Di var taom mbaok Kapol urang lambaok halau janeng, urang ngak bruk dom agama, bangsa takik, nhan si, tri thuc, urang naih gheih Ban raya HCM tuk page ini 16/8 di Phủ Chủ tịch, Akok negar Võ Văn Thưởng ndom lac, yaok urang  di Ban raya HCM lac dom urang naih gheih rik tame ngak jeng dalikan  ndung bak hatai bui sambai di Ban raya angan Wa Ho, ngak brei pahu jeng biak  dom caong khin yam tagok dalam bhum saong dunya di dom rairah urang Viet Nam. Tui nan, akaok negar kakei Ban raya brei ngak siam dom sarak di Đảng, di Quoc hoi, dalam nan hu dom sarak đặc thù, ba Ban raya patagok. Bruk peih ngak hu siam dom jalan nan lac piah ka Đảng, Karja patui bruk patabiak jalan ngak birau  daong Ban raya cakrok patui veik khang kajap jang.

Viện Vệ sinh dịch tễ pakat negar brei parabha 185.000 mbang vaccine DPT-VGB-Hib (vaccine 5 dalam 1) ka 49 tỉnh, ban saong brei pajeng ba tal labik pak di dalam bilan 8. Dom vaccine nan kayua Gah Y tế dunya saong Kadung jien Uranaih Liên Hợp Quốc daong ka Việt Nam piah klauk peih praong ka uranaih. Vaccine 5 dalam 1 hu pandar piah klauk ka uranaih meng 2 bilan tal mala 18 bilan oh ka hu klauk ginup vaccine hu asal bạch hầu, ho gà, uốn ván, viêm gan B, Hib.

Urang nong pala li-u di Bến Tre daok bui sambai anak bruk baoh la-u that  hu pablei tabiak veik Hoa Kỳ saong gah chức năng daok patui bruk ginum biai piah pablei la-u  tapa Trung Quốc. Bruk ini rik daong ngak brei yaom li-u  that tagok, urang ngak nong  meda mek hu jien tame tani tanat. Tui Sở Ngak nong saong Patagok palei pala, tỉnh hu labaih 15.000 ha taneh pala la-u. La-u xiêm kanduh hijao di Bến Tre hu chỉ dẫn địa lý, ba mbuan lagaih  ka baoh la-u biak ralo. Urak ini, hu labaih 10 doanh nghiep dalam saong langiu tỉnh tut angan tame padang mã labik pala, mã labik papaok la-u that piah menyum ia tabiak negar langiu.  

Meng akaok thun tal ini tỉnh Trà Vinh khat lahik jaik 1.400ha raong hadang, abih tih lac jaik 625 triệu drei. Tui pasang iek di Chi cục Kaya ikan Trà Vinh, kayua langik oh lagaih, ia oh siam, hadang raong hu dom ruak tanut mbong patih, bhong meiah rup, ruak jalan tung pruac dalam vaktu 25-55 harei raong. Urak ini urang jakar Sở ngak nong saong patagok palei pala hu trun tal labik raong piah tacei pato urang raong jalan pacang caga ruak ka hadang raong. Gam haong nan, hu kakei urang raong hadang bhian tui iek labik pabak ia tame, ia dalam danao raong.

Gam saong bruk pataom buh jien tame ngak pasiam dom labik glut jaleih trak, tỉnh Tiền Giang daok samar peih ngak Danak dak pacang caga glut jaleih ar kraong, ar tasik. Meng akok thun tal ini, di tỉnh Tiền Giang rah tabiak 69 labik glut jaleih abih tih atah labaih 12.000 m. Kuhria jien buh tame ngak pasiam veik jaik 165 tỷ đồng. Tui kuhria mboh dahlau, kadung jien tỉnh buh tame pasiam labaih 142 tỷ đồng, daok veik parabha brei pakat huyen buh jien tame ngak.

Darak pasar brah dunya meda catang jang tuk Trung Quốc - taneh ia ngak tabiak brah praong abih di dunya daok glaih glar haong hajan praong saong ia dauk ia sua. Hu thau, bruk ia dauk ia sua daok hu paglaong tanut sangka di 3 tỉnh hu tal 23% sản lượng brah di abih Trung Quốc lac Nội Mông, Cát Lâm saong Hắc Long Giang. Rilo labik pala, ngak ngũ cốc praong di 3 tỉnh ini khut, lahik meng hajan praong saong rabuk Doksuri. Dom chuyên gia mboh lac, yaom ngũ cốc dalam taneh ia Trung Quốc meda tagok saong taneh ia ini caong blei tame rilo jang piah pabak ka khut, lahik dalam pala, ngak.

Dalam kham merat patagok bruk daong piah pachreih urang ndih tapui anek, Rajaei  Hàn Quốc daok jhul tagok bruk peih ngak sarak negar ka “Bao hiem anek kamar dalam tian saong urang amaik” tapa sarak karja negar piah khik caga hu salamat ka urang metian piah patrun patakik di abih bruk labuh ruak kik anek dalam tian saong urang amaik  meng tuk metian anek tal sa thun hadei di ndih tapui anek. Janih Bao hiem ini hu patagok yau sa pandap  piah bayar jien gah y te meng tuk anek dalam tian amaik  tal 12 bilan hadei tuk ndih tapui.

Rajaei Iraq hu tabiak adat brei padeih pala padai saong tangei dalam thun ini kayua kurang ia pruh. Thun ini, labik pabak ia taba hu takik. Bruk srau kadau ia di Iraq rah tabiak dalam tuk biến đổi khí hậu ngak brei takik hajan, langik pandiak tagok saong pandar biak rilo ka dom danak dak thủy lợi. Iraq laik tame bruk kurang ia taba meng rilo thun ini mai. Urak ini Iraq hu ieu Thổ Nhĩ Kỳ saong Iran parabha brei ia meng dom kraong Tigris saong Euphrates, saong daok kuhria langyah bruk nan tapa ginum biai./.