Patui veik danak dak mbang nao rivang Lào, dah page harei ini 11/4, akaok negar Võ Văn Thưởng nao rivang urang jakar, urang ngak lambaok negar Việt Nam saong taom gaok lambaok di 100 ribau urang Việt Nam di Lào. Akaok negar brei mboh hatai bui sambai taom gaok urang lambaok rahra negar drei di Lào saong payua panuac uan tabuan siam makre abih tal mikva uan harei Tết Bun Pi-may di Lào. Akaok negar brei thau lac dom makna di mbang nao rivang negar langiu camriep abih meng di tuk tagok ngak bruk bahrau, brei mboh bruk iek praong bo Đảng, Kanja Việt Nam ngan haong talei pambuak bruk biak praong, jumpataom gauk saong bruk pambuak gauk  abih gah di Việt Nam-Lào

Kapul ngak bruk di UB Bangsa hu mai ravang, tadhau ayuh Chol Chnăm Thmây bhap bini Khmer saong dom ong bhik baha Candaransi, Pothiwong di TP.HCM. Di dom labik nao ravang, akaok mintri, Chủ nhiệm UB Bangsa Hầu A Lềnh jia lac, dom ong bhik haong taong abih bhap bini  Khmer daok patagok bruk jum pataom, anit ranam taneh ia, bac megru saong ngak tui jalan hadah krah siam mekre di Chủ tịch Hồ Chí Minh. Gam haong nan, taong yaom glaong bruk jum pataom pakat dunya di baha Candaransi (Quận 3) hu daong ka anek saih, SV di taneh ia Lào, Campuchia daok bac megru di TP.HCM. Tapa nan, kapul ngak bruk hu alin pandap uan thun bahrau brei ka baha Candaransi saong Pothiwong, haong 37 urang hu angan je dalam bhap bini bangsa Khmer.

Tỉnh Quảng Ninh daok khik labik dang akaok thun ka 6 gam gam dalam bruk dak labik dang Chỉ số prein maraik gauk pakat tỉnh PCI thun 2022.  Bruk njauk caik hatai nan lac, Hà Nội meng di labik dang ka 10 di thun 2021 trun daok labik dang ka 20 di thun 2022, TPHCM jeng kaduan di labik dang 14 trun daok di labik ka 27 dalam thun 2022. Mbang camriep, Bà Rịa- Vũng Tàu dang di labik ka 4, hu mbaok tame dalam top 5 dom tinh, ban hu chỉ số PCI glaong abih dalam taneh ia. Langiu di Quảng Ninh, Bắc Giang, Hải Phòng saong Đồng Tháp lac dom bhum palei hu chất lượng rami ramik tacei jalan kinh te hu taong yaom glaong abih dalam bruk dak labik dang.

Tui BHXH Việt Nam, dahlau daih, bhap bini tok hu sa pilih ruah lac tut angan, đóng, nộp jien blei BHXH tự nguyện, BHYT tui baoh sang tapa jalan buh jien tapak di jabat BHXH. Min urak ini, urang blei meda đóng, nộp BHXH tự nguyện, BHYT baoh sang tui jalan online tapa pabah mbang Dịch vụ công BHXH Việt Nam, atau pabah mbang Dịch vụ công negar hu automatic tal tanut glaong, atau mangaok ứng dụng tapak di dom gilang pariak. Meng akaok thun 2022 tal urak ini, BHXH Việt Nam hu langyah brei ka labaih 51 rabau mbang dui atah thẻ BHYT tui baoh sang, labaih 7.200 urang đóng veik BHXH tự nguyện tapa pabah mbang dch vụ công taneh ia.

Harei pataom ahar bhap bini Nam Bộ mbang ka X thun 2023 di ban Cần Thơ tui kuhria hu peih tabiak meng harei 28-4 tal 2-5 ngan haong rilo bruk ngak biak chreih chrai. Dalam nan, harei pataom ahar bhap bini tui kuhria hu peih tabiak di harei 28-4. Harei cuh gilau saong pok ahar di Harei pachit daa Po Hùng meda hu peih tabiak di maong 7, harei 29-4, di kalan Po Hùng. Harei pakacah ngak ahar bhap bini saong danak dak peih ngak dom janih ahar meng kan tui kuhria hu peih tabiak meng harei 29-4 tal 1-5. Tal urak ini hu 20 kapuk pakacah, lambaok ka 9 quận, huyện; 9 tỉnh, ban saong dua kapul tự do.

Ban ine Bắc Kinh di Trung Quốc sa mbang tra njauk rabuk cuah, tui nan, meta maong atah di jaik abih dom labik tok lac meng 1 tal 4 km, langik njaom nerak biak trak. Dom chuyên gia khí tượng brei thau, mbang rabuk cuah mbang ini tabiak meng gah meraong Mông Cổ, hadei di nan nyu nao trun gah meraong saong hu mbaok di jaik abih dom labik gah brak kraong Trường Giang di Trung Quốc. Tui yaok pataom, labaih 70% langik hu cuah yaok thun di Trung Quốc rah tabiak di bilan xuân saong rilo di abih lac bilan 4, patui di nan lac bilan 3 saong bilan 5.

Ấn Độ daok lac sa dalam dom gah kinh tế cak rok patagok samar drah abih di dunya. Min, di taneh ia Nam Á ini hu dom bruk nghịch lý lac: Rahra dak harei dak tagok glaong ye dak takik urang kumei hu bruk ngak. Dalam thun 2022 njauk hu 10% urang kumei Ấn Độ dalam umo ngak bruk hu pilih ruah, bruk nan hu brei thau lac hu labaih 39 triệu urang kumei Ấn Độ dalam umo ngak bruk hu nao ngak, bier jang rilo dut saong 361 triệu urang likei. Bruk hu mbaok di urang kumei dalam kapul ngak bruk di Ấn Độ daok dalam bruk bier abih di dunya, labaih 670 triệu urang kumei dalam umo ngak bruk oh hu bruk ngak.

Urak ini dom uraniah metai kayua phao ndao di Mỹ tagok tal tanut glaong di abih. Dalam thun 2021, Mỹ hu 2.590 uranaih saong dam dara umo mala 18 thun metai kayua phao ndao, tagok tal meteh duk haong thun 2019 – tukvak dahlau di jit praong COVID-19 tamuh tabiak. Njauk caik hatai lac, 60% dom uranaih metai dalam thun 2021 lac kayua njauk bala dalam dom bruk pametai menuac, labaih 30% lac kayua pametai rup eng saong daok veik lac metai kayua bala pambuak tal phao ndao. Ini lac bruk njauk duh hatai dalam tuk bruk pametai menuac meng phao ndao di Mỹ oh padeih patagok.