Gam haong labaih 1 trieu anek saih dalam taneh ia, harei ini hu labaih 90.000 anek saih di TP.HCM hu mbaok tame mbang pakacah tamat THPT, dalam nan hu labaih 5.700 anek saih bac tự do, labaih 13.000 anek saih hu miễn pakacah môn ngoại ngữ. TPHCM hu ramik 162 labik pakacah, ngan haong abih tih labaih 3.800 bilik pakacah, jak ba hu labaih 15.900 urang jakar, gru pato, urang pabak dom bruk dalam mbang pakacah. Di xã đảo Thạnh An, huyện Cần Giờ, 24 anek saih hu ba tame mbaok haluk, rami ramik labik daok piah harei ini hu mbaok tame pakacah di dua labik pakacah pak huyện Cần Giờ. Dah page, anek saih pakacah môn Ngữ văn, ngak dalam tukvak 120 minit saong bier harei lac pakacah môn Toán dalam tukvak 90 minit.

Labaih 28 rabau anek saih tal 12 di tỉnh Tiền Giang saong Bến Tre harei ini yam tame harei pakacah tamat THPT camereip abih. Dom harei tapa, dom sang bac hu khan brei thau adat pakacah kayua Mintri Pato Megru patabiak, dalam nan brei thau cambaih dom pandap hu adat ba tame bilik pakacah saong dom pandap pakauk oh brei ba tame brei ka anek saih thau cambaih. Gah pato megru saong gah pambuak tal hu caga tani tanat labik pakacah, menuac iek pakacah, jeng yau dom kuhria caga ka bruk pajeng ba đề thi nao tal dom labik pakacah dalam siam mekre, salamat saong khik kandauk.

Labaih 13.000 anek saih di dalam tỉnh Bình Thuận hu mbaok tame mbang pakacah tamat THPT thun ini. Taeng di huyện đảo Phú Quý, hu 266 anek saih tut angan tame mbang pakacah ngan haong 12 bilik pakacah. Ini lac thun ka 4 tỉnh Bình Thuận peih labik pakacah pak Sang bac THPT Ngô Quyền, huyện pulao Phú Quý, atah mbaok taneh 56 hải lý. Sở Pato magru Bình Thuận pambuak haong dom kapul pambuak tal pajeng kadha pakacah saong ba 35 urang jakar, gru pato ngak bruk pabak ka mbang pakacah meng mbaok taneh tabiak kaoh pulao Phú Quý meng gilai nduac samar.

Harei kabroi, huyện Đồng Phú, tỉnh Bình Phước peih Nyaom roya dom bangsa takik mbang ka IV ngan saong kadha “Dom bangsa jum pataom, patagok kein lagaih, yam tame saong patagok”. Huyện Đồng Phú hu 17 bangsa, hu labaih 100 rabau menuac, dalam nan urang bangsa takik hu jaik 20 rabau menuac, samu 21% menuac dalam huyện. Nhiệm kỳ blaoh, huyện Đồng Phú hu pambuak bruk padang ngak alin brei, ramik ngak pasiam 93 baoh sang, daong salih bruk ngak ka 41 urang, dui điện tal 57 baoh sang, daong brei mesraiy phun jien haong yaom jien jhung lap ka 36 sang, yaok ratuh sang hu daong pandap pang, iek saong dom janih karei tui adat ba tabiak.

Sở Tài nguyên saong Môi trường tỉnh Bà Rịa - Vũng Tàu daok ngak salah harak gar, adat piah ba tabiak to yaom labik taneh praong jaik 1,8ha di ban sit Phú Mỹ hu brei quy hoach padang ngak sang iek ruak da khoa praong 200 lanieng ndih ka urang ruak. Kapul taong yaom daok peih bruk pasang iek yaom, payua ka UBND tỉnh Bà Rịa - Vũng Tàu pasang iek, brei tapa, meng nan meng ba tabiak yaom tuk camriep. Tui kuhria, tukvak to yaom hu peih tabiak meng kreih bilan 7 anak tal.

Dua ứng cử viên dang akaok lac urang daok ngak Tổng thống Mỹ Joe Biden saong urang dahlau daih ngak Tổng thống lac Donald Trump hu mbang ndom biai nao mai tapak camereip abih di melam 27/6 (tui mon Mỹ). Ini lac mbang ndom biai nao mai veik camereip abih kuhria meng thun 2020 di 2 ứng cử viên rilo umo thun abih dalam sajarah  pilih ruah Tổng thống Mỹ. Bruk ndom biai nao nao mai tapak camereip abih  di 2 ứng cử viên Joe Biden saong Donald Trump hu peih tabiak meng mon 9 malam saong dui atah dalam 90 minit di trường quay di hãng tin CNN dalam ban Atlanta bang Georgia.

Tổng cục Hải quan Trung Quốc khan lac meda brei ka baoh durain that di Malaysia mek hu tanut chuan di Trung Quốc hu blei tame negar ini meng harei 24/6. Gah papar sap negar Malaysia ba panuac dom urang dalam gah durain negar ini brei thau, yaom lac hu Trung Quốc brei blei tame, bruk pablei baoh durain tapa Trung Quốc jeng daok cang Mintri Ngak nong Malaysia ba tabiak tacei pato saong ngak tantu cambaih laih harak gar likau pablei tabiak negar langiu.

Nga meda brei pambuak veik jalan pasei pajeng tuai tapak tal Triều Tiên di bilan 7 tal, hadei di 4 thun klaih klaoh kayua jit praong COVID-19. Dom radaih pasei hu nduac meng ban Vladivostok tal cảng Rason di Triều Tiên. Bruk pambuak veik jalan pasei pajeng tuai tal Triều Tiên hu peih tabiak hadei di tuk dua gah mbaoh tangin tame harak pambuak bruk praong abih gah dalam mbang ravang Triều Tiên bahrau ini di Tổng thống Nga Vladimia Putin hadei di 24 thun./.