Page ini 16/3, Akok Mentri Công thương dang tagok javap calei dom tangi sua pak di UBTVQH ka bruk ngak tabiak, blei tame meng negar langiu, pabak xăng menyek, ba tabiak yaom xăng menyek tukvak tapa saong rilo asal kadha  karei. Akok mentri Nguyễn Hồng Diên brei thau, yaom di dunya tagok meng 40 tal 60% min yaom dalam negar bahrau tagok meng 29- 40%, hu panuac tagok Mentri Jien padai saong Rajaei piah trun jien je khik caga lam moi truong. Meyah yaom xăng menyek dunya daok tagok glong, meda brei panuac tagok brei trun veik dom janih thuế, jien karei karei…Ramik abih dom jien je bo yaom xăng daok glong, ye meda pok panuac tagok pakat hu thẩm quyền pandar dom kadung jien an sinh daong ka dom urang kathaot, dom D.N pandar rilo xăng menyek.

Tổng Cty Tân Cảng Sài Gòn brei thau, yaom menyek gam gam tagok ngak brei jien buh tame blei xăng menyek, yaom jien pajeng ba, trun pandap di dom pabah lamnge saong ICD jeng tagok abih. Kayua yau nan ye, meng harei 1-4 Tổng Cty brei ramik veik yaom pajeng container tagok meng 10%-30% duk haong yaom di urak ini. Tui nan, jalan pajeng meng pabah lamnge Đồng Nai mai pabah lamnge Cát Lái tagok 10%, meng dom IDC tal Tân Cảng Cát Lái tagok glaong di abih lac 30%. Di mblang radaih miền Đông, labaih 10 hãng radaih hu khan bruk tagok 20% yaom harak vé saong hu ba tabiak ngak meng puac bilan 3 ini.

Ngak tui bruk nao mai pasang iek, langyah bruk ngak suan “ Urang peih radaih angaok jalan mbak bo dalam rup hu matuy, menyem alak” meng harei 1/3 tal harei 15/3, gah Cảnh sát jalan mbak dalam negar hu lanyah 6 ribau 687 mbang ngak suan kayua urang peih radaih menyum alak, matuy. Ta-eng Cục Cảnh sát jalan mbak taong phat 22 urang dương tính haong matuy angaok dom jalan peih drah samar. Tapa nan taong phạt jien labaih 32 tỷ đồng, mek veik labaih 4 ribau harak adat peih radaih saong khik veik jaik 7 ribau sruh radaih. Dalam dom harei anak tal, gah Cảnh sát jalan mbak daok jhul khang bruk langyah catang dom urang ngak suan.

Phó Thủ tướng Rajaei Lê Minh Khái bahrau mbaoh tangin tame Sarak ka 345 harei 15/3/2022 brei buh tabiak asar pajaih phun pala meng labik khik piah di taneh ia piah daong ka tỉnh Ninh Thuận. Tui nan, Mintri Ngak nong saong Patagok palei pala buh tabiak oh mek jien 258 tấn asar pajaih padai, 5 tấn asar pajaih tangei meng labik khik piah di taneh ia brei ka tỉnh Ninh Thuận piah daong ka rahra pasiam veik dom khat lahik meng bala di langik tasik thun 2021.

Kayua dom urang F0 tagok glong dalam dom harei tapa, UB bhap bini tỉnh Vĩnh Long ba tabiak Sarak patagok pakat jit ruak dalm tỉnh meng pakat 1 tagok pakat 2. Pakat birau ini brei ngak tui meng harei paguh 17/3. Ngan saong pakat huyen dalam tỉnh Vĩnh Long daok sa huyen jit pakat 1 nan lac huyện Bình Tân; 3 huyen, ban sit pakat 2 saong 4 huyen, ban pakat 4. Labaih sa adit  ini, jit ruak Covid-19 di tỉnh Vĩnh Long njom mbak khang gilac veik, kuhria rah tapa yaok harei tỉnh hu 1.000 mbang urang njom ruak birau, dalam nan hu oh lac takik F0 di dom labik pato megru.

Meng harei 1 tal harei 14/3, Trung Quốc hu 15.000 urang njaom bahrau di 28 dalam abih tih 34 tỉnh di taneh ia. Pasak jit urak ini, lac tỉnh Cát Lâm daok di bhum đông bắc. Ban Thượng Hải saong tỉnh Quảng Đông jeng lac dom labik hu dom menuac njaom ruak rilo. Min urang ngak praong gah y tế Trung Quốc ndom lac jit ruak jeng daok pasang iek hu. 95% dom urang njaom ruak di tỉnh Cát Lâm jeng mboh hanjul atau oh mboh hagait karei dalam rup, bahrau hu 6 urang dalam abih tih labaih 8.200 urang tame sang iek ruak di Cát Lâm lac ruak trak tagok.

  Harei 15/3, Hội đồng Bảo an Liên hợp quốc brei tapa Sarak 2625 dui atah tukvak ngak bruk di Phái bộ khik ramik hòa bình di Nam Sudan sa thun tra, mbiah tal harei 15/3/2023. Sarak brei mboh cambaic laic “Bruk ngak di Phái bộ khik ramik hòa bình di Nam Sudan lac jhul patagok bruk ngak praong dalam 3 thun piah pacang tamuh gilac veik bruk mesruh gauk di Nam Sudan, padang bruk salamat suai lavik di bhum palei saong taneh ia, gam daong pasang khik taong abih, hu trach nhiem, tu do, sumu gauk”. Sarak iew taong abih dom gah mesruh gauk jeng yau dom gah pan phao karong karei brei padeih chip bruk cuh gauk angaok taneh Nam Sudan saong tame ndem biai chính trị.

  Tui bruk duah thau hatai sahneng di menuac sia kayua hãng tin ABC Niu (ABC News) saong Ipsos peih ngak hu khan brei thau di harei kabroi mboh lac, hu tal 70% menuac sia brei thau lac urang oh njauk hatai jalan ngak samar drah di karja ong Biden ka bruk lạm phát. Ini lac tanut glaong di abih kuhria meng dahlau mai. Bruk pasang iek brei mboh dreih yau nan, lac 70% dom urang hu tangi sua jeng oh njauk hatai haong karja ong Biden langyah bruk tagok yaom khí đốt. Langiu di nan, 58% dom urang hu tangi sua jeng oh njauk hatai haong jalan langyah di ong ka  pasiam veik kinh tế hadei meng jit praong. Tapa bruk duah thau hatai sahneng menuac sia yau nan, dom chuyên gia taong yaom, ong Biden daok gaok rilo kan kandah angaok jalan nao tal mbang ka 2 ngak Tổng thống./.

Urang lang: M.P & A.Nghiem – 16/32022