Akaok negar Nguyen Xuan Phuc pok meyaom trung uy Thai Ngo Hieu 

Akok negar Nguyễn Xuân Phúc birau pok meyaom Trung úy Thái Ngô Hiếu, Jabat Cảnh sát pacang khuah padam khuah saong daong urang gaok bala Công an tỉnh Đồng Nai saong sa-ai Nguyễn Đức Chính, daok di ban sit Thịnh Long, huyện Hải Hậu, tỉnh Nam Định oh huac metai lahik, daong hu rilo urang daok mblung ia dalam dom harei tapa. Akok negar ndom lac, ini biak lac dom bruk khang hatai, oh huac metai lahik piah daong ka urang karei hu bhap bini iek praong. Dom urang oh sahneng hagait tal rup drei piah daong ka urang gaok bala ini dalam bhap bini njauk brei pambak praong sumu piah rilo urang hu pabak hatai jia tame dom bruk siam gheih dalam raidiuk.

Harei pataom Đờn ca tài tử pakat negar mbang ka III saong Harei pataom ahar bhap bini Nam Bộ mbang ka IX - Cần Thơ thun 2022 kayua Mintri Ilamu, Thể thao saong Du lịch pambuak haong UB bhap bini ban Cần Thơ peih tabiak hu tamat  di melam blaoh (11/4). Harei pataom hu caong lac rik daong pok meyaom, khik ramik saong patagok ilamu daoh me-in đờn ca tài tử jeng yau ilamu mbang huak di Việt Nam. Tui nan, padang angan je, yaih khan ilamu phi vật thể daoh me-in Đờn ca Tài tử saong ilamu ngak har bhap bini Nam bộ meng kan yam atah tabiak dunya.

Yaom xăng menyek dunya birau ini daok trun nan ye yaom xăng dalam negar di var ramik veik yaom harei ini jeng meda hu trun. Tui kuhria mboh dahlau, yaom xăng meda trun 1.000 – 1.200 đồng sa lít, menyek diesel trun meng 800 -900 đồng sa lít. Meyah jabat khik iek kaoh jien piah padang kadung jien khik tani tanat yaom xăng menyek yau mbang ramik veik yaom mbang dahlau ye yaom xăng meda trun taki jang labaih 800 -900 đồng sa lít.

Urang pala pa-ok di Đồng Tháp daok khat trak tuk yaom pa-ok trun biar. Pa-ok “cát chu” urak ini yaom 5.000-6.000 đồng sa kg, pa-ok cuah Hòa Lộc yaom 20.000-25.000 đồng sa kg. Ong Trần Văn Trạng - Hợp tác xã Dịch vụ ngak nong Tịnh Thới, ban sit Cao Lãnh brei thau, pa-ok hu pala rilo meng lac piah pablei tabiak negar langiu, abih di nyu lac pablei tapa Trung Quốc. Urak ini, taneh ia ini daok pandar dom adat bahrau ka xuất nhập khẩu ba tal bruk pablei pa-ok di Việt Nam tabiak negar langiu gaok kan kandah, ngak brei yaom pa-ok trun biar.

Tui Cục Cảnh sát jalan mbak, dalam 3 harei padeih Pachit da-a Po Hùng meng harei 9 – 11/4 lac meng harei 9 tal harei 11 bilan 3 tui saka ia bulan, dalam negar hu 81 mbang bala ngaok jalan mbak, ngak brei 37 urang metai, 52 urang njauk rambuac. Dalam nan hu 1 bala angaok jalan biak trak di tỉnh Khánh Hòa ngak brei 3 urang metai.

Ukraine saong Nga njauk gauk brei peih 9 jalan ngak pahla piah ba rahra tabiak truh dom labik gah Timur di Ukraine daok njauk pacang cakak. Dalam tuk nan, rajaei Italia hu caik tabiak 610 triệu euro piah daong dom urang Ukraine mai tal taneh ia ini saong daong jien padai ka rajaei Ukraine. Gah “Di cư” Dunya (IOM) brei thau, langiu dom urang Ukraine tabiak truh taneh ia, jaik 210.000 urang negar langiu daok diukrai, bac megru, ngak bruk di Ukraine jeng tabiak truh taneh ia Đông Âu ini.

Gah Y tế Dunya ( WHO) brei pabak angan virus BA.4 saong BA.5, biến thể phụ birau di biến thể phụ BA.1 di Omicron tame angan dom biến thể brei tui iek piah thau dom biến thể phụ nan meda njom mbak atau njom ruak trak jang ha-oh. Jabat An ninh Y tế Anh lac, biến thể phụ BA.4 hu duah mboh di Nam Phi, Đan Mạch, Botswana, bhum Scotland saong bhum England meng harei 10/1 tal harei 30/3. Dalam tuk nan, taong abih dom mbang urang njom biến thể phụ BA.5 jeng birau hu mboh di Nam Phi

Dom urang jakar ngak praong di Philippines brei thau, kuhria tal melam 11/4, dom menuac metai dalam dom mbang jaleih taneh saong ia dauk ia sua kayua ribuk nhiệt đới Megi tagok tal labaih 25 urang. Ribuk tuh tame Philippines di harei adit (10/4) haong ngin khang 75 km sa tuk, handoh tagok tal 105 km sa tuk. Thun bloh, ribuk Rai nao tapa taneh ia Đông Nam Á ini ngak ka labaih 400 urang metai./.

Urang lang: Ái Nghiêm- Mousaphuong -12/4