Patui veik mbang nyaom ka 7, harei kabroi, meng hu jaik abih dom urang Quoc hoi yer tangin pachreih tui, Quoc hoi brei tapa Hukum Jalan mbak saong Hukum siam makre, salamat jalan mbak. Anak dom panuac karei di gauk ka khoản 2, paka 9, pambuak tal bruk manyum alak mbia di urang peih radaih, Quoc hoi hu peih bruk yer tangin ka bruk ini. Tapa nan, jaik abih dom urang Quoc hoi njauk gauk lac: pakauk peih radaih di jalan bo dalam darah saong suak yava hu alak mbia.

Harei ini, labaih 1 trieu anek saih dalam taneh ia yam tame harei pakacah ka 2 jeng lac harei puac di mbang pakacah tamat THPT thun 2024. Dalam var pagaiy mesup, dom anek saih pakacah bài Khoa học tự nhiên, atau Khoa học xã hội (KHTN, KHXH), biar harei, pakacah môn Ngoại ngữ. taong abih 3 bài pakacah KHTN, KHXH saong Ngoại ngữ jeng pakacah tui jalan trắc nghiệm. Yaok môn pakacah di bài pakacah gah KHTN, KHXH hu tukvak ngak bài 50 minit.

Thành Đoàn saong Kapul Sinh viên ban Cần Thơ jak ba hu labaih 800 urang halain hatian hu mbaok tame “daong prein bilan pakacah” daong ka labaih 12.800 anek saih pakacah tamat THPT. Mban peih bruk jak ba hu 25.000 kalaok ia, 10.000 hộp sủi, 19.000 paok ahar, labaih 10.000 pok lisei jala pandiak di dom labik pakacah… kuhria tabiak yaom jien abih tih lac labaih 3 tỷ đồng. Langiu di nan, Mban tacei jalan danak dak daok hu pambuak bruk haong dom gah, peih bruk pajeng ba oh mek jien ka dom anek saih biak kan kandah, bhum atah biyah, anek saih jaoh jo, anek saih daok tah labik pakacah...

Harei kabroi di tỉnh Đắk Lắk, Kapul Doanh nhân urang dahlau daih ngak bol lin Việt Nam hu jao 200.000 baoh siphau brei ka 15.600 anek saih tiểu học kan kathaot dalam tỉnh, haong yaom jien jaik 900 triệu đồng. Đắk Lắk lac tỉnh ka 4 di bhum Tây Nguyên hu Kapul Doanh nhân urang dahlau daih ngak bol lin Việt Nam alin hadiah siphau meng danak dak “Sa triệu baoh siphau ka anek saih kan kathaot dom bangsa Tây Nguyên saong tỉnh Bình Phước”, peih ngak dalam 2 thun 2023-2024; brei mboh bruk sangka di dom gah saong di kapul urang dahlau daih ngak bol lin dom pakat brei ka rai ranaih, daong pachreih ba, daong ka dom anek saih hu mbuan lagaih jang dalam bruk bac ta-a di thun bac bahrau.

Dom harei tapa di dalam tỉnh Vĩnh Long hu rilo mbang hajan khang ngak jaoh jaleih padai Hè thu daok caga yuak, tui kuhria khat lahik labaih 8 tỷ đồng. Dom pakat kanja daok daong ka urang ngak nong yuak padai piah patakik dom khat lahik kayua hajan hangin. Dom mblang padai jaoh jaleih kayua hajan pataom rilo di huyện Long Hồ saong sa binah di huyện Mang Thít. Tui Chi cục Pala drak saong khik caga phun pala, mblang padai Hè Thu thun ini di tỉnh Vĩnh Long trun pajaih 36 ribau ha tal urak ini yuak hu labaih 5.400ha, tui kuhria padai yuak hu jaik 6,4 tấn/ha.

Nyaom biai yaok thun dom urang ba akaok nao dahlau mbang ka 15 di Diễn đàn Kinh tế Dunya (daok ieu lac Diễn đàn Davos bilan Hè) peih tabiak di ban Đại Liên, Trung Quốc bahrau ini hu ba tabiak “Pathau khan 10 công nghệ bahrau tagok   dang akaok”. Ini lac dom kong nghe bahrau pambak praong tal dunya di dalam 3-5 thun tal. Dom kong nghe ini pataom tame pandar dom gah yau ye y tế, thông tin, cakrok khang kajap. Dalam nan, pandap “nhiệt đàn hồi” meda ngak brei siam bruk pandar năng lượng saong patrun tanut pandar năng lượng tuk pandiak di dunya tagok jang.

Rajaei Indonesia brei thau lac dom kong ty meng Trung Quốc, Singapore daok kuhria padang ngak dom sang mac jhik manyim pak Indonesia, dalam tuk gah jhik manyim negar ini daok gaok rilo cuang kandah, tavak tavaiy. Ini meda lac sang mac jhik manyim praong abih haong bruk jhik dom janih khan aw ngui cuk cao cấp, tui kuhria, hu pah tal 30.000 urang ngak saong padang dom labik daok ka urang ngak. Urak ini rajaei Indonesia ka oh khan brei thau angan dom cty kuhria buh jien tame gah jhik manyim.

Harei kabroi, angaok jalan meng ban ine Praha di negar Séc tal ban ine Budapest di Hungary, sruh radaih pasei dunya EuroCity ginuh tame sa sruh radaih buýt di gah Tây Nam Slovakia ngak brei takik di nyu 5 urang matai saong 5 urang karei njauk rambus. Tui cảnh sát pak nan, bala rah tabiak hadei di mon 5 biar harei, tui mon pak nan, di canah 4 jalan radaih haong jalan pasei jaik ban sit Nove Zamky di Slovakia. Hadei di ginuh gauk, akaok sruh radaih pasei nyu khuah, daok radaih buýt khut trak. Urang peih radaih pasei njauk pandung kayua pui khuah./.