Biar harei kabroi, ong Nguyễn Trọng Nghĩa, Uy vien Mentri Chinh tri, Bi thu Trung uong Ndang, Akaok Mban Tuyen giao saong Dan van Trung uong ngak bruk haong Gah Thuong vu Ndang uy Mentri Bangsa saong Agama ka bruk pambuak bruk ngak tui sarak bangsa haong agama. Tamat panuac di var ngak bruk, ong Nguyễn Trọng Nghĩa ndom lac: Ndang haong Karja tuk halei jeng iek praong bruk bangsa saong agama, ini lac sa dalam dom asal kadha hu makna praong dalam ngak jeng prein khang gul pataom taong abih bangsa. Ndang saong Karja hu rilo jalan, sarak saong dom sarak hukum ka bangsa saong agama. Abih di nyu nan lac, dalam kadha di Nyaom biai mbang ka 13 hu rilo asal kadha ndom tal gah ini.

Tui Danak dak ngak brei oh daok baoh sang taik tahak, meng bilan 3 tal kreh  bilan 8 thun 2025, tinh Dak Lak  brei padang ngak birau 4.285 baoh sang alin brei ka urang kathaot, jaik kathaot, bangsa takik  saong baoh sang sarak karja gaok kan kandah ka sang daok. Hadei jaik dua adit peih ngak, dom gah di Dak Lak  padang ngak 1.060 baoh sang saong  ramik pasiam veik yaok rituh baoh sang daong ka bhap bini, sumu 30%  bruk ba tabiak. Krông Bông lac sa dalam dom huyen bhum atah bayah, bhum kathaot abih di Dak Lak. Mbang ini huyen hu 513 baoh sang kan kandah ka sang daok hu daong ngak sang birau, kuhria abih tih jien buh tame ngak abih jaik 41 ti dong.

Di tinh Dak Nong jeng hu peih ngak sumu gauk bruk padang yaok pluh baoh sang daong rahra raidiuk kan kandah. Tinh kham merat tal bilan 9 anak tal salah blaoh bruk brei oh daok 540 baoh sang taik tahak alin ka dom urang baoh sang kathaot, jaik kathaot, mikva bangsa takik…Yaok baoh sang padang bahrau di tinh Dak Nong hu daong 60 trieu dong, taong abih jien buh tabiak ngak labaih 32 ty dong.

Kong an Ban raya Ho Chi Minh khan lac, meng akaok thun 2024 mbiah tal ini, gah Canh sat jalan mbak langyah labaih 3.500 mbang “ radaih pajeng tuai rah jalan”, taong phạt jaik 2 ti 7 rituh trieu dong. Piah langyah catang bruk nan, Kong an Ban raya  brei pagam camera pasang iek di dom labik mboh yau taduan raok, pajeng tuai oh njauk labik ba tabiak. Ngak tui dom asar kadha, bruk ba tabiak piah langyah catang pambuak tal radaih  ngak mbang pajeng tuai damuai. Tui nan, langyah  bruk ngak di urang dang kaok, tacei ba, urang lin meyah pambuak tal bruk caik rah tabiak “ radaih jeng tuai rah jalan”.

Labik khik ramik janih Bein cim brim Bac Lieu, di ban Bac Lieu daok dalam bruk kakei dahlau ka bruk apui khuah pakat V lac pakat biak kan kandah. Anak bruk ini, harei kabroi, Gah Pasang iek glai pambuak haong Jabat Canh sat Caga khuah padam khuah, gam haong rilo rahra peih bruk pasram Caga khuah padam khuah. Var pasram piah paglaong ilamo ngak bruk ka rajakar, cong nhan vien, tuai damuai jirah rivang saong rahra daok tapen glai ngak bruk caga khuah padam khuah dalam bilan thu; thau tani tanat ka bruk ngak di dom radaih caga khuah padam khuah tapak, srap gap padam khuah samu, siam lagaih tuk apui khuah rah tabiak.

Tong thong My Donal Trump harei kabroi khan lac, samar njauk gauk mbaoh harak ka kaya khoang san saong drap ar di taneh riya langik tasik  haong Ukraine. Tong thong My Donal Trump khan lac, dom bruk kham merat di ong piah ngak hu samar njauk hasa jalan sron mbon salamat ka taneh ia Đông Âu ini daok rah tabiak “biak siam” hadei dom mbang ginum biai  dalam adit haong urang ngak praong di Nga saong Ukraine. Tui urang ngak praong di Mỹ, ong caong khin bruk mesruh metak di Ukraine padeih tamat saong gah Mỹ daok kham merat ngak hu bruk nan.

Lac sa negar hu kinh te cakrok patagok, jien mek tame kuhria tui akaok menuas glaong, min kadha takik urang thau lac Han Quoc daok ndua nong sre jange jien mesraiy biak ralo. Tui khan brei thau bahrau ba tabiak ini, Rajaei, gah ngak mbang pablei salih saong dom baoh sang di Han Quoc daok dalam sa paok jien mesraiy biak praong. Taong abih paok jien mesraiy nan tagok tal 6.222.000 ty Won (samu 4.270 ty USD), tagok 4,1% dut haong tukvak ini thun dahlau saong tagok jaik 2,5 mbang Taong abih pandap kaya ngak tabiak dalam negar di taneh ia ini.

Mentri Pablei salih Thái Lan khan lac, dom urang ngak mbang negar langiu hu brei buh jien tame taneh ia ini dalm 2 bilan akaok thun hu tagok 68% dut haong  tukvak ini thun dahlau. Tui yaok kuhria mboh  dom doanh nghiep negar langiu  sangka  brei buh jien tame ngak bruk pabak ndap nda, jitvu, kong nghe saong pasak du lieu…Bruk nan meda hu daong bruk patagok di bruk ngak kinh te Thái Lan takik abih 3% dalam thun./.