Dah page ini, dahlau di mbang pakacah môn Ngữ văn di Mbang pakacah tamat THPT, Akaok Mintri Pato magru ong Nguyễn Kim Sơn hu mai pasang iek di labik pakacah Sang bac THPT B Duy Tiên, labik pakacah Sang bac THPT Chuyên Biên Hòa, tỉnh Hà Nam saong pachreih ba anek saih, gru pato di dua labik pakacah ini. Di dua labik pakacah, Akaok Mintri ong Nguyễn Kim Sơn hu pasang iek bilik Hội đồng, dom bilik pakacah, ndem mayai nao mai, pachreih ba dom anek saih saong gru pato daok ngak bruk pak labik pakacah. Akaok Mintri caong lac dom adei khang hatai jia tame rup drei eng, brei mboh lac drei pakacah hu siam di abih.

Gam haong labaih 1 triệu anek saih dalam taneh ia, mesup ini, jaik 8.000 anek saih di tỉnh Đắk Nông tame mbang pakacah tamat THPT 2024. Hu 4 anek saih njauk bala angaok jalan radaih hu dom sa-ai công an pajeng tal bilik pakacah, sa anek saih njauk ruak thủy đậu dahlau di harei pakacah hu brei pakacah di bilik karei. Kadha pakacah môn Ngữ văn hu rilo anek saih taong yaom lac mbiah haong prein, meda hu điểm glaong.

Tui Thứ trưởng, Phó akaok Ủy ban Bangsa amuk Nông Thị Hà, tapa pasang iek, pataom mek khau tin ka bruk ngak mbang kinh te – xa hoi di 53 bangsa takik thun 2024 meda hu ba tabiak dom paka, dom bruk biak njauk jia tame piah daong ka dom jabat Trung ương saong puk palei bhum bangsa takik hu dom taong yaom tantu cambaih laih ka bruk peih ngak dom sarak bangsa. Gam tui di nan jeng likau dom jalan langyah ka bruk cak rok patagok kinh tế - xã hội, abih di nyu nan lac dom sarak ngan haong mikva bangsa takik tukvak 2026-2030; ngak asal piah ka dom pakat ủy, kapul đảng caga pathau khan saong dom văn kiện pabak ka  nyaom roya pakat negar mbang XIV di Ndang, nyaom roya Đảng dom pakat tukvak 2025-2030.

Liên đoàn Lao động TP.HCM bahrau pataom iek veik Bilan ngak ka Salamat, Hacih sa-at thun ini saong pok meyaom 234 “urang ngak naih joi, sahneng duah bahrau” di taong abih dom gah. Dalam nan hu rilo urang ngak daok ranaih chreih chrai sahneng duah jalan ngak bahrau, piah gam khik salamat dalam bruk ngak, gam ba mai kein laba glaong ka labik ngak. Yau ye sa-ai Trần Thanh Toàn, umo 29 thun, urang ngak di Cty TNHH Hoàng Lam, sahneng duah ngak bahrau pambak tui dom kein lagaih hu blaoh pak di labik ngak. Hadei di tuk padang ngak pasiam veik labik saong mbaok mata 3 sang bac đại học dalam ban, hu daong patak pataom jien ngak labaih 133 triệu đồng yaok thun…

Huyện bhum ceik Hàm Thuận Bắc, tỉnh Bình Thuận hu 15 bangsa, dalam nan rilo abih lac urang bangsa K’ho, Cam saong Raglay. Yaok bangsa jeng hu ilamo, adat cambat, tarakun karei. 5 thun tapa, dom jalan ngak di Ndang, sarak di Kanja ka bruk ngak bangsa hu dom pakat, dom gah meng huyện tal puk palei ba tabiak ngak tui, mek hu dom jak jeng praong. Tapa nan, dalam huyện hu 147 urang ngak nong lac urang bangsa takik hu dom pakat pok brei angan lac urang ngak nong ngak mbang pablei salih naih joi. Dom baoh sang kathaot di dalam huyen trun daok 10%.

Mintri Ngoại giao Trung Quốc brei thau, Trung Quốc ieu Hàn Quốc samar ngak brei cambaih laih makna ba tal bruk khuah   bahrau rah tabiak dalam sang mac ngak pin di Hwaseong di taneh ia Hàn Quốc ngak brei 17 urang Trung Quốc matai saong 1 urang Trung Quốc njauk rambus. Urak ini gah Hàn Quốc jeng daok pasang iek, duah thau makna di bala jeng yau bruk matai, lahik. Hàn Quốc jeng hu panuac klah rabha pandik harao tal dom sang di urang gaok bala, saong sanya daong Trung Quốc dalam bruk cứu hộ saong langyah dom bruk patui di nan.

Thủ tướng Ba Lan Donald Tusk bahrau brei thau lac, Ba Lan meda jhul samar jalan ngak kayua jajaei dahlau deih ba tabiak piah padang ngak sa pasak kapar haok praong abih di negar ini. Pasak jalan par nao mai di bhum ini meda pabak ka labaih 40 trieu tuai yaok thun, pambuak jalan pasei nduac samar, piah jhul samar gah kinh tế Ba Lan. Thủ tướng Ba Lan brei thau, gah jalan pasei nduac samar lac sa binah di danak dak meda pambuak haong dom ban praong haong gauk ye oh lac tok haong dom mblang kapar haok atau ban ine. Mblang kapar haok tui kuhria meda peih pabah mbang di thun 2032 ngan haong phun jien buh tame ngak labaih 32,5 tỷ đôla.

Gah pandap mbang saong Ngak nong Liên hợp quốc (FAO) bahrau tabiak panuac brei thau lac taong abih labik di Dải Gaza daok mbuan si laik tame eik lipa khang. Jaik 459 rabau menuac di Gaza (samu 22%) daok jaik laik tame eik lipa, dalam tuk jaik abih menuac sia pak ini daok dang anak bruk kurang pandap mbang biak khang. Bruk nan mai meng mesruh gauk daok rah tabiak saong dom pacang cakak ngan saong dom radaih pajeng pandap ngak pahla tame Gaza. FAO hu panuac ieu daong 40 triệu đô la Mỹ piah brei ka Gaza saong ka Bờ Tây./.