Tui Taong Lien ndoan Lao ndong Viet Nam, “Mbang radaih apui kong ndoan – Xuan 2025” brei peih nduac meng harei ini, 22 bilan 12 thun Ine Girai, di ga Biên Hòa, tinh Dong Nai. Danak dak kayua Lien ndoan Lao ndong tinh Dong Nai dang ngak, pambuak haong Kong ndoan Jalan pasei Viet Nam peih ngak. Ini lac bruk ngak hu makna piah daong urang kong ndoan, urang ngak bruk nao sang mbang Tet. Tal tukvak ini, abih tih dom urang tut angan hu mbaok tame lac 1.750 urang, dalam nan hu 1.009 urang kong ndoan ngak bruk saong 741 urang dalam baoh sang di dom urang nan. Langiu di nan, hu 450 urang kong ndoan, urang ngak bruk hu alin hadiah harak ve ahaok par meng Sai Gon nao Ha Noi saong Vinh.

Dalam 3 harei peih ngak dom bruk Tet bol lin – bhap bini 2025 di xã An Thạnh 2, huyen Cù Lao Dung, tỉnh Sóc Trăng buh tabiak abih tih jiak 24 tỷ đồng sangka kuhria ka bhap bini. Di dom puk palei brei puh ramik hacih sa-at, kuac hacih brong tathuak ia, pajeng ba pandap pabak takai sang, pachreih labaih 600 mbang urang jakar, urang lin saong bhap bini tame…Tỉnh Sóc Trăng jak ba urang rik jien tame padang ngak sang “ Jum pataom”, ngak brei abih baoh sang taik tahak ka 564 baoh sang, kuhria tui jien labaih 22 tỷ đồng, rik tame  ngak siam gheih jang thaot binguk “Urang lin Wa Ho” dalam Bhap bini.

Tinh Tien Giang peih bruk alin brei Huy hieu Ndang ka labaih 600 urang ndang dalam harei pahadar 95 thun padang Ndang saong uan raok Tet Ula Naih 2025. Dalam nan, labaih 60 urang ndang hu Huy hieu aval saong urang ndang hu pok meyaom alin hadiah. Dom Huy hieu ini hu thun umo meng 50 thun tal 80 thun, ngan haong Ndang bo Ban Mỹ Tho hu ndang vien hu alin hadiah Huy hieu Ndang rilo abih. Harei alin hadiah Huy hieu Ndang hu peih ngak praong glaong, taduan dom prein rik daong hu makna di dom urang ndang.

Tet Nguyen ndan daok mai jaik, dom labik ngak tabiak OCOP di tinh An Giang daok thuvi thuvar ngak tabiak rilo pandap, pabak ka urang blei. Njauk ndem tal dom pandap ikan padoc  ikan klaik thu, tung-lo-mo saong ahar hạnh nhân. Labik ngak ikan klaik pambu thu Kim Loan di huyện Chợ Mới kuhria pabak labaih 10 tan ikan pambu thu dom janih. Labik ngak tung-lo-mo  ANAS di huyện Tân Châu jeng daok kham ngak pandap kaya bingi karei krih ini. Kong ty Tiến Anh di huyện Chợ Mới pataom tame ngak ahar hạnh nhân hu rilo janih, asar siam…

Huyen Chư Prông, tinh Gia Lai daok kham merat khik ramik saong patagok yaom kaom ilamo kong caing di urang bangsa Jrai. Dalam huyen urak ini hu 60 kapul kong caing haong jaik 2.000 urang. Rilo jalan langyah hu ba tame ngak yau peih tal pato taong paoh kong caing, peih harei pataom mbaok, mbang pakacah, parang iek harei adat bhap bini meng kal hu taong paoh kong caing. Dom palei jeng kham merat khik tani tanat bruk pasram, parang iek  saong khik ramik dom baoh kong caing hu yaom glaong. Huyen Chư Prông brei ba tagok panuac likau mbaoh tangin brei angan nghe nhan uu tu dalam gah bruk ini.

Tong thong Mỹ Donald Trump dalam harei akok meti di vaktu ngak bruk di drei, harei kabroi ong mbaoh harak hukum brei kadun tukvak pakauk TikTok di Mỹ dalam 75 harei saong dom kong ty pablei jitvu ka TikTok oh taduan bruk tui hukum ba tabiak. Hukum hu iew Mentri  Hukum Mỹ oh ka ngak tui hukum piah karja di Tổng thống Trump hu tukvak brei thau bruk ngak pambak tal Tik Tok. Tong thong Trump lac, tui Hukum, ong brei ngak bruk kayua piah khik siam salamat taneh ia Mỹ, ngak tui sarak pambuak negar langiu saong dom bruk praong di hukuk.

Kuk Pasang iek Taneh riya di Mentri Drap ar Langik tasik Trung Quoc bahrau khan brei thau hu duah mboh dom labik ameh hu makna di rilo bhum palei, ngan haong abih tih 168 tấn drap ar ameh bahrau hu brei thau. Dalam nan, tinh Cam Túc duah mboh dom labik ameh biak praong tagok tal 102 tấn. Langiu di nan, daok hu dom labik ameh karei di Nội Mông, Hắc Long Giang…jeng duah mboh labaih 40 jalan quặng ameh di labik ameh Vạn Cổ hu yaom 600 tỷ nhân dân tệ (jaik 83 ty USD) meyah kuhria tui yaom ameh urak ini.

Dom urang tui Chinh thong giao di negar Nga, harei kabroi, ba rup tram tame ia kraong la-ar ia khan pahadar Adat Hiển Linh. Di ar kraong, dom kapol daong saong urang y te brei hu mbaok tui iek tani tanat dom urang hu mbaok tame.  Adat Hiển Linh  lac sa dalam dom adat lavik rai abih di agama Cơ đốc, brei thau a harei Chúa Jesus hu raco rao paklak dius. Yau nan min, urang agama Chính thống giáo tram rup dalam ia la-ar atau rao tangin meng ia kraong, hatai caong khin adat cambat ini  ba mai prein yawa khang kajap karo, patuah jamo saong ngak hacih rup suan thrap sa-at./.