Hu mbaok tame saong pathau khan di danak dak hatai caong saron mbon – pok mayaom dom urang angan je hadah krah saong Uan salam Bilan ngak, pcang caga ma túy hu peih tabiak di melam 14/6 Thủ tướng Phạm Minh Chính ieu kakei: mesuh, pacang caga ma túy meng aval, meng atah, meng labik duah mboh. Abih di nyu nan lac ngan haong rai ranaih urak ini, Thủ tướng ieu kakei: baoh sang lac pasak di xã hội. Hu rilo urang gaok bala di ma túy mai meng kurang bruk caik hatai tal, oh hu bruk pato di gauk gar dalam sang, njauk kol kanjak jhak dui ba. Kayua yau nan ye dom baoh sang njauk caik hatai sangka anek bhik di drei, piah plaih atah di ma túy. Dom kamuan jeng njauk khang hatai ndem OH saong tuk halei jeng plaih atah di  ma túy! Oh pandar ma túy yaom lac sa mbang! Yaok harei, dom kamuan njauk kham marat bac taa, pasram, plaih atah di dom bala, abih di nyu nan lac ma túy; pasram piah jeng dom rahra siam, hu kein laba ka sang saong ka puk palei.

Adit Nho – Vang Ninh Thuận thun 2023 daok peih tabiak di Ninh Thuận.  Dalam dom bruk di harei pataom Nho – Vang, langiu di bruk pakacah “Dhar nho mekre” piah pok meyaom dom po bein pala nho, daok hu dom bruk ngak karei, yau: Nyaom darak pasar pablei salih haong 300 labik pablei di 150 doanh nghiệp; danak dak daoh tamia, harei pataom pandap mbang huak, adat raok harak di UNESCO vak angan bruk ngak lan am di urang Cam tame angan inem krung ilamu oh maong mboh njauk khik ramik chip… Tui kuhria, dalam dom harei ini, dom tuai damuai mai ravang iek, padeih padei saong hu mbaok tame harei pataom, lac 200.000 mbang urang, rilo jang labaih 66% duk haong tukvak ini thun dahlau.

Tui jalan ba tabiak, thun ini, tỉnh Sóc Trăng saong Mintri Công an meda pambuak gauk jak ba, padang ngak 1.200 baoh sang ka urang kan kathaot, urang gaok kan kandah saong mikva bangsa takik di dalam tỉnh. Taong abih tih phun jien daong padang ngak sang danaok lac 60 tỷ đồng. Ong Lâm Văn Mẫn, Bí thư Tỉnh ủy Sóc Trăng ieu kakei dom bhum palei pasang iek, taong yaom cambaih laih dom baoh sang kan kathaot, sang gaok kan kandah ka sang danaok piah khik njauk tanut chuan, manuac urang, gam tui di nan jeng halain hatain peih bruk jak ba meng rilo phun jien piah ngak.

Bảo hiểm xã hội (BHXH) tỉnh Bình Dương hu pasang iek 18 labik khám brei harak ruak kik ka urang ngak piah hu mbang BHXH, tapa nan mboh hu 15 labik ngak oh njauk tui adat ba tabiak. BHXH tỉnh Bình Dương hu pataom mek veik labaih 1,1 tỷ đồng jien bayar ka urang ngak likau mbang dom sarak BHXH yau: ruak kik, metian, menek. Pambuak tal bruk ngak harak lac ruak kik brei ka urang ngak, Công an tỉnh Đồng Nai hu khởi tố 5 bác sĩ, 12 dược sĩ haong 2 urang ngak ja harak gar piah mbang jien.

Anak bruk jaik di ini rahtabiak rilo bruk njauk jru mek kayua mbang bimau glai, tui dom bac si, urak ini meda lac, jaik abih dom janih jru mek hu dalam bimau oh hu jru piah pacang. Dom bác sĩ tok ngak dom jalan daong piah ba tabiak meneing dom jru mek. Urang ruak hadei di tuk hu daong paklah di metai meng njauk jru mek bimai, meda hu dom kan kandah tal glo akaok saong suy đa tạng dahlau di nan. Kayua yau nan ye, dom bac si kakei lac, bimau bhian tamuh biak samar di bilan hajan, rahra di dom labik bhian randap paik bimau glai saong ngak pandap mbang. Oh mbang atau ngak dom janih bimau oh ka bhian mboh, bimau hu sambo mau hadah mekre, kuhria lac nyu hu jru mek biak glaong.

Nerak tachauk alam môi trường lac sa dalam dom cuang kandah praong bo taneh ia Lào daok dang anak. Tui Mintri Tài nguyên - Môi trường Lào, meng akaok thun tal ini, taneh ia ini njauk kan kandah trak kayua nerak tachauk alam langik tasik, abih di nyu lac hu thur mur meng dom mbang khuah glai ba mai. Gam haong nan, nerak tachauk meng dom sang mac, meng radaih nduac angaok jalan saong bruk am cuh hareik hareim ban glai ban klo, abih di nyu lac hareik hareim meng katak, ngak jhak tapak tal prein yava saong raidiuk di bhap bini. Dalam thun 2022, Lào abih 200 triệu USD piah blei dom pandap katak meng negar langiu tame. Ban ine Vientiane kuhria rah tapa yaok harei hu meng 500 - 600 tấn hareik hareim klaak tabiak meng ngak mbang huak, min bahrau langyah hu 50-60%.

Piah peih praong jalan ngak bruk jang yau jhul patagok bruk mbeik drei tame kinh te, Quốc hội Hungary hu brei tapa hukum padang ngak veik dom bruk ngak bahrau ka urang ngak negar langiu. Tui nan, urang ngak mai meng dom taneh ia langiu di Bhum Kinh tế châu Âu urak ini hu daok di Hungary dalam labaih 90 harei. Langiu di nan, urang ngak negar langiu meda daok gilac di negar ini tal 2 thun, saong meda likau daok veik 1 thun tra. Tui dom urang jakar Hungary, hukum bahrau jhuk patagok abih gah jang dalam darak pasa urang ngak di Hungary saong peih tabiak jalan lagaih pambuak bruk haong dunya.     

Dom urang jakar ngak praong di Hy Lạp brei thau, takik di nyu 79 urang metai saong yaok ratuh urang lahik hadei di tuk sa sruh gilai ikan pajeng urang “di cư” kram di langiu tasik gah meraong Hy Lạp. Hu thau, dom menuac angaok sruh gilai ini lac labaih 400 urang. Tui panuac khan di dom urang jakar Hy Lạp, bruk nan, lac sa dalam bala jalan tasik trak damak abih di châu Âu. Hy Lạp lac sa dalam dom jalan praong piah tame Liên minh châu Âu di urang tị nạn saong di cư meng Trung Đông, châu Á haong châu Phi.