Dalam tuk peih ngak praong glaong, 100 rahra naih gheih daok di negar langiu meng grauk labik dalam dunya hu nao tame Kalan Chu tich Ho Chi Minh, caik bingu di labik Pahadar dom Bol lin meng kal saong Akaok negar Lương Cường haong diuk di ong ngak adat cuh nyang piah brei mboh hatai thau phol thau dhar  likau ka negar siam mekre rahra salamat, raok sa thun bahrau haniem phol. Ini lac dom bruk daok dalam chuoi dom bruk di Danak dak Bal pataih Palei Negar 2025. Dalam bruk langik tapa bal Pataih, Akaok negar Lương Cường ndom meyai, tadhau ayuh Tet rahra daok di negar langiu, rivang tangi saong daong prein ka rahra daok di negar langiu truh tapa kan kandah, rik daong ka negar drei daok daok saong ka palei negar.

Ong Nguyễn Trọng Nghĩa, Uy vien Mentri  Chinh tri, Bi thu Trung uong Ndang, Akok Mban Tuyen giao Trung uong, harei kabroi hu mai rivang, alin 150 paok pandap  ka dom urang kan kandah di tỉnh Tiền Giang, hu 500 ribau ndong jien saong kadung dom kaya pandap. Mbang ni, ong Nguyễn Trọng Nghĩa daok hu brei talaoh huroh 150 paok pandap tet kuhria tui jien 100 trieu ndong ka dom huyen Gò Công Tây, Gò Công Đông saong Tân Phú Đông. Ong Nguyễn Trọng Nghĩa, caong khin thun birau, bhap bini tinh Tiền Giang  jeng yau dalam negar jum pataom, klak rabha kan kandah, kham merat ngak mbang piah raidiuk trei sir, haniem phol.

Piah ba mai bruk bui sambai, chreih chrai ka uranaih di ban dalam harei Tet Ula Naih 2025, Ban ndoan Can Tho bahrau peih danak dak “Harei pataom uranaih 2025”, hu kadha “Bal Pataih anit ranam”. Di danak dak, hu alin hadiah labaih 1.000 paok pandap, jien pachreih bac, radaih juak ka dom adei anek saih kan kandah, abih tih yaom jien labaih 500 trieu dong. Bruk padang chuoi chreih chrai tapa dom kadha me-in tui kapul nyaom hu daong paglaong hatai gul pataom di kapul uranaih Can Tho.

Palei ngak ngak racam di xã An Ngãi, huyện Long Đất, tỉnh Bà Rịa - Vũng Tàu daok ngak parilo racam tagok  350.000 baoh yaok harei piah pablei ka urang mbang Tet 2025. Muk Huỳnh Thị Ngọc Thu, urang pambuak haong bruk ngak ni labaih 20 thun khan lac, yaok harei meng  mon 3 dah page mikva tagok chrai tapung, cuh pui piah tuh racam labaih 3.000 baoh  ka urang blei. Dom baoh sang urang ngak racam karei dalam palei  jeng yau nan. Langiu  tuh racam meng kan dahlau mai, pak ini daok ngak dom janih racam pagol kaya rilo, racam amriak piah pabak ka urang caong blei rilo.

Kapul Urang Kamei tinh Hau Giang bahrau peih Pakak Labik yaih khan saong pablei pandap kaya OCOP meng bruk padang mbang ngui birau di urang kamei dalam tinh. Kadai kuan piah daong pambuak, yaih khan pandap kaya OCOP, daong pablei tabiak hu ka dom pandap kaya peih mbang ngui, dui pachreih 44 po pablei haong 100 pandap kaya tut angan payua pablei pandap kaya. Tuk ini, Kapul Urang Kamei tinh Hau Giang hu alin hadiah 100 paok pandap ka dom baoh sang kan kandah di ban Vị Thanh saong huyen Vị Thủy.

Tong thong ndak cu Mỹ Donald Trump harei kabroi khan lac ong brei tabiak hukum iah kong ti amaik di TikTok hu tukvak duah urang blei  ung dung ini piah palik njiak Mỹ pakauk. Tui hukum nan hu Tong thong Joe Biden mbaoh harak di bilan 4 thun dahlau, TikTok njauk pakauk di Mỹ meng harei 19/1 meyah kong ty amaik ByDance hu labik ngak bruk di Trung Quốc  oh mek veik phun jien buh tame ngak ung dung ini. Labaih 170 trieu urang pandar  ung dung TikTok di Mỹ oh daok tame hu TikTok veik. Yau nan min, Tiktok jeng khan tal urang pandar lac Tong thong ndak cu Mỹ Donald Trump duah jalan peih veik ung dung nan hadei tuk tagok rai blaoh.

Page ini, Indonesia ba tame bruk pablei tín chỉ carbon dunya piah daong ka jalan palagaih carbon dalam thin 2050 anak tal. Dom tín chỉ carbon ini hu mai meng dom danak dak patrun tathuak nerak angaok kaoh pulao Java, samu haong 2,5 trieu tấn CO2. Taphia nan, Rajaei Indonesia jeng peih ngak dom sahaneng hadah krah piah patagok nang luong hacih sa-at saong jalan mbak karo kajap. Tong thong Indonesia Prabowo Subianto hu jalan peih kadungbjien kinh te hijao meng bruk pablei dom tín chỉ carbon meng dom danak dak khik ramik glai nhiet doi, haong jalan jak ba jaik 65 ty USD dalam thun 2028 anak tal.

Thai Lan birau kuhria mboh hu 460.000 anek kuman hu ndih tapui dalam thun, biar jang 570.000 mbang urang metai, njauk brei caik hatai 4 thun jiak gauk manuac metai rilo jang manuac ndih tapui tabiak. Kuhria abih tih anek kuman ndih tapui trun 1,0 hu angan taneh ia ndih tapui biar. Anak bruk nan, Rajaei Thái Lan jhul khang dom sarak daong piah pachreih urang ndih tapui anek, min oh ka mboh njauk hatai caong khin.