Di yava langik Tet mai bal pataih mai, Lien ndoan Lao dong Ban raya HCM barau alin 45 paok pandap ka urang ngak kong ruak trak kan si dhit gaok kan kandah di bhum. Yaok paok pandap hu yaom 2 trieu ndong jien mbaok, kuhria abih tih lac 90 trieu ndong. Yau nan, Tet ni Lien doan Lao dong Ban raya HCM buh tabiak 500 ty ndong sangka urang ngak bruk. Dalam nan hu peih ngak ralo bruk, danak dak, yau: daong 495 harak ve radaih pui, 118 harak ve kapal ahaok dalam danak dak “Mbang radaih pui, kapal ahaok Kong ndoan” piah pajieng urang ngak bruk mai palei, “Harei jum pataom urang ngak kong - Nyaom darak pasar anit ranam” sangka ka 9.500 urang kong ndoan gaok kan kandah…

Thun ini, tinh Hau Giang palih xa Vĩnh Viễn A, huyen Long Mỹ ngak labik peih ngak dom bruk ndung bak makna siam gheih dalam “ Tet Bol lin - Bhap bini”. Danak dak padang ngak 47 baoh sang ka dom bol lin, baoh sang di sarak, baoh sang kathaot hu raidiuk kan kandah  ka sang daok kuhria tui jien hu laih 2,4 ty dong; Padang ngak, pasiam veik jalan mbak palei pala, ngak birau 5 tatua  saong ngak pasiam veik baoh patau mbia pahadar dom urang var klak rup drei ka taneh ia,  padang ngak danak dak “ Jalan hala daok Negar” kuhria abih tih 510 trieu dong.

Di harei “Darak pasar oh mek jien” ka baoh sang kathaot, baoh sang gaok kan kandah di tinh Tra Vinh, labaih 100 baoh sang, ralo abih lac mikva bangsa Khmer hu brei harak phieu hu mbaok di darak pasar hu makna ni. Mikva hu ruah dom paok pandap caong ka raidiuk: brah, saradang, mi, baoh manuk baoh ada, ia tasau lamaow…bo oh saneng hagait di yaom kaom. Dom paok pandap ni yaom jien oh glaong, min pabak tung tian, klah rabha anit ranam. “Darak pasar oh mek jien” piah daong, klah rabha kan kandah saong mikva di bhum palei, rik prein parang tabiak hatai anit ranam, jum pataom abih baoh sang piah raok Tet.

Dalam tuk Tet Nguyen ndan Ula Naih, gam haong rilo bruk ngak ilamo, daoh tamia, tinh Dak Lak  meda peih bruk cuh phao bingu di 5 labik lac Ban Buôn Ma Thuột saong dom huyện Ea H’Leo, Krông Buk, Krông Ana, Ea Kar. Dom bruk ngak ilamo, daoh tamia, riya roya peih ngak luac dalam tuk Tet di ralo labik dalam tinh. Abih di nyu, dalam melam tame thun birau, di Mblang bein 10/3, ban Buon Ma Thuot peih ngak danak daka daoh tamia “Uan Đảng praong hadah hadai, raok Thun birau Ula Naih 2025” saong cuh phao bingu biar…

Harei nyaom Mbao Xuan saong pakacah An pham Xuan Ula Naih 2025 lac sa dalam dom danak dak njauk caik hatai di dom bruk ngak uan Ndang - raok Bal pataih di Ban Can Tho. Harei nyaom Mbao Xuan duh labaih 200 janih an pham Xuan Ula Naih dalam dom gah chinh tri - xa hoi, kinh te - ky thuat birau, ilamo - daoh tamia, harak mbao tapuk Xuan piah ka anek naih, mbao Xuan di dom tinh, ban, an pham Xuan di dom bhum palei, ndon vi di ban. Harei nyaom Mbao Xuan Ban Can Tho duh ka urang puac tapa dom harei Tet.

Hadei tuk tagok rai,Tong thong Donald Trump mbaoh harak brei tabiak hukum ba Mỹ tabiak truh Gah Y te Danya (WHO). Harak nan brei thau ka bruk Mỹ khin tabiak truh Gah Y te Danya gam mek veik abih dom sarak  di karja dahlau diah ka bruk Mỹ tame gilac veik. Tui harak ini, bruk payua dom jien nan, daong saong jien padai di Mỹ ka WHO meda padeih veik saong urang ngak bruk rajaei atau po buh jien tame di Mỹ  daok ngak bruk ka WHO meda hu iew mai veik saong jao brei ngak bruk karei.

Ndem ka bruk kuhria ka jalan ngak di Indonesia ba tabiak thun umo uranaih brei pandar mang xa hoi daok pachreih hu ralo sangka maong iek di dom harei ni. Bruk kuhria ngak ni lac yam akaok mati hu ralo amaik ame jie hatai tame, min jang hu ralo panuac khan lac maong iek biak tani tanat kayua bruk ni jang hu kanjah jhak. Tui dom urang jakar Indonesia, kadha Internet saong brei adat tame mang xa hoi hu “salih” tui umo thun meng 3 tal 17 thun klak ngak jhak tal bruk bac da-a saong praong tagok di anek naih.

Cựu Thủ tướng Thái Lan Thaksin Shinawatra khan lac bruk padang ngak 1 trieu baoh sang  daok xa hoi ka urang jien mek tame takik piah langyah ka bruk caong khin hu sang daok biak ralo dalam negar.Rajaei Thai Lan kuhria padang ngak takik di nyu 100.000 baoh sang dalam thun ini saong 100.000 baoh sang tra di thun 2026. Dom baoh sang nan meda hu padang ngak  jaik labik radaih ndien, jien ndik radaih labaih 20 baht yaok mbang, daong bhap bini mbuan blei hu sang daok.