Thu tuong Phạm Minh Chính bahrau pandar dom mentri, dom gah, karja palei pataom tame pato tacei khik kajap bruk ngak tabiak, pablei, pablei tabiak langiu negar dom ndap nda kaya nong, glai, tasik dalam bruk tagok trun di gah pablei salih dalam dunya. Dalam nan pandar Mentri Ngak nong saong Alam saong jabat hu pamuak bruk roh duah jalan pataom blei, anak meta khik piah ngan haong dom ndap nda meda trun yaom di tukvak yuak praong, rilo meng lac padai brah, kaphe, amraik kalu, patakik ngak kan kandah tal jien mek tame di rahra.

Yaom lac kaya nong pablei tabiak negar langiu duah hu rilo jien tame, durian Viet Nam dang anak bruk trun yaom. Dalam dom bilan akaok thun, jien mek tame meng bruk pablei  baoh durian  tapa Trung Quoc sumu labaih 20% bruk ba tabiak. Bruk nan jhul yaom durian dalam negar trun biar. Mboh yau nan, Akok Mentri Ngak nong saong Moi truong Đỗ Đức Duy khan lac, piah khik hu labik dang ka baoh durian Viet Nam, oh daok cang bruk patagok gah langiu, bo brei padang hukum khang kajap, tanut chuan ky thuat sumu gauk saong jalan ngak bruk cambaic laic.

Mbuan pablei saong pablei hu yaom glong, urang ngak sara Bac Lieu chreih chrai saong caong takre tame dom mbang ngak sara hadei ini. Urak ini yaom sara hu tagok meng 200-300 dong/kg (yaok janih sara). Ngan haong jaik 1.500ha, Bac Lieu lac sa dalam dom bhum palei hu taneh ngak sara praong di taneh ia. Thun 2024, bruk ngak sara meng kal di Bac Lieu hu kein lagaih, sara dalam tinh hu labaih 76.000 tan, tagok jaik 50.000 tan dut haong tukvak 2022-2023. Thun 2020, bruk ngak sara di Bac Lieu hu mbaoh tangin lac Drap ar Ilamo oh mboh di meta pakat negar.

Mban Khik iek jalan pasei TPHCM likau UBND TPHCM brei ramik tukvak paeih ngak danak dak Metro ka 1 di puac thun ini. Mbiah tal ini, dom bruk brei padang ngak dahlau saong mac jamraih peih ngak hu pasang iek. Meng tuk peih ngak iek mbiah tal ini, Metro ka 1 peih pajeng hu labaih 5 trieu mbang tuai damuai. Yau nan min, dom danak dak langiu njauk daok ngak, kuhria tal bilan 6 anak tal meng blaoh.

Kuhria dalam quy 3/2025 padang ngak sang mac cuh hareik ngak tabiak ndien di Ben Tre hu bruk buh jien tame padang ngak hu prein khang  650 tan/harei malam. Urak ini bruk ramik hareik harom di sang mac hareik Ben Tre tapa labik tuh hareik Phú Hưng hu salah blaoh. UB Bhap bini huyen Chau Thanh daok ngak bruk peih paha mbaok tanehngan haong dom baoh sang rahra gaok kan kandah kayua danak dak. Tal ini, jabat chuc nang di huyen Chau Thanh daok ba tabiak yaom jien bayar, daong ka dom baoh sang rahra.

Akok Thượng viện Campuchia Hun Sen iew taong abih dom urang jakar ngak praong di ASEAN brei adat ka Timor Leste tame ASEAN. Timor Leste padang taneh ia di thun 2002, hu payua harak likau tame ASEAN di thun 2011. Yau nan min, mbiah tal bilan 11 thun 2022, 10 taneh ia ASEAN meng khan brei thau ka bruk Timor Leste likau tame  ASEAN. Tui nan, dom urang ngak praong njauk hatai ka bruk jalan ngak piah taneh ia ini tame ASEAN saong jao brei ka taneh ia ini adat hukum pasang iek.

Anh jeng sa negar akaok meti pambuak bruk pablei salih haong My kuhria meng tuk Nha Trang ba tabiak tanut jien je taong abih ndap nda dalam bilan blaoh. Tong thong My Donald Trump brei thau ini lac mbang pambuak bruk hu makna, pok meyaom Anh lac dalam dalam dom negar pambuak praong di My. Min, ong brei mboh My jeng daok khik tani tanat tanut jien je 10% ngan haong ndap nda pablei tabiak langiu negar di Anh.

Sa urang likei umo 42 thun di Tay Ban Nha jaik metai saong oh mbang hagait hu luac 3 adit tapa, kayua …menyum sa pabah ia khoang hu ga di kuan pablei saong kandung. Hadei 3 adit taong ruak, bac si khan lac oh ka thau prein yawa sa-ai hu siam veik ha-oh, jeng yau tuk halei meng siam veik. Urak ini, oh ka thau cambaic laic di kalaoh ia hu ga nan ngak kandung  hatung pruac trak yau nan saong bruk nan daok hu ngak brei cambaic laic./.