Bhap bini, ayut sahabat haong urang lin dalam taneh ia!

Dalam tukvak ginreih salam uan thun bahrau thun Sak Ramaong, akau drut drui lambaok urang pan akaok Đảng, Karja haong Ủy ban Trung ương Mặt trận Negar Việt Nam, likau payua tal bhap bini, ayut sahabat, urang lin dalam taneh ia, haong bhap bini drei daok di negar langiu hatai anit ranam, panuac tadhau ayuh thun bahrau siam mekre di abih. Akau jeng likau payua tal ayut sahabat di dunya, bhap bini dom taneh ia angaok dunya, panuac tadhau ayuh sron mbon, salamat, kaya meda saong haniem phul.

Hadar veik bilan xuân thun sak Saih 1942, angaok báo “Việt Nam Độc Lập”, Chủ tịch Hồ Chí Minh hu vak lac:

Tadhau ayuh taneh ia drei dalam thun ini

Dok meriah patuk katam par dalam ngin!

Thun ini lac thun biak hadah mbaok meta

Panuac tadhau ayuh di Wa thun ini bak 80 thun. Yaom lac sajarah hu yam tapa dom blah bahrau, min dom siam mekre hu meng sajarah bangsa, bruk jum pataom gauk, hatai anit ranam anek menuac, bruk khang hatai, var klaak rup drei brei ka urang karei di bhap bini drei jeng oh tuk halei salih karei.

Thun 2021, dalam dom tukvak kan kandah di abih, kol drei hu mboh rilo thaot binguk mekre, ba drei tame ka bruk praong, ka bol bhap rahra di bhap bini drei: Nan lac dom bác sỹ, y tá, urang lin, urang halan hatian oh huac kan kandah metai lahik di bhum jit ruak, caik veik gah likuk baoh sang, amaik ame taha, anek sit, nan lac dom ong muk taha, ba abih jien patak pataom di drei daong brei kadung jien pacang caga Covid-19; nan lac dom kamuan uranaih, hu cih dom blah rup cih biak mekre, rilo ariya biak gheih, hala thư biak drut drui, brei mboh hatai caong, hatai anit dom y, bác sỹ, jeng yau hatai jia ka prein khang Việt Nam dalam kan kandah di jit praong.

Dalam tukvak ini, hu dom urang anek Việt Nam daok daok di labik akaok pacang jit; dom urang lin harei melam khik ramik sron mbon, salamat, khik caga bhum tapen negar, pulao akaoh atau dom adei sa-ai di rilo bruk ngak, daok kak kajap haong bruk ngak, oh mbang Tết hu haong sang di drei.

Đảng, karja saong bhap bini biak iek praong dom kham merat ngak bruk brei ka bol bhap rahra saong ka menuac sia. Taneh ia oh var dom metai lahik, dom var klaak rup drei di bhap bini, ayut sahabat, biak iek praong hatung hatian pamaong mai taneh ia di bhap bini drei daok di negar langiu saong bruk daong brei meng ayut sahabat dunya.

Mai meng dom kan kandah nan nyu pato pasram ka kol drei hu pabak jang prein khang di bruk jum pataom, sa hatung hatian haong gauk, njauk haong “phẩm chất anh hùng” di ong kaok ong kei drei dalam luac sajarah “mesup pacang ngin rabuk, biar harei caga pandiak bhang”, tapa yaok rabau thun, padang taneh ia saong khik taneh ia.

Tadhau yuh ka yaok baoh sang Việt Nam anit ranam hu dom harei Tết bui sambai, haniem siam saong salamat. Likau tadhau ayuh ka yaok rahra Việt Nam, bhap bini drei thun bahrau Sak Ramaong 2022 sron mbon, khang kajap, jak jeng saong haniem phul.

Likau salam saong Tadhau ayuh thun bahrau !

Urang lang: M.Phuong -1/2/2022