Akok negar iew dom pakat, dom gah, Đảng bộ, karja tỉnh Trà Vinh patui bruk peih ngak hu siam, sangka tani tanat meng sarak di Karja ngan haong  bruk nan; patui veik bruk pasang iek piah oh klak tapa urang buh prein yawa ngak bruk daong cách mạng bo oh hu mbang tui sraak di Karja, min jeng oh caik bruk sarak daong oh njauk manuac urang.

Di ĐBSCL, yaom padai tagok meng puac bilan Hè Thu 2023 tal urak ini, ba tal bruk dom doanh nghiệp tagok bruk blei abih padai, daong ka urang nong sahanang hatai pala drak. Tui khau tin meng dom Sở Ngak nong saong patagok palei pala, taneh ngak padai thun ini tui kuhria lac labaih 3 triệu 800 ribau ha, rilo jang labaih 13 ribau ha. Ong Lê Thanh Tùng, Phó akaok Cục pala drak, Mintri Ngak nong saong patagok palei pala brei thau, bilan ngak padai thun ini hu rilo siam lagaih kayua urang nong thau pandar siam pajaih, thau pandar dom ilamo kỹ thuật dalam bruk ngak, nan lac jalan ba tal paglaong năng suất, sản lượng di phun pala.

Tỉnh Tiền Giang hu taneh pala durien praong abih di bhum taneran kraong Cuu Long, lac labaih 20.000 ha. Urak ini, phun durien ba jien tame biak glong, labaih 1 tỷ đồng sa hecta sa thun. Thun ini, tui kuhria mboh dahlau ia mbak meda njom tame aval saong njom tame dalam, yau nan ye tỉnh Tiền Giang  hu rilo jalan ngak piah khik caga bein phun durien. Dalam nan, tỉnh kaok tabiak meng kadung jien drei saong di T.Ư daong labaih 1.100 tỷ đồng piah padang ngak 7 brong cakak ia mbak. Urak ini, hu rilo danak dak praong hu ngak salah blaoh, piah pacang ia mbak, khik, caga ia taba di huyen Châu Thành.

UBND TPHCM bahrau brei tapa danak dak cak rok patagok kinh tế - xã hội pambuak haong khik kajap quốc phòng, an ninh xã đảo Thạnh An, huyện Cần Giờ tal thun 2025, pamaong tal thun 2030. Tui nan, tukvak 2021 - 2025, buh tame ngak 7 danak dak haong yaom phun jien abih tih lac labaih 155 tỉ đồng. Langiu di nan, 8 danak dak karei haong yaom phun jien buh tame ngak abih tih lac jaik 153 tỉ đồng mayah TPHCM hu prein parabha phun jien meda hu rami ramik phun jien buh tame dalam tukvak 2021 - 2025. Xã đảo Thạnh An praong labaih 13.100 ha, hu labaih 1.130 baoh sang haong labaih 4.500 rahra. Pak ini hu maong lac labik kan kandah di TPHCM.

UB bhap bini tỉnh Long An birau tabiak bruk samar darah glut jaleih takai kraong Vàm Cỏ Tây di 2 bhum taphia negar. Dom labik glut jaleih khang lac gah takai kraong Vàm  Cỏ Tây, ribaong Cá Rô, ban sit Kiến Tường saong takai ribaong Dương Văn Dương, xã Thủy Tây, huyện Thạnh Hóa. Dom labik glut jaleih  biak mbuan gaok bala, bhum glut jaleih  lih tame dalam meng 3 -5 m. Trun dahlam ala taneh tal ala ribong meng 12 tal 15m. UBND tỉnh Long An iew karja dom puk palei brei hu jalan ngak piah caga. Samar panduan ba  bhap bini dalam bhum daok kan kandah nao tal labik salamat, tani tanat raidiuk di dom baoh sang bhap bini khat lahik kayua glut jaleih ba tal.

Ong Tharman Shanmugaratnam puac panuac taduan bruk ngak di melam 14/9, jeng lac Tổng thống ka 9 di Singapore. Dalam harak ndom puac taduan bruk ngak, Tổng thống Tharman sanya lac ngak bruk haong rajaei, dom kapul nyaom bhap bini, dom kapul ngak pahla saong rahra dalam taneh ia piah pakhang pasiam bruk parilo bangsa di Singapore, gam tui di nan jeng jhul sa xã hội ba drei tame jang, ngak siam dom bruk bo cử tri jao brei.

LHQ birau iew dom urang daong jien di dunya daong labaih 71 trieu dola piah pabak bruk pasiam veik ka yaok rituh ribau urang gaok kan kandah kayua ia ribuk di Liby, dalam labaih 3 bilan anak tal. Tui kuhria di LHQ, hu labaih 885.000 bhap bini Liby gaok kandah tapak kayua ia ribuk  meng blaoh. Urak ini, oh ka thau cambaic hadom urang metai saong njauk rambuac kayua urang jakar pabak brei thau oh ka dreih gauk. Lien ndoan Chữ thập đỏ saong Trăng lưỡi liềm bhong dunya brei thau lac, daok hu 10.000 urang daok lahik.

Kanja Ấn Độ brei thau, takik di nyu 10 uranaih lahik saong 20 adei karei hu daong sraong tagok hadei di tuk sruh gilai pajeng dom adei tabaleik di harei 14/9 di bang Bihar, gah Timur negar ini. Urak ini ka oh thau cambaih makna  ba tal bruk ini. Hadei di bala nan, karja samar drah ba dom urang jakar khik iek bala meng langik tasik saong kapul daong duah urang njauk bala mai tal labik rahtabiak bala piah duah saong daong dom urang njauk bala./.