Dalam harei srap gap piah raok Tet Nguyen dan Ula Naih, harei kabroi, di Ban Can Tho, Akaok Quoc hoi Trần Thanh Mẫn nao rivang saong tadhau ayuh Tet ka kapul kongan Ban Can Tho; rivang, alin hadiah pandap ka baoh sang mbang tui sarak, baoh sang kathaot di phuong Tân An, quan Ninh Kiều. Rivang saong tadhau ayuh Tet kapul kongan Ban Can Tho, Akaok Quoc hoi Trần Thanh Mẫn tadhau ayuh dom jak jeng bo kapul kongan ini mek hu dalam thun 2024. Tui nan, kapul Kongan ban hu ngak salah blaoh dom bruk, sarak di Quoc hoi, Rajaei, Ndang uy Kongan Trung uong jao ka kapul kongan dalam taneh ia dalam nan hu kongan ban. Bruk an ninh chinh tri, siam mekre, salamat ka rahra dalam ban hu khik kajap.

Palei Ilamo - Yulit dom bangsa Viet Nam birau peih ngak danak dak “ Ahar manh chung hijao - Tet daong urang kathaot” thun 2025, hu jao brei jaik 700 paok pandap ka urang kathaot daok di rilo bhum palei. Ini lac bruk ngak ndung bak makna anit ranam hu peih ngak yaok thun, brei mboh bruk anit ranam gauk, rik daong khik tamik saong patagok ilamo siam gheih di Tet bangsa. Bruk papaok ahar mbanh chung, alain pandap saong daoh tamia, pachreih urang lambaok 16 bangsa saong dom kapol nyaom, urang.

Jaik tal harei Tet Ula Naih 2025, Kapul Urang lambaok Quoc hoi tinh Binh Thuan, kayua ong Đặng Hồng Sỹ, Phaok Bi thu thuong truc Tinh uy ba akaok, nao rivang saong alin hadiah paok pandap ka urang ngak kong, urang ngak bruk saong urang kathaot, jaik kathaot huyen Đức Linh saong Hàm Thuận Nam. Ong Đặng Hồng Sỹ payua panuac tadhau ayuh Tet, brei mboh bruk sangka iek praong di Ndang saong Karja ngan haong bruk patagok kinh te - xa hoi di dom bhum palei. Kapul alin brei 100 paok pandap piah rahra raok Tet trei sir soang daong prein ka dom urang nan hu truh tapa dom kan kandah, patui veik kham merat uak drei patagok dalam raidiuk.

Pacheih tui bruk “ Tet anit ranam” Xuan Ula Naih 2025, Kapol Chữ thập đỏ Ban Mỹ Tho, tỉnh Tiền Giang peih  ngak Danak dak “ Darak Tet anit ranam” piah daong urang kathaot hu uan raok Tet bui sambai. Danak dak hu alin brei 300 blah phieu blei pandap 700.000 đồng sa phieu ka dom baoh sang kathaot, jaik kathaot saong urang taha metui. Urang hu blei dom pandap yau: brah, ia mesin, menyek mbang…di nyaom darak ini. Mbang ini, Kapol Chu thap do Ban raya HCM hu daong phun jien ka 3 baoh sang kathaot pak ni piah ngak mbang pablei salih, patagok dalam raidiuk.

Palei Vi Rơ Ngheo daok di huyen Kon Plong, tinh Kon Tum jeng sa labik hadah dalam bruk padang palei pala bahrau meng bruk dui ba di sa-ai A Hiền. Meng bruk “ngak bahrau dom kadha klak meng kal”, sa-ai hu mikva njauk hatai dalam bruk jak ba pasiam veik sang danaok, khik ramik ilamo saong patagok bruk yulit bhap bini. Vi Rơ Ngheo urak ini hu homestay, sang rông bhap bini, kapul taong paoh kong caing, bein phong lan…dui pachreih hu rilo tuai damuai. Yulit patagok ba mai jien mek tame, hatai chreih chrai saong kein lagaih salih raidiuk ka rahra.

Hadei yajak praong prang dalam bruk palih ruah di bilan 11 thun 2024, melam karei, ong Donald Trump hu gilac veik tame Nhà Trắng ngan haong rilo danak dak  caong khin pamong tal bruk “ Ngak ka taneh ia Mỹ praong khang kaya meda veik”. Yau nan min, bruk Tổng thống Trump hu gilac veik ba mai rilo sahaneng karei di gauk dalam rahra Mỹ. Maong tapa, dom urang njauk hatai haong, njauk ndem tal bruk jak ba  MAGA ye ini bruk biak praong caong khin Tổng thống Trump meda ngak siam jang vaktu dahlau. Yaok ribau  urang oh lac langik la-ar, jalan atah bayah mai tal Washington piah hu mbaok tuk tagok rai ngak bruk atau piah iek adat pok brei bruk ngak.

Pakacah nduac marathon robot thaik menuac akaok meti dalam dunya, hu peih ngak di Bắc Kinh, Trung Quoc dalam meteh akaok thun ini. Robot thaik menuac meng dom gah ngak po hadah krah yau dom kongti robot dunya, pasak roh duah, kalup kapul robot saong dom sang bac dai hoc hu da-a tame mbang pakacah nduac di jalan atah labaih 21km. Robot nduac hu jalan atah abih bo oh khin salih pin ye mek hu yai thuong Prein karo siam abih…Kuhria, yai hu labaih 12.000 robot saong labaih 20 kapul robot thaik menuac di dom kongti.

Urang ngak bruk dalam karja saong  ngak ka urang gah langiu di ban ine Bangkok, Thái Lan likau brei ngak bruk di sang 2 harei 20-21/1 kayua yawa langik njom nerak ngak jhak tal prein yawa. Karja ban ine Bangkok pachreih bhap bini brei cuh tanjiak pacang idung pabah saong takik tabiak gah langiu. Dom jalan ngak nan daong ngak trun takik radaih tabiak jalan, plaik njiak gal tavak jalan saong langik njom nerak./.