Raya Vesak 2025 ngan haong kadha:“Jum pataom saong saong halan hatian anit ranam iek praong anek manuac: Tue giac Phat giao caong khin dunya hu salamat  saong cakrok patagok khang kajap hu tamat di Hoc vien Phat giao Viet Nam, TPHCM. Brei panuac di var tamat Pho Thu tuong Nguyễn Hòa Bình brei mboh: Raya Vesak nan lac pachreih ralo dalam hatai, pamedeih veik hatai jia jeng yau pamedeih veik bruk salut mbut tapak hatai di yaok manuac urang; rik tame jhul pakhang pambuak bruk dunya piah dak padang dunya salamat, sumu gauk saong patagok khang kajap.  

Pachreih tui bruk jak ba gauk “Rik daong ngak brei abih baoh sang oh daok taik tahak dalam negar thun 2025”, Mentri Quoc phong hu daong tinh Ben Tre 6 ti dong piah peih bruk padang ngak sang birau ka 100 baoh sang raidiuk kan kandah. Ini lac dom baoh sang taik tahak, khut tayak, oh daok piah pacang hu hangin hajan, ngan haong yaom jien daong 60 trieu dong sa baoh sang. Tui kuhria dalam bilan 5 ini, Mentri Quoc phong ngak hu blaoh 100 baoh sang piah jao ka mikva tame daok.

Mentri Tư lenh Bhum 5 Bol lin tasik birau peih bruk iek ruak, brei jru oh abih jien  ka labaih 300 baoh sang di sarak karja, baoh sang kan kandah di Ban Phu Quoc, tinh Kien Giang. Hadei tuk dut iek ruak, urang ruak bhian ye hu bol lin brei jru iek ruak oh mek jien. Dom urang ruak trak atau hu ruak dalam rup dahlau ye hu tacei pato nao balai iek ruak pakat angaok piah dut iek jru ruak.

Tui Pasak Pasang iek saong Taong yaom bruk pato pakai Dai hoc pakat negar TPHCM, hadei 21 harei, meng harei 17 bilan 4 tal harei 7 bilan 5 peih blah web tut angan, hu labaih 97.000 anek saih tut angan pakacah Taong yaom prein bac mbang ka 2. Mbang ka 2 pakacah hu peih tabiak di harei 1 bilan 6 di 11 tinh, ban nan lac: Huế, Bình Định, Khánh Hòa, Đăk Lăk, Lâm Đồng, Đồng Nai, Bà Rịa - Vũng Tàu, Bình Dương, Tiền Giang, An Giang saong TP.HCM. Tui kuhria, tanut pakacah mbang ka 2 hu brei thau di harei 16 bilan 6. Meyah anek saih pakacah mbang ka 2, tanut glong jang piah ba tame palih ruak.

Di dom tinh di gah Meraong negar yaom la-u menyum ia hu yaom glong meng 18.000 - 20.000 dong sa baoh, dalam tuk nan yaom la-u di bein jeng tagok gam gam. Tui urang blei, hu labik la-u that hu yaom jaik 200.000 dong sa pluh dua baoh saong 220.000 dong sa pluh dua baoh ngan haong la-u thu tamo. Yaom la-u tagok glong kayua  phun la-u, dalam nan lac la-u pala di tinh Ben Tre, Tien Giang gaok khat lahik kayua langik salih karei njom ia mbak ngak takik baoh saong kurang la-u pablei.  

Tui gah pathau khan karja Myanmar, mbiah tal harei 4/5, bruk pataom dom mbuk patau kayau sang glong rilo tal glut jaleih kayua tayun megei baoh taneh rah tabiak di harei 28/3 hu ramik salah jaik blaoh 80%. Tui yaok kuhria tal harei 1 bilan 5 mboh hu takik di nyu lac 3.835  urang metai, labaih 5.000 urang njauk rambuac saong 105 urang lahik.

Tong thong My  Donald Trump khan lac oh pasang iek brei trun jien je 145% ngan haong ndap nda di Trung Quoc anak dom mbang ginum biai dalam bruk pablei salih My - Trung Quoc anak tal di Thụy Sĩ. Dahlau di nan, My brei thau ka bruk ndem puac haong Trung Quoc peih tabiak di Thuy Si. Yaom lac, dom urang jakar kuhria ginum biai ka bruk pablei salih min dom urang langyah daok medil lac meda hu hagait salih karei veik tapa dom mbang ginum biai ha-oh. Urak ini, Trung Quoc brei taong jien je tagok tal 125% ngan haong ndap nda di Mỹ.

Jabat karja Thai Lan chap mek kapol nyaom pablei salih matuy praong, mek hu 720 kilo matuy patau saong jaik 9 trieu asar matuy jru lac di tinh Ayutthaya. Ini lac sa dalam dom bruk hu duah mboh, chap mek matuy praong abih di negar Thai Lan meng akaok thun 2025 tal ini. Dalam bilan 4 meng blaoh, Thai Lan pambuak haong Malaysia chap mek kapol nyaom pablei salih ma tuy praong di labik ini, mek hu jiak 300 kilo matuy patau saong jaik 1 trieu asar matuy karei./.