Dahlau di bruk harak mbao cih vak bruk ndap nda kaya kan dalam dom sang bac di Ban raya khut tayah trak, ngak kan kandah tal bruk bac saong pato, piah samar  pasiam veik bruk nan, Akok UBND TPHCM tacei pato So Pato megru samar pambuak bruk haong UBND dom phuong, xa, dac khu pataom iek veik sang bac, mac jamraih, kapan kik pato bac di taong abih sang bac di karja; kuhria parabha bruk khut tayah; ba tabiak jalan ngak ka taong abih, dalam nan hu ramik pasiam samar saong ba tabiak jalan padang ngak birau di dom labik hu bhap bini rahrah parilo samar, plaih njiak kurang labaih ngak bruk tapa prein dahlau harei 30 bilan 9 ini.

Tinh Ca Mau khan tapa sarak daong ka urang jakar kong chuc, vien chuc. Tui nan, yaok urang jakar, kong chuc, vien chuc, urang ngak bruk oh chuyen trach saong urang ngak daok tah meng sang tal jabat ngak bruk 15 km tagok, hu daong 1,82 trieu dong sa bilan. Dalam nan jien nao mai hu 480.000 dong; jien pah sang 840.000 dong, jien cai pandar 500.000 dong. Tui kuhria mboh dahlau hu labaih 5.900 urang hu mbang tui sarak ini, kuhria tui jien labaih 43 ti dong.

Di Hoc vien Phat giao Nam tong Khmer, phuong Ô Môn, ban Cần Thơ birau peih ngak Yang Sene Dolta thun 2025 nan lac harei roya meng kan dahlau hu makna praong dalam di bhap bini Khmer Nam Bo. Gam haong bruk cakrok patagok kinh te, xa hoi, ban Can Tho tuk halei jeng sahaneng kuhria peih ngak siam dom sarak bangsa di Dang saong Karja; bruk praong lac 3 danak dak pakat negar, piah daong buh jien tame ngak mbang cakrok patagok taong abih gah ka urang Khmer. Meng nan, baoh sang urang bangsa Khmer kathaot dak harei dak daok takik, raidiuk mbang ngui hu patagok, jalan sahaneng hadah hadai.

Bruk glut jaleih praong ar kraong Tien, phuong Cao Lãnh, tinh Dong Thap di melam 20 bilan 9, UBND tinh Dong Thap tacei ba dom jabat chuc nang, karja bhum palei pataom tame langyah, caga sumu, piah patrun takik abih bruk khat lahik, padang kalaoh kakei saong caga talei di labik mbuan gaok bala. Brei urang khik iek luac harei melam, oh brei bhap bini rahra tame labik glut jaleih. Dom jabat chuyen mon hu tacei ba pasang iek, duah thau jalan glut jaleih saong labik mbuan rah tabiak bala, samar jak ba bhap bini nao labik karei, abih di nyu nan lac dom baoh sang daok tapen kraong) hu salamat.

Hajan praong dalam melam 21 saong page harei 22 bilan 9 ngak glut jaleih, pacang cakak rilo baoh sang daok di xa Thiện Hưng, tinh Dong Nai, dalam nan hu 4 baoh sang dalam nan hu 17 urang di puk 5, palei 6 ia dauk vin taom dar. Hadei tuk hu thau, gah chuc nang samar ngak bruk, pambuak haong dom don vi chuc nang hu mbaok di labik glut jaleih, panduan ba bhap bini nao labik salamat. Mban tacei ba bol lin xã Thiện Hưng brei hu mbaok piah daong khik brei salamat ka manuac urang jeng yau drap ar di bhap bini, tuk halei jeng caga piah daong meyah ia ribuk rah tabiak.

Trung Quoc daok peih ngak iek dahlau bruk padeih bac brei ka anek saih tieu hoc saong THCS. Tui bruk ba tabiak birau, dom adei anek saih  hu brei padei katut harei di bilan Pataih Xuan saong bilan Thu, dalam tuk kuhria taong abih tukvak bac dalam thun daok khik hu. Bruk ramik pasiam tukvak bac hu caong khin meda rik tame pabak ka bruk nao mai yulit, trun bruk ngak tapa prein di bilan He saong bilan La-ar. Dom urang ilamo gah pato megru mboh kein laba kinh te, bruk pabak harei padeih jeng daong ngak brei siam kajap ka prein yawa saong akaok sahaneng di anek saih.

Dom kapol ngak nong meng 7 taneh ia chau Au pok sap iew Hoi dong Lien minh Chau Au (EU) atah klak bruk ba tabiak ka srak ngak nong anak tal. Bruk nan hu dom kapol nyaom ini ba tabiak lac kayua sarak ngak nong meda ngak patagok jien ngak tabiak kaya mbang, ba tal dom bruk cuang kandah biak ralo ka urang ngak nong saong urang pandar di chau Au.

Yaom lac Apple daok dang anak dom bruk pacang cakak di Nga, min iPhone 17 birau di hãng ini daok ngak pandiak tagok oh ka bhian mboh. Urang kakei blei dahlau iPhone 17 thun ini tagok tal labaih 50% baoh phone gam haong jien blei dut saong thun dahlau. 65% kuhria taong abih harak pambuak blei hu kakei dahlau di dom ban raya di Nga. Baoh iPhone 17 ban 256 GB di Nga hu yaom labaih 27 tal 35 trieu dong, dalam tuk nan mau iPhone 17 Pro Max dung luong 2 TB meda pablei yaom tagok labaih 95 trieu dong.