Akaok bilan 2 ini, urang nong di ĐBSCL biak uan tabuan tuk yuak padai đông xuân aval, pablei hu yaom glaong. Dalam tuk nan, dom janih baoh kayau pala rilo abih jeng daok hu yaom, pachreih hu urang blei. Di dom labik pablei baoh kayau di ĐBSCL yau ye durain, panat, thanh long, panak... hu yaom pablei biak glaong. Pagap yau baoh durain Dona, yyaom pablei di bein lac 130.000 - 140.000 đồng/kg, daok di labik pablei tagok tal 190.000 đồng/kg. kayua darak pasa Trung Quốc peih pambang gilac hadei di jit praong Covid-19 nan ye dalam tuk Tết bahrau blaoh dom janih baoh kayau pala rilo jeng hu tagok yaom. Langiu di nan, rahra pala rah tui yaok vụ, sản lượng takik njauk gar veik nan ye pablei hu yaom, laba glaong hadei di tuk kaoh abih jien buh tame.

Thun 2023, bruk raong kaya ikan di tỉnh Long An caong mek hu labaih 75.000 tấn, dalam nan, hadang ia meteh mbak meteh taba hu labaih 19.590 tấn. Dom thun tapa, tỉnh padang bhum raong hadang ia meteh mbak meteh taba di dom huyện: Cần Đước, Cần Giuộc, Tân Trụ saong Châu Thành, haong mbaok ia praong labaih 6.800ha. Piah ngak hu bruk ba tabiak dalam thun 2023, gah ngak nong brei pataom tame tacei pato tukvak raong, jalan raong lagaih haong bruk di yaok bhum, gam haong nan, peih ngak siam bruk dut iek ia bhum raong kaya ikan, patagok bruk pasang iek pajaih kaya ikan; tui iek ruak di kaya ikan.

Tal tukvak ini, ban raya HCM jeng daok kurang 4.468 gru pato di dom pakat bac. Bruk kurang gru pato pataom rilo abih di pakat tiểu học laik tame dom môn Mỹ thuật, Âm nhạc, Tin học, Tiếng Anh, Công nghệ. Bruk pilih ruah gru pato ngan haong dom môn bac ini urak ini bahrau pabak hu 20% dut saong bruk caong hu. Tui Sở Pato magru TP Hồ Chí Minh, makna ngak ka ban raya ka oh pilih ruah hu ginup gru pato lac kayua kurang menuac piah pilih ruah. Meda mboh lac, dom mon bac daok dalam danak dak pato magru phổ thông dom sang bac pato pakai gru piah pato daok biak takik oh pabak hu hatai caong di ban raya.

Tui Sở Giao jalan mbak pajeng ba Đồng Nai, dalam tỉnh hu abih tih 1.383 radaih ô tô abih tukvak pandar, kuhria meng harei akaok thun 2023, dalam nan jaik abih lac radaih pajeng pandap. Dahlau di nan, UBND tỉnh Đồng Nai hu tacei pato dom gah chức năng ka bruk pasang iek, langyah piah klaak abih dom radaih abih tukvak pandar dalam tỉnh, pacang cakak bruk mbuan ba tal bala, rik daong khik kajap siam mekre bruk nao mai angaok jalan saong khik caga môi trường di dalam tỉnh.

Sang iek ruak Đa khoa Trung ương Cần Thơ bahrau taduan hu harak pok brei angan tanut chuan chất lượng ameh dalam bruk taong ruak đột quỵ meng Kapul Đột quỵ Châu Âu.  Dalam thun 2022, Sang iek ruak hu taduan taong ruak ka labaih 2.000 urang ruak đột quỵ darah tagok gilo, bruk taong ruak siam di abih, tỷ lệ tái thông labaih 6.5%. Tui TS.BS Hà Tấn Đức, akaok khoa đột quỵ sang iek ruak Đa khoa Trung ương Cần Thơ, Sang iek ruak daok pandar jalan sangka urang ruak đột quỵ tui dom tanut chuan di Kapul đột quỵ Châu Âu, daong taong ruak hu jak jeng ka urang ruak.  

Jabat dom bruk Hong Kong saong Macau (Trung Quốc) brei thau lac meng harei 6/2 tal, bruk nao mai di Trung Quốc đại lục saong 2 khu hành chính praong ini hu pambuak veik abih gah. Dom adat urak ini ieu dut iek COVID-19 saong brei takik nao mai hu klaak abih. Trung Quốc brei peih pabah mbang veik dom jalan tapen negar meng harei 8/1 hadei di tuk brei pacadu dom jalan pacang jit COVID-19 meng bilan 12/2022.  

Sa harei hadei di tuk kanja quân sự Myanmar tabiak panuac lac brei dui atah jang 6 bilan bruk samar drah, kapul Hành chính Kanja Myanmar hu ba tabiak bruk thiết quân luật di 37 ban sit dalam 4 bhum saong 4 mbang di taneh ia Đông Nam Á ini. Panuac di Kapul brei thau cambaih lac jao quyen saong tư pháp ka urang par akaok dom Bộ chỉ huy quân sự di pak ini piah ngak bruk an ninh, khik tani tanat hukum saong bruk saron mbon.

Labaih 160 urang metai kayua langik la-an rilo di Afghanistan dalam bilan 1/2023 ini dalam bilan brak la-an di abih kuhria dalam labaih 1 abap tapa. Ta-eng dalam adit blaoh hu jaik 84 urang metai. Langik la-an trun tal âm 34 độ C tuh tame taneh ia Nam Á ini dalam tuk bruk khủng hoảng kinh tế daok biak trak damak. Gam haong bruk cấm vận di dunya, bruk kinh tế srau kadau khang mala bruk pan akaok biak catang di karja Taliban.  Liên Hợp Quốc daok hu panuac ieu karja Taliban klaak bruk pakauk urang kumei ngak bruk dalam tuk rilo menuac di Afghanistan laik tame bruk mbuan eik lipa daok caong hu daong brei./.