei yau ndom meyai haong yut cuai, me-in sambai atau hu mbaok tame dom bruk pahat pasram rup pabhap rilo jang.

Dom urang roh duah di Hàn Quốc birau brei tabiak sa kapal haok oh hu urang peih hu rilo sauk kadik samar lagaih, meda salih lagaih eng piah khik siam tuk par saong meda hu pandar yau sa sruh radaih jhul pandap par” piah pajeng padap di dom labaik glong biar oh sumu gauk. Kapal haok oh hu manuac peih meng meda pajeng ba pandap trak tal 3 kilo. Kapal haok oh hu mauac peih hu rilo sauk kadik lagaih saong mac siam jang, khik ka kapal siam jang tuk par.

Hu 6 urang metai dalam harei 20/10, hu tagok abih tih urang metai kayua ruak pandiak tabiak darah meng akaok thun tal ini di Bangladesh lac 247 urang. Piah patakik bruk njaom pabak ruak, urang jakar y te Bangladesh brei ngak parilo jalan pacang cakak jamaok menek saong ngak dom bruk pametai ấu trùng. Bangladesh hu taduan 1.705 urang metai kayua ruak pandiak tabiak darah dalam thun blaoh, ini jeng lac thun hu urang metai rilo abih meng dahlau mai. Ruak pandiak tabiak darah lac ruak njaom pambak trak kayua virus Dengue ngak tabiak./.