Melam 28/9, di TP Hồ Chí Minh, Mintri Ilamo, Thể thao saong Du lịch Việt Nam pambuak haong Mintri Ilamo saong Nghệ thuật Negar Campuchia peih mbaok Adit ilamo Campuchia di Việt Nam, pamaong tal harei pahadar 55 thun padang talei ngoại giao Việt Nam - Campuchia saong salam uan Thun Hữu nghị Việt Nam - Campuchia, Campuchia - Việt Nam 2022. Di Adit ilamo ini, Campuchia hu ba mai rilo kadha ilamo meng kan, kadha bhap bini saong kadha bahrau hu dom janih tamia, kịch saong ragu ragam, dalam nan hu dom janih ilamo hu UNESCO vak angan tame harak dom angan inem krung ilamo oh maong mboh di menuac sia dunya saong Parang iek ilamo, nghệ thuật Campuchia, pabak hatai caong di manuac sia, bhap bini Việt Nam caong maong iek saong duah thau ka ilamo Campuchia.

Di Nyaom biai pakat dunya ngan saong kadha “Buh jien tame patagok darak pasar kaya nong bhum Taneran kraong Cửu Long saong dulich palei pala” birau peih tabiak di ban Cần Thơ, ong Nguyễn Văn Hồng, Phaok akaok UBND Ban Cần Thơ brei thau tukvak anak tal, Cần Thơ brei peih ngak tui bruk dulich khang kajap ka dom nyaom yau ye: D.N ba tuai damuai nao rivang ma-in mbiah saong sit, homestay, khách sạn mbiah saong sit, labik du lịch pambak tame bhap bini, labik rivang mbiah saong sit…ngan haong tanut taong yaom, brei điểm cambaih, mbuan thau. Bruk peih ngak hu siam tui bruk ini, meda lac jalan piah dom tỉnh, ban bhum taneran kraong Cuu Long bac megru saong pambak praong, pamong tal bruk ba dulich palei pala jeng sa angan je di bhum.

UBND tỉnh Trà Vinh hu patabiak Jalan ngak haong pato tacei Mban Bangsa tỉnh dang tabiak, pambuak haong dom sở, mban, dom gah, puk palei peih bruk padang ngak Danak dak bruk ngak negar cak rok patagok kinh tế - xã hội bhum bangsa takik saong bhum ceik thun ini, haong yaom jien buh tame abih tih labaih 400 tỷ đồng. Dalam danak dak, phun jien meda buh tame dom danak dak hu makna duh ka bhap bini, paglaong chất lượng manuac ngak, khik ramik saong patagok dom yaom glaong ilamo meng kan siam makre di bhap bini Khmer.

Công an tỉnh Sóc Trăng brei padeih bruk 4 urang jakar, urang lin Công an ban sit Vĩnh Châu hu mbaok ngak bruk di harei 25-9. Dahlau di nan, hu clip ba tagok ngaok mạng XH brei mboh bruk công an peih radaih đặc chủng pagui tui dua urang likei dam peih radaih patuh. Hadei di tuk padeih radaih, dua công an nan taong meng tangin, caoh meng takai, pandar gai điều khiển angaok jalan, tamo bảo hiểm tame dua urang peih radaih. Hadei di nan, hu dua công an karei peih mô tô đặc chủng mai taong gac urang peih radaih patuh. Rilo menuac mboh pandik hatai anak bruk taong menuac di dom urang công an.

Meng bilan 8 tal urak ini, limen gilai hu mboh 9 mbang di xã Thanh Sơn, huyện Định Quán, tỉnh Đồng Nai ngak khut khat njam patam, saong drap ar di dom baoh sang bhap bini. Abih di nyu nan lac, limen gilai bhian mboh di labik bhap bini daok di puk 7 ngak khut khat labaih 1.000 phun patei cấy mô saong 2.000m² phun tangei di 3 baoh sang. Urak ini Chi cục Kiểm lâm Đồng Nai daok buh jien tame padang ngak labaih 12 km paga điện khik caga limei gilai, tui kuhria meda ngak salah dalam thun ini.

Hàn Quốc brei thau, Triều Tiên cuh dua tên lửa đạn đảo katut panak di bhum tasik gah Timun. Hadei di nan, urang brei panuac di Mentri Ngoại giao Mỹ ndem cambaic lac taneh ia ini oh njauk hatai haong bruk cuh tên lửa đạn đạo di Triều Tiên, gam khang panuac ndom lac “ dom mbang cuh tên lửa nan ngak suan dom sarak di Hội đồng Bảo an Liên hợp quốc saong ngak jhak ka dom taneh ia jaik nan”. Mỹ iew Triều Tiên tame ginum meyai veik saong brei thau veik panuac sanya di Mỹ ka bruk khik caga dom đồng minh Hàn Quốc saong Nhật Bản.

  Ribuk Ian haong prein hangin tagok tal jaik 250km sa maong nyu tuh tame takai tasik gah Tây Nam bang Florida, Mỹ, bier harei 28/09 (tui maong di pak nan). Tui pathau khan tuk camriep, ribuk ngak brei ia dauk di rilo labik tapen tasik Tây Nam bang Florida, dalam tuk nan hu labaih 1 triệu bhap bini laik tame bruk lahik dien. Labaih 2 trieu mateh bhap bini hu paduan ba nao daok di labik karei dahlau di tuk ribuk tuh mai, rilo urang ka oh nao hu, jeng hu panuac ieu kakei duah labik dauk salamat samar drah. Dahlau di nan, ribuk Ian ngak brei lahik dien dalam taneh ia Cuba.

Tui sa roh duah birau brei thau bahrau ini, dom kraong ia patau di Thụy Sĩ ralai lahik 6% dalam thun ini kayua bilan La-ar thu lagu saong dom mbang pandiak bhian rah tabiak di bilan Hè, glong abih dom mbang ia khan ralai dahlau diah. Tui Giáo sư Matthias Huss, urang dang akok Jabat tui iek kraong ia khan di Thụy Sĩ meyah taneh ia ini daok hu langik tasik oh siam yau thun ini dalam 50 thun ye dom kraong ia khan lahik, nan ye oh pabak ia tame bilan Hè pandiak thu lagu./.

Urang lang: Thu Thảo & M.P -29/9/2022