Mbang pakacah tamat trung hoc pho thong thun 2025 hu karei jang dom thun dahlau, lac thun akaok meti padang Mbang pakacah tamat trung hoc pho thong saong pilih ruah akaok pakat bac tui Danak dak pato megru pho thong 2018 haong rilo kadha salih bahrau, kayua nan Thu tuong Rajaei hu payua harak pandar urang dang akaok dom tinh, ban brei ngak taong abih bruk yau ye bruk srap gap, peih bruk Mbang pakacah; ba tabiak jalan ngak di bhum palei, rabha bruk ngak cambaih laih tui jalan 6 cambaih laic: “cambaih laih urang, cambaih laih bruk, cambaih laih bruk di drei, cambaih laih tham quyen, cambaih laih tukvak, cambaih laih jak jeng” pagam haong bruk karja ngak tui jalan di Ndang saong Karja ka bruk ramik karja palei 2 pakat…

Ong Trần Hoàng Quân, Yam ndoc So Padang ngak TP.HCM caong khin ban raya njauk brei samar langyah hu salah siam klau bruk: quy hoach pataom abih, padang ngak rilo sang daok ka rahra saong danak dak ramik sang daok tapen kraong ribong di Quan 8, dahlau tuk peih praong pagam jabat karja haong dom bhum jiak taphia. Pambuak tal bruk panduan ba jeng yau duah sang daok ka rahra daok tapen kraong ribaong pak labik ini, ong Trần Hoàng Quân likau UBND Ban raya brei panuac saong samar mbaoh harak peih ngak danak dak hahlau harei 30 bilan 6.

Hadei labaih 1 thun peih ngak tui jalan tacei ba di Tinh uy Kon Tum ka bruk ramik pasiam bein phun oh hu kein laba, tal ini hu jaik 19.500 baoh sang rahra di tinh hu mbaok tame, dalam nan hu labaih 16.500 baoh sang urang bangsa takik. Urak ini dalam tinh Kon Tum pasiam hu labaih 3.480 hecta bein piah pala durian, mbe, pa-aok, makka, kaphe atau dom janih njam patam, baoh kayau…lagaih haong langik, taneh riya di yaok bhum palei.

Tukvak jaik ini, bhap bini xã Bình Đức, huyện Châu Thành, tỉnh Tiền Giang haduh hatai tuk mboh rilo kapal gilai tame kuac mek cuah ala kraong Tiền tagok. Bruk nan oh lac ngak khat lahik kaya cuah bo daok mbuan ba tal glut jaleih takai tatua Rạch Miễu 2 saong ar kraong ribong. Yau nan ye, karja saong dom jabat karja palei njauk brei ngak bruk, pambuak, hu jalan langyah  catang dom urang nan, njauk tui  hukum karja.

Pasak Y te huyen Cẩm Mỹ, tinh Dong Nai bahrau hu 3 urang medil lac njauk asau maruai kaik di puk 3, xa Sông Nhạn. Asau kaik 3 urang ini medil lac ruak meruai min daok palao gah langiu oh thau thei lac po di nyu, bruk pambak ruak mai meng halei. 3 urang hu nao tal labik y te piah hu kakei brei thau saong klauk jru huyet thanh pacang ruak meruai, vaccine caga ruak meruai. Dahlau nan, dalam bilan 3 meng blaoh, di huyen Cẩm Mỹ hu 1 labik jit asau ruak meruai saong oh thau thei lac po di nyu.

Thu tuong Thái Lan Paetongtarn Shinawatra saong Thủ tướng Malaysia Anwar Ibrahim hu iew phon ndem biai ka bruk saw kadau di dom tinh tapen gah Meraong negar Thai Lan, jaik Malaysia. Abih di nyu, Thu tuong Thai Lan mboh haduh hatai anak bruk saw kadau taong paoh rah tabiak di labik tapen negar, ngak jhak biak trak tal raidiuk bhap bini rahra.

Hadei dua harei Nyaom biai kandauk, biar harei 8/5, tui mon di labik nan, athak patih hu par tagok angaok pabung Sang Sampahyang Sistine labik dom Hong y daok pataom gauk ginum biai, brei thau Vatican hu Giao hoang bahrau. Urang hu pilih ruah lac Hong y urang My Robert Francis Prevost. Umo 69 thun, mek angan lac Leo XIV. Ong thau tani tanat rilo sap bahsa, meda ndom sap Anh, sap Prang, sap Italia, sap Tay Ban Nha, sap Latin saong sap Duc.

Urang kaya meda Bill Gates sanya jao brei jaik abih drap ar di drei dalam dua pluh thun anak tal saong khan lac dom urang kathaot abih di dunya hu taduan labaih 200 ti USD tapa kadung jien ngak pahala Gates Foundation di ong. Urang kaya meda ini caong khin  daong pacang cakak bruk anek kuman, uranaih saong urang amaik metai kayua ruak meda pacang caga hu; caong khin brei abih ruah yau pran bại liệt, la-ar dom, tagok baoh soi saong trun bruk iek lapa./.