Cử tri brei thau hatai caong khin 

UV Mentri Chính trị, Bí thư Trung ương Đảng, Akok Mban Nội chính Trung ương Phan Đình Trạc haong dom urang QH mbang XV, tỉnh Lâm Đồng birau hu var taom gaok cử tri di xã Liên Đầm, huyện Di Linh, tỉnh Lâm Đồng piah khan veik bruk ginum biai Mbang ka 3, Quoc hoi mbang XV. Di var taom gaok, cử tri huyen Di Linh mboh lac Mbang nyaom ka 3, QH mbang XV hu rilo salih birau, bruk cambaic laic biak glong saong brei mboh tapa dom mbang tangi sua javap calei dalam nyaom biai. Dom bruk hu cử tri caong khin lac: brei hu sarak daong, brei saoh thẻ BHYT ka sang urang bangsa takik hu radiuk kan kandah; bruk brei harak pandar taneh daok suai damuai; langyah bruk meriak gauk, pathau gauk ka taneh ngak nong, taneh glai oh ka lagaih; bhap bini jeng hu panuac caong khin tỉnh, Trung ương brei pataom tame bruk buh jien ngak jalan mbak nao mai dalam bhum palei pala. 

Hội đồng bhap bini tỉnh Sóc Trăng mbang X bahrau brei tapa Sarak ka bruk buh jien tame ngak 2 danak dak pakhang pasiam labik glut jaleih takai tasik di ban sit Vĩnh Châu, tỉnh Sóc Trăng, haong yaom jien buh tame ngak abih tih lac 143 tỷ đồng. Bruk brei tapa dom danak dak ini hu makna biak praong. Kayua Sóc Trăng hu takai tasik atah, rilo labik tapen tasik daok njauk glut jaleih, brei hu ngak pasiam chip piah pacang caga bala meng langik tasik, pacang khik glai pacang caga. Ini lac dom danak dak dalam bruk buh jien tame ngak piah patagok hạ tầng dalam danak dak pasiam saong patagok KTXH tui Sarak 11 di Rajaei.

Mikva urang ngak nong di Hậu Giang daok tame tuk yuak padai Hè thu avar. Bilan padai ini mikva trun pajaih hu labaih 76.300 ha. Mbiah tal tukvak ini, yuak hu labaih 3.000ha, kuhria rah tapa hu labaih 6,6 tấn sa hecta. Urak ini, urang blei padai tathak di hamu yaom 5.500 -6.000 đồng sa kilo. Kayua jien buh tame ngak hamu glong rilo, abih di nyu lac yaom khak tagok, yau nan ye jien laba mek hu meng padai bilan ini tok hu labaih 20 trieu đồng sa ha.

Sang bac ĐH Nam Cần Thơ bahrau peih pakaak sang iek ruak Đại học Nam Cần Thơ di quận Cái Răng, ban Cần Thơ. Sang iek ruak praong labaih 25.000m2, abih tih yaom jien padang ngak saong blei pandap di tukvak 1 lac labaih 860 tỷ đồng. Meng ini tal thun 2027, sang iek ruak Đại học Nam Cần Thơ brei padang ngak pasiam tukvak 2, hu gac 500 papan ndih iek ruak, haong yaom jien jaik 1.200 tỷ đồng. Ini lac sa dalam dom sang iek ruak hu buh jien tame ngak tui tiêu chuẩn dunya, duh ka bruk iek ruak, taong ruak di mikva TP Cần Thơ saong bhum taneran kraong Cuu Long.

  Di Palei Dam dara padang mbang ngui Phước Đại, huyện Bác Ái, Tỉnh đoàn, Kapol Dam dara Việt Nam tỉnh Ninh Thuận birau peih ngak Harei pataom Ilamu, daoh tamia, padhih the thao dam dara bang sa takik. Di Harei pataom, dom dam dara hu mbaok tame pakacah dom mon the thao saong daoh tamia dom kadha daoh pok meyaom Đảng, Wa Ho, Kapol dam dara, bhum palei, bangsa, taneh ia, urang Viet Nam; dom kadha daoh, kadha tamia ndung bak ilamu bhap bini bangsa takik di huyen Bac Ai.

Ban Chấp hành Trung ương Đảng Cộng sản Trung Quốc brei tabiak dom adat bahrau piah ngak catang jang bruk pasang iek dom bruk ngak mbang pablei salih di dom sang urang ngak praong pakat glaong dalam rajaei. Tui adat bahrau, diuk, pasang saong anek bhik di dom urang ngak praong brei tabiak truh dom bruk ngak mbang pablei salih, meyah oh ngak yau nan, dom urang ngak praong ini brei likau padeih saong taduan tui dom bruk salih labik ngak atau salih bruk ngak, langiu di nan, daok dang anak dom jalan langyah  karei karei.

Piah caga palagaih haong bruk yaom kaom tagok glong yau urak ini di Mỹ, Tổng thống Mỹ Joe Biden iew taong abih dom gah pabak năng lượng di dunya, kuhria gam kapul dom taneh ia pablei menyek tabiak negar langiu saong dom gah ngak tabiak menyek, khí đốt dalam negar, patagok menyek ngak tabiak.Yaom khí đốt di Mỹ tagok meng akaok thun ini min tagok khang jang hadei di tuk rah tabiak bruk mesruh gauk di Ukraine meng puac bilan 2 meng blaoh ngak klaik klaoh bruk pabak xăng menyek di dunya.

Rilo taneh ia châu Âu njauk pandiak bhang khang dalam 2 harei puac adit meng bloh tuk langik pandiak di Biarritz (Prang) tagok tal jaik 43 độ C, di negar Đức lac labaih 38 độ C, dalam tuk khuah glai daok khang tagaok di Tây Ban Nha saong bruk thu lagu, kurang ia di Italya daok ngak brei bilan pala khat lahik. Tui dom chuyên gia, bruk patagok dom mbang pandiak bhang saong thu lagu lac mai meng bruk baoh taneh dak harei dak pandiak tagok./.

Urang lang: M.P & A.Nghiem – 20/6/2022