Jabat akaok negar, Mintri Công an, TA bhap bini pakat glaong abih saong Mintri Ngoại giao gam daong akaok mbang họp báo brei thau bruk brei tabiak guk dahlau tukvak dalam thun ini di Akaok negar.Tui nan, akaok negar brei tabiak guk dahlau tukvak ka 3.763 urang daok njauk guk saong 2 urang daok brei padeih daok guk, hu brei tabiak guk dahlau tukvak dalam thun ini. Harak nan hu ngak tui meng harei 1/10. Bruk peih tabiak guk dahlau jang tukvak njauk guk, sa mbang tra brei mboh bruk khoan hồng di Đảng, Karja negar CHXHCN Việt Nam saong ilamu siam mekre di bangsa Việt Nam ngan saong dom menuac duas, menuac njauk guk, pachreih urang pasiam veik hatung hatian, jalan diukrai, pasram jeng menuac hu kein ka puk paga, palei negar. 

Peih ngak danak dak taom gaok cử tri dahlau mbang Nyaom ka 8, Quốc hội mbang 15, page ini, 30/9, Akaok Quoc hoi Trần Thanh Mẫn saong Kapul urang Quoc hoi tinh Hậu Giang hu taom gaok cu tri di dom labik dalam tinh Hậu Giang. Javap jaloi panuac tangi sua di cu tri ka bruk pacang caga tham nhung, tieu cuc, Akaok Quoc hoi brei thau, bruk njauk ndom tal dalam bruk ini lac oh hu bhum pakauk, suan tal halei, langyah tal nan. Kadha ini hu ba mai hatai jia ka rahra, ngak ka Ndang drei biak jangaih hacih sa-at, khang kajap. Akaok Quoc hoi jeng kakei Hậu Giang ngak siam bruk padang Ndang jangaih hacih sa-at khang kajap.  

Kate lac sa dat cambat praong di urang Cam Ahier rah tabiak di akaok bilan 7 saka Cam, thun ini laik tame harei 1 saong 2/10 saka ia harei. Dom harei tapa, lambaok dom kapul  nyaom, dom puk palei dalam tinh Ninh Thuận saong mikva Cam kham merat puh ramik hacih sa-at puk palei, tual dok taneh ia, rami ramik sang danaok caga taduan raok tuai damuai. Di bimaong Pô Nít saong bimaong Pô Sah Inư, dom bruk ilamu daoh tamia salam uan Katê rah tabiak meng dah pagaiy harei 1/10 , hu: parang iek gam haong ngak iek bruk ngak lan am, menyim khan bai, ilamu mbang huak meng kan; yaih khan thaot binguk ka ialmu Cam, ka harei Katê saong ilamu ngak lan am Cam meng video; daoh, tamia ragu daoh bhap bini Cam. 

Piah palagaih la mikva Khmer raok Harei Sen Dolta bui sambai, chreih chrai, patak pataom saong salamat, Akaok UB Bhap bini tinh Vĩnh Long pandar dom jabat, kapul nyaom, doanh nghiep, sang bac hu jalan ngak, rami ramik brei urang jakar, cong chuc, vien chuc, urang ngak, urang jakar bol lin pan phao kraong, anek saih, sinh vien urang bangsa Khmer hu padeih piah mbang Sen Dolta 3 harei, kuhria meng harei 1/10 tal abih harei 3/10. Ngan haong dom doanh nghiep, tui bruk di doanh nghiep piah khik kajap ngak siam sarak bangsa di Ndang, Karja saong sarak hu angan di mikva bangsa Khmer bhum Taneran khraong Cửu Long. (VOV) 

Mban Bangsa saong Agama tinh Bạc Liêu bahrau peih tal pato pasram paglaong sap DTTS brei ka 160 urang bac lac urang jakar, cong chuc, vien chuc dang akaok pakat phong saong samu nan. Danak dak pato pasram paglaong ilamu ini, pamaong tal paglaong siam mekre, kein laba bruk pathau khan, jak ba bhap bini Khmer dalam tỉnh, patagok bruk jum pataom bangsa, hu mbaok tame cakrok kinh te - xa hoi tui jalan ngak, sarak di Ndang saong hukum di Karja. 

Harei ini, rilo sang bac njauk kreik bambang, dom mbang par brei klaak di Philippines kayua gaok kan kandah meng rabuk Julian. Tui khau tin rabuk di Jabat langik tasik Philippines, rabuk Julian daok khang tagok saong hu mbuan tagok glaong jeng “rabuk praong” dalam harei paguh (1/10). Pasak rabuk urak ini daok dalam bhum ia tapen tasik di dom pulao Balintang di gah Barak Philippines. Prein angin khang abih jaik pasak rabuk daok lac 175km sa tuk, angin ndaoh tagok tal 215km sa tuk. Ini lac rabuk ka 10 tuh tame Philippines kuhria meng akaok thun tal ini. (VOV) 

Rabuk Helene palai pajoa biak khang grauk labik dalam bhum Đông Nam taneh ia Mỹ, ngak brei takik di abih 91 urang matai saong yaok trieu menuac oh hu ndien pandar. Dom menuac matai meda hu rilo jang kayua jalan phone di rilo labik nyu klaik klaoh oh ka ieu hu. Dom công ty bao hiem kuhria mboh lac khat lahik di rabuk Helene meda meng 15 ty tal labaih 100 ty USD./.

Tapa duah thau hatai menuac sia hu peih ngak dalam 2 harei tapa brei mboh lac, labaih  meteh urang hu sua tangi brei mboh hatai caong glaong ngan haong Akaok bahrau di ndang Dan chu Tu do (pan quyen) Shigeru Ishiba, urang tui kuhria hu pilih ruah ngak Thu tuong ka 102 di Japon dalam mbang Nyaom Quoc hoi harei 1/10 tal. Meng hatai caong ka bruk kham merat salih bahrau chinh tri bo ong Ishiba daok tui ngak nyu tamat blaoh, hu jhul bruk patagok pachreih tui di rahra Japon ngan haong ndang Dan chu Tu do.