Ginum biai ka Du thao Sarak pasiam, pabak veik dom asar kadha di Hukum negar CHXHCNVN thun 2013 dalam harei 7/5, Akok Quoc hoi Trần Thanh Mẫn mboh lac: Mbang ini khol dahlak peih ngak tui Sarak 18 ramik pataom jabat karja. Ini lac jalan ngak hu bhap bini njauk hatai. Piah ngak hu dom asar kadha nan ye brei ramik pasiam Hukum karja. Dom urang Quoc hoi mboh lac, du thao sarak piah ngak brei salah siam lagaih jalan ngak bruk di karja, lagaih haong bruk cakrok patagok saong salih birau jalan ngak bruk, pakajap bruk dan chu xa hoi chu nghia, lagaih haong bruk cakrok patagok di taneh ia dalam vaktu birau.

Mentri Ngak nong saong Moi truong brei daong labaih 2 trieu 240 ribau mbang jru vaccine caga ruak laka cambuai tapaok kakau tuyp 0 di gilang khik piah pakat negar ka 30 tinh piah pacang caga jit ruak ka taphon athur raong. Di dom tinh gah Meraong negar yau: Ninh Thuận; Tây Ninh; Tiền Giang; Bến Tre; Hậu Giang; Vĩnh Long; Bình Thuận; Đồng Tháp hu daong brei jru vaccine baoh. Dom tinh taduan mek , khik piah, pandar vaccine caga ruak laka cambuai tapaok kakau njauk bruk, pacang hu jit ruak.

UBND tinh Long An mbaoh sarak brei daong padang ngak sang, pasiam veik sang daok taik tahak ka labaih 208  po sang kathaot, jaik kathaot kuhria abih tih  labaih 16 ti dong. Dom bhum palei sanya brei ngak salah bruk nan dahlau harei 15 bilan 5 ka bruk padang ngak sang, pasiam veik sang daok ka baoh sang urang dalam sarak karja, urang ngak bruk cach mang, gauk gar di urang liet si gaok kan kandah. Kuhria tal ini, hu 101 baoh sang hu padang ngak saong 15 baoh sang hu ngak salah blaoh. Dom bhum palei jhul samar tukvak padang ngak salah blaoh di harei 30 bilan 6 anak tal.

Di huyen Châu Thành, tỉnh Hậu Giang birau rah tabiak 2 mbang glut jaleih taneh tapen kraong, kuhria lahik labaih 300 trieu dong. Bruk ba tal glut jaleih taneh lac kayua ia ba theik. Karja brei samar panduan ba bhap bini tabiak truh labik mbuan gaok glut jaleih; brei ramik pasiam anak meta saong padang talaoh brei thau dahlau, paga pacang dom labik mbuan glut jaleih, kakei bhap bini juai mai jaik labaik mbuan glut jaleih meda gaok bala…

Melam kabroi 7/5, Mban Ilamo Trung uong Giao hoi Phat giao Viet Nam peih ngak danak dak “ Pataom daoh tamia Nghe thuat Phat giao Dunya” di Ban Thu Duc, TPHCM. Danak dak, hu mbaok di rilo kapol daoh tamia nghe thuat Phat giao mai meng dom taneh ia yau: Ấn Độ, Trung Quốc, Hàn Quốc, Campuchia, Thái Lan… Dalam melam pataom daoh tamia, tapa panuac daoh, ragu ragam yau khan brei thau pasang tarak hadah haniem phol, hadar veik saong anit ranam. Ini lac tatua pambuak ilamo di dom taneh ia, ba mai bruk rilo ilamo siam gheih  di ilamo Phat giao.

Bol lin Patao Campuchia kuhria caga blaoh blai sap pagap bruk pasram “Ine girai Ameh” thun 2025 ngan haong Bol lin peih paha Bhap bini Trung Quoc rah tabiak dalam 2 adit puac bilan ini. Kuhria abih tih hu jaik 2.200 bol lin dua taneh ia hu mbaok tame. Bruk pasram taong lin hu ba rilo janih phao siuk saong mac moc ndap nda birau daong bol lin di Trung Quoc, rilo phao sap janih, 20 kapal ahaok oh hu manuac peih saong mesruh, dom radaih mesruh di mbaok taneh, asaw robot, radaih tacei ba jalan mesruh metak dien tu.

Lien bang Nga brei peih ngak iek dahlau caga ka bruk duyet binh  pahadar 80 thun Harei Jayak Mesruh metak Ve quoc praong (9/5/1945 - 9/5/2025). Hu mbaok tame di rilo kapol bol lin dunya mai meng 13 taneh ia, dalam nan hu Viet Nam, Trung Quốc, Lào, Mông Cổ, Ai Cập, Myanmar saong dom taneh ia Trung Á. Tui kuhria mboh dahlau hu 29 urang jakar ngak praong di dom taneh ia saong bhum taneh hu mai pataom mbaok di adat parang iek bol lin peih ngak di harei 9/5 di Mblang bein Meriak - Quảng trường Đỏ.

Melam 7/5( tui mon Viet Nam), 133 urang ngak praong di agama Kito yam tame ginum biai palih ruah Giao hoang ka 267 di Giao hoi, hu labaih 1,4 ti urang agama. Yaom lac urak ini dunya kuhria abih tih 252 urang ngak praong di agama, min dom urang umo ala 80 thun meng brei tame palih ruah. Mbang ginum biai kandauk ini hu taong yaom lac tui labik daok ralo abih meng lavik mai dalam sajarah 2.000 thun di Giao hoi./.