Harei kabroi, Akok negar Tô Lâm hu mbaoh tangin tame Harak ka bruk alin pandap di tuk pahadar 77 thun Harei Thương binh – Liệt sĩ (27/7) thun ini. Tui nan, yaom jien pandap 600.000 đồng sa urang urang hu alin ka urang hu buh prein yawa ka cách mạng nan lac: Amaik VNAH daok hu mbang jien daong yaok bilan saong dom urang hu sarak pok brei angan Amaik VNAH dahlau di harei 28/7/2024 min oh ka ngak salah harak gar daong jien yaok bilan; thương binh, urang mbang tui sarak yau thương binh saong dom urang karei. Jien pandap alin 300.000 đồng sa urang buh prein ka cách mạng…

Harei ini, labaih 1 triệu anek saih dalam taneh ia yam tame mbang pakacah tamat THPT thun 2024 meng bruk nao tal dom labik pakacah piah taduan mek bilik pakacah, ngak salah adat, harak gar. Dom anek saih pakacah brei ngak bài pakacah dalam 2 harei lac 27 saong 28/6, hu 3 bài pakacah độc lập Toán, Ngữ văn, Ngoại ngữ saong 1 bài pakacah tổ hợp Khoa học tự nhiên, atau Khoa học xã hội. Tui adat di Mintri Pato Megru, meng mon 2 biar harei ini, dom anek saih mai tal labik pakacah piah taduan bilik pakacah, ngak salah dom adat saong harak gar tame pakacah, pasiam veik dom labaih kurang (meyah hu), hadei di nan, dom anek saih hu pang giám thị brei thau adat pakacah. Thun ini, dom urang pakacah tự do lac jaik 47.000, dom anek saih tut angan oh pakacah sap negar langiu lac jaik 67.000.

Biar harei kabroi, 144 anek saih di huyen kaoh pula Kiên Hải, tỉnh Kiên Giang  hu danak dak  daong prein bilan pakacah ba tame baoh taneh piah pakacah tamat THPT di Ban Rạch Gía. Danak dak kayua Mban Dam dara  Kong an tỉnh Kiên Giang pambuak haong Kong an huyen Kiên Hải, huyện Đoàn Kiên Hải daong prein bilan pakacah ka dom adei. Tapa nan, Mban Dam dara  Kong an tỉnh Kiên Giang  jak ba urang daong 12 paok jien bac saong pandap bac da-a ka dom adei tame pakacah tamat THPT hu raidiuk kan kandah.

Tui Mban Khik ramik danak dak buh jien padang ngak dom jalan mbak TP.HCM, meng harei ini, sa labik jalan atah 500m di danak dak jalan pambuak pagam Trần Quốc Hoàn - Cộng Hoà hu ba tame pandar dahlau piah daong taoh talaih bruk gar jalan di labik ini. Labik jalan bahrau peih praong meng Nguyễn Đức Thuận tal Cộng Hòa, samu haong jalan C12. Ini lac labik jalan puac abih di jalan pambuak pagam Trần Quốc Hoàn - Cộng Hoà. Labik jalan brei radaih peih nduac ini, praong 3-4m, mbaok tuh nhựa. Anak tal, jalan C12 urak ini haong labik jalan peih praong nan, hu ba tame danak dak jalan pambuak, ngak jeng jalan bahrau, praong, nduac samu haong jalan Cộng Hoà.

Tui kuhria mboh dahlau, tal thun 2025, tỉnh Bình Dương hu jaik 43.000 urang ngak bruk di dom D.N dalam saong langiu KCN, urang jakar kong chức, gah bol pan phao karong caong hu sang daok xa hoi. Bruk ini tagok tal 86.000 urang di vaktu 2026-2030. Yau nan,  abih tih urang khin hu sang daok xa hoi di dalam tỉnh Bình Dương lac jaik 130.000 urang. Piah pabak bruk caong hu sang daok xa hoi, tinh Binh Duong kuhria buh jien tame ngak labaih 160.000 baoh sang daok xa hoi, hu chung cư saong sang padang jaik gauk. Dalam nan, labaih 32.000 boah sang hu brei pabah. 

Biar harei kabroi, sruh haoh mai veik di bruk Hằng Nga-6 hu par trun labik caga blaoh di Nội Mông, brei mboh bruk pataom mek pandap meng bhum sup  di Ia bulan ba mai Baoh taneh mbang camereip dalam sajarah anek menuac di Trung Quốc hu jak jeng siam mekre. Hadei di tuk par trun, Chủ tịch Trung Quốc Tập Cận Bình hu payua thư tadhau ayuh. Ong ndom lac, bruk Hằng Nga-6 ba mai dom pandap meng bhum sup di Ia bulan mbang camereip dalam sajarah anek menuac. Ini lac jak jeng praong angaok jalan dak padang taneh ia khang gah langik tasik saong taneh ia khang gah ilamu kong nghe di Trung Quốc.

Anak bruk jien Won di Hàn Quốc saong jien Yên di Nhật Bản trun dut saong jien đô la Mỹ, Akok Mentri jien padai dua taneh ia hu ginum biai duah jalan khik caga jien dalam taneh ia saong sanya brei ngak dom bruk piah khik caga jien Won saong jien Yên. Ini lac yaom trun biar abih di jien Yên kuhria dalam 34 thun tapa, hadei tuk Gilang pariak negar Nhật Bản brei khik tamo sarak jien padai di urak ini. Bruk trun yaom di jien Yên Nhật jeng ngak ka bruk kinh te taneh ia ini trun labik dang.

Mintri ngak nong, ngak glai, ngak ikan di Campuchia bahrau khan lac, jit ruak halak keo bilan thu daok mbak tabiak 15 tỉnh dalam taneh ia saong palai pajoa labaih 23 rabau héc-ta phun pala dom janih. Campuchia daok brei pasang iek dom labik oh ka hu janih halak ini saong brei 250 urang jakar gah ngak nong pakat xã trun daong tapak dom labik njom halak ruak. Meyah urang ngak nong oh caik hatai sangka tui iek saong langyah samar drah, halak sâu keo bilan thu meda palai pajoa dom mblang padai saong phun pala karei tok dalam 2-3 harei saong samar mbak tapa dom labik karei./.