Dom harei ini, dom bruk ngak Tet anit- Xuan ranam daok peih ngak ralo kadha, pambak praong tal dom bhum palei atah bayah gaok kan kandah di tinh Đak Lak. Hu bruk daong iek di dom kapul, urang saong phun jien jak di bhap bini, dom baoh sang gaok kathaot rambah di Đak Lak hu sangka, kuhria caga pandap nda saong bui sambai. Kuhria tal tukvak ni, tinh Đak Lak hu labaih 55.200 baoh sang hu alin pandap kuhria tui jien abih tih labaih 25 ty ndong. Tui muk Nông Thị Thu, Phaok Akaok Uy ban Mat tran Nagar Viet Nam tinh Đak Lak, tinh kuhria caga ka abih tih baoh sang kathaot, baoh sang jaik kathaot hu alin pandap tet, hu jien padai piah raok Tet “oh caik veik thei daok gah likuk”.

Urang ngak praong di Ban Can Tho pambuak haong UB Bhap bini quan Cái Răng padang kapol urang jakar nao alin brei pandap Tet ka darak Darak angaok kraong Cái Răng. Bruk ngak ndung bak makna nan hu Ban Can Tho peih ngak meng rilo thun tapa piah pachreih urang jeng yau daong mikva hu sa Tet trei sir. Kapol urang alin brei 400 paok pandap saong khat jien kuhria abih tih  hu labaih 200 trieu ndong, dalam nan hu dom janih ahar, keo, dom pandap karei saong jien. Bruk nan hu dom urang ngak mbang gah yulit, pablei salih daok pak ini rik jien tame ngak.

Rajaei daong drah samar labaih 105 tan brah meng gilang padai brah nagar piah daong jaik 2.300 baoh sang gaok kan kandah di tinh Kon Tum dalam tukvak Tet Nguyen dan Ula Naih saong bilan jaik yuak padai akaok thun 2025. Tinh Kon Tum hu taduan mek brah piah daong ka mikva sumu, njauk manuac, njauk tanut dahlau Tet Nguyen dan Ula Naih 2025. Tukvak ni, Rajaei tabiak panuac brei abih tih labaih 2.500 tan brah oh mek jien meng gilang brah padai nagar daong ka bhap bini dom tinh: Ha Giang, Cao Bang, Ninh Thuan, Đak Lak tukvak Tet Nguyen dan Ula Naih saong bilan pala drak akaok thun 2025.

Bhap bini Cù Lao Dung, huyện kaoh pulao di tỉnh Sóc Trăng, daok chreih  chrai cang raok uan tatua Đại Ngãi 2 hu ngak salah blaoh saong ba tame pandar, pambuak thong ar taneh, abih bruk pacang cakak, peih tabiak bruk ngak mbang patagok kinh te - xa hoi, abih di nyu lac yulit saong bruk ngak nong kong nghe glong. Ong Trần Văn Nguyên, Akok UBND huyện bui sambai lac, ini “ bruk caong khin meng lavik mai di bhap bini  Cù Lao Dung. Huyen daok pataom tame ngak pandar hu abih dom bruk lagaih gah yulit sinh thai, ilamo saong jhul pakhang bruk pandar kong nghe tame bruk ngak nong nghiep. Tatua Đại Ngãi 2 tui kuhria dahlau meda brei peih radaih tui ilamo ky thuat di harei 30 bilan 4 thun 2025.

Kapul y, gru jru Sang iek ruak Kong an tinh An Giang pambuak haong Uy ban Mat tran Nagar huyen Thoại Sơn saong ban sit Óc Eo barau peih ngak bruk iek ruak, brei jru oh mek jien ka yaok ratuh mikva kathaot saong mikva bangsa takik. Bhap bini hu pang urang ilimo khan ka kaya mbang, eng drei iek tuk gaok dom ruak bhian mboh saong pabak kaya pandap hacih sa-at di tukvak Tet. Dalam harei, Kong an huyen Thoại Sơn saong kapul ngak pahla Xuân Trang hu alin 300 paok pandap Tet hu yaom labaih 100 trieu ndong ka mikva gaok kan kandah di bhum tinh An Giang.

Tong thong Mỹ Donald Trump mbaoh harak hukum brei ân xá ka labaih 1.500 urang bhian hu mbaok tame bruk sraw kadau di sang Quoc hoi Mỹ  akaok thun 2021. Ini lac sa dalam dom bruk ngak akaok meti di Tổng thống Donald Trump dalam vaktu ka 2. Sarak hukum di Tong thong caong khin Cục Sang guk pambuak dom mbang brei ngak chip saong dom urang daok guk hu peih palao dalam melam harei nan.

Tui kuhria mboh barau ini di Trung Quoc lac jien mek tame kuhria rah tapa yaok manuac di Thuong Hai thun 2024 jaik 90.000 nhan dan te (sumu jaik 12.500 USD), dang akaok Trung Quoc. Tui pathau khan, Thuong Hai saong Bac Kinh lac 2 ban raya hu kinh te kuhria abih tih hadah krah saong ralo bruk jien mek tame glaong, pachreih hu ralo urang ngak bruk ilimo jak gheih saong jien mek tame kuhria rah tapa di rahra jang glaong.

Nepal meda brei tagok jien brei harak ndik ceik Everest tal labaih 35%, ngak ka bruk pakacah ndik ceik glong abih di dunya ini dak harei dak chiat abih rilo jien. Nepal  hu iek yau “ Tabung sang di dunya” tuk hu 8 dalam 10  tabung ceik glong abih di dunya. Taneh ia ini hu jien mek tame gah yulit biak ralo meng bruk ndik ceik. Dom urang ndik ceik meda lahik labaih 2 bilan piah ngak salah bruk ndik tagok tal tabung ceik Everest. Tukvak lagaih piah ndik ceik biak takik tukvak, meng bilan 4 tal bilan 6 yaok thun.