Danak dak  nan piah meyaom dom rai rah urang lin halan hatian,  baoh sang raong urang lin hu buh rilo prein yawa rik daong, pambuak haong dom danak dak dak, chien dich  bilan he  di dama dara Ban raya HCM tapa 30 thun. Danak dak ba lagaih  piah hu taom gaok, bac megru, ndem biai nao mai, jeng yau duah thau hatai sahaneng, klak rabha dom bruk halan hatian di dam dara ban raya dalam tukvak anak tal.

Dalam mbang mai ravang saong ngak bruk haong Jabat Báo chí TW daok di ban raya HCM mesup ini, Bí thư Trung ương Đảng, Akaok mban Tuyên giáo Trung ương Nguyễn Trọng Nghĩa haong kapul ngak bruk hu mai ravang, ngak bruk haong rayo sap ndom Viet Nam daok di ban raya HCM. Di var ngak bruk, ong Nguyễn Trọng Nghĩa brei thau lac biak uan tabuan tuk hu mai ravang jabat rayo sap ndom Viet Nam daok di ban raya HCM di tuk pahadar 78 thun Harei padang Rayo sap ndom Viet Nam (7/9/1945 – 7/9/2023). Meng sajarah 78 thun di Rayo, ong Nguyễn Trọng Nghĩa caong khin Rayo sap ndom VN tuk halei jeng patagok bruk di Nyaom roya Đảng mbang ka XIII. Dalam jalan maong bahrau, Rayo sap ndom Viet Nam lac sa dalam dom jabat báo chí dang akaok di Đảng, Karja, nan ye rayo brei patui jalan thau cambaih dom jalan ngak, sarak di Đảng, hukum di karja ka salih bharau bruk pathau khan saong bruk ngak báo chí. Ong Nguyễn Trọng Nghĩa hu panuac ieu rayo sap ndom VN salih bharau asal kadha, salih bharau jalan ngak di rilo nền tảng piah ngak habar ka sap ndom Việt Nam hu nao tal bhap bini, tal bol bhap rahra, abih di nyu lac bhum atah bayah, bhum tapen negar, tasik, pulao, urang VN drei daok di negar langiu.

Bhian hu iew lac “ Labik praong pala phun pandiuk Xiêm” mbiah tal ini, janih phun ini di kaoh pulao Tân Phú Đông, tỉnh Tiền Giang dak harei dak trun  saong mbuan palahik piah salih tapa pala dom janih  karei. Bruk nan kayua phun taha, njom ruak ralo yau ye: bruk gha, thu dhar, talah dhar saong rup phun. Langiu di nan,  bruk njom ia mbak catang ngak bein phun brei takik baoh, baoh asar siam. Hu tuk abih dalam huyện Tân Phú Đông brei cak rok patagok tal 1.000 ha phun pandiuk Xiêm, yau nan min, jiak di ini, daok oh ka tal 100 ha.

An Giang hu 3 danak dak pacang caga glut jaleih takai kraong njauk ngak samar drah haong yaom jien 397 tỷ đồng, lac takai kraong gah brak kraong Rạch Giá - Long Xuyên; takai kraong Tiền, takai kraong gah Pai kraong Hậu. Taphia bruk glut jaleih takai kraong ye bruk glut jaleih dom kraong, ribaong praong jeng ngak kan kandah tal bruk pala drak saong nao mai jalan ia, jalan radaih, mbuan ba tal metai saong lahik drap ar di bhap bini daok di labik nan. Bruk glut jaleih hu brei thau lac mai meng biến đổi khí hậu; saong kayua ia ndik. Nan ye tỉnh caong hu phun jien praong piah pasiam glut jaleih.

Dalam bilan 8/2023, Bình Phước hu 3 urang ruak uon van di kuman. Klau urang njom ruak uon van di kuman  ye hu 2 urang di huyen Đồng Phú, 1 urang di huyện Bù Đốp. Dom kuman  ruak uon van, dom urang amaik  oh klauk jru vaccine pacang ruak uon van saong ndih tapui anek di sang. Bruk ndih daok,  labik daok tathak, muk mbuai  oh hu bac da-a ngak oh hacih, abih di nyu oh thau sangka pasak hadei ndih tapui tabiak yau nan ye ba tal kuman njom ruak.  Klau kuman ruak uon van patuah hu taong dhit abih ruak. Piah caga ruak nan, brei khik prein yawa ka uranaih, dom palei di tỉnh Bình Phước daok pasang iek, brei duah urang metian oh klauk jru mai klauk abih.

Di nyaom biai pakat glaong dom taneh ia Đông Nam Á (ASEAN) - Trung Quốc mbang ka 26 peih tabiak meng harei 6/9 di Indonesia, dua gah njauk gauk brei kham merat ka bruk cakrok khang kajap, ginup meda di bhum tapa pambuak gauk hu kein laba piah mek hu dom bruk patagok khang kajap saong kayua kein laba jalan ngak mbang di rahra. Dua gah njauk gauk brei jhul khang bruk pambuak gauk dalam dom gah hu kein laba haong gauk, abih di nyu lac 4 gah brei ngak dahlau di Jalan maong ASEAN ka Ấn Độ Dương - Thái Bình Dương, dalam nan dua gah brei tagok bruk pambuak gauk gah jalan tasik, pachreih gauk pambuak bruk gah kinh tế tasik hijao, khik caga tasik saong kaya tasik. 

Dalam 8 bilan tapa, rajaei Braxin daong ka 532 urang njuak chap mek ngak halun samar birau, dalam mbang daong peih pambak praong di dunya piah atah klak dom bruk pablei salih manuac. Dalam nan hu 26 uranaih saong 74 urang njauk urang pablei. Rilo urang karei njauk pablei  ngak bruk biak glaih glar saong suan hukum. Tui LHQ, dom bruk ngak halun samar birau pambuak tal dom bhap bini biak mbuan gaok kan kandah, dom urang njauk ngak bruk suan hukum.  

Công ty East India – angan praong gah jalan diukrai kaya meda di negar Anh hu tabiak mbaok jien ameh piah pahadar aruah amuk patao Elizabeth II. Jien ameh nan hu caik angan lac “The Crown”, lang tapa sap Việt lac Vương miện. "The Crown" hu ngak meng 4kg ameh, gam haong 6.426 asar intan. Dom menuac ngak di East India abih  labaih 1 thun piah ngak “The Crown”. Công ty East India taong yaom jien nan lac jaik 23 triệu USD, kayua chất lượng saong biak kan ngak./.