Harei ini 23/5, Akok negar Võ Văn Thưởng hu var taom gaok saong pok meyaom labaih 100 van dong vien saong urang gru pasram naih gheih di Kapol Thể thao Việt Nam di SEA Games 32 meng blaoh. Di var taom gaok, Akok negar Võ Văn Thưởng lac, Đảng, Karja saong Bhap bini drei tuk halei jeng sangka saong  kuhria ka bruk the thao di taneh ia, dalam nan hu the thao mek hu tanut glong; ba mbuan lagaih  di abih piah dom van dong vien pasram pahat, pakacah oh padeih paglong jak jeng. Akok negar caong khin dom gru pasram van dong vien dom urang karei di Kapol khik hu bruk takre, prein khang di bruk jak jeng mbang ini, patui bruk kham merat, pasram patia, jalan diukrai, chuyen mon piah duh ka dom bruk pakacah tabung glong birau dalam bruk ngak di drei, ngak hadah mbaok meta ka rup drei, ka baoh sang saong ka taneh ia, palei negar.

UBND tỉnh Ninh Thuận bahrau patabiak jalan ngak salih mblang kapar haoh quân sự Thành Sơn jeng mblang kapat haoh pandar gam 2 bruk quân sự - dân sự Thành Sơn saong to yaom pilih ruah gah buh jien tame tui jalan PPP (pambuak bruk công tư). Tui kuhria danak dak meda pok tagok Thủ tướng Rajaei brei ngak dalam quý 2/2023. Dahlau deih, Jabat Rajaei hu khan brei thau panuac tamat di Phó thủ tướng Trần Hồng Hà di mbang nyaom biai pabak quy hoạch Mblang kapar haoh Thành Sơn tame Quy hoạch taong abih gah cak rok patagok dom mblang kapar haoh dalam taneh ia tukvak 2021 - 2030, pamaong tal thun 2050.

Ban raya HCM daok tame bilan hajan, mbuan rah tabiak jit ruak pandiak tabiak darah. Meng akok thun tal ini ban raya hu labaih 7.700 mbang urang ruak pandiak tabiak darah. Tapa ứng dụng “ Y tế trực tuyến”, Sở Y tế  taduan 90 tin nhắn brei thau di bhap bini ka dom labik  dalam bhap bini  hu rilo jamoh, rilo sruh lăng quăng mbuan ba tal jit ruak  SXH. Taong abih dom bruk brei thau nan hu dom jabat chuyen mon saong karja palei langyah samar dalam 48 mong kuhria meng tuk taduan hu panuac khan. Piah pacang jit ruak SXH gah y te  Ban raya HCM iew bhap bini ba tangin tame daong pacang caga jit ruak ini.

Sabuh page ini (23/5) di dalam huyện Châu Thành, tỉnh Hậu Giang  hu bruk glut jaleih biak trak damak. Bruk glut jaleih rahtabiak di sang amuk Từ Thị Bích Thuỷ daok di kraong Mái Dầm, puk Đông Lợi A, xã Đông Phước, atah labaih 40m, dalam tame ar 5m, mbaok taneh lahik labaih 200 mét vuông.  Kuhria meng akaok thun tal urak ini, Hậu Giang hu 22 labik glut jaleih, mbaok taneh lahik jaik 2.420m2. Dom harei jaik di ini,  ia daok bier, nduac khang, dom mbang hajan ngak jeng jalan ia nduac di mbaok gam haong  taneh di takai kraong ribaong daok lamin, talah, meng nan ngak brei takai kraong, ribaong biak mbuan glut jaleih.

Pasak Kuhria mboh dahlau bruk langik tasik pakat negar brei thau, urak ini ia njom mbak di Bhum taneran kraong Cuu Long dak harei dak trun, min daok di tabung glong jang dut saong độ mbak glong abih di bilan 5 thun 2022. Urak ini, ia mbak 4%0 mbuan njom tame dom kraong meng 30 -50 km. Yau nan ye, dom palei njauk hu jalan ngak pacang caga ia mbak njom tame. Tui nan, samar caga padang piah ia  taba tuk ia tasik trun biar, duh ka bruk pala drak saong pandar, saong takik pruh ia piah takik khat lahik dalam pala drak. Ngan haong taneh pala phun mbang baoh hu yaom glong dahlau di tuk pruh ia, bhap bini njauk pasang độ mbak.

Akaok Mintri Trung Quốc hu panuac ieu Mỹ brei klaak chip dom bruk taong phat dom doanh nghiệp, kapul saong urang jakar negar ini, saong ndom lac bruk ngak ini meda ba mbuan lagaih, yah klaak dom paga pacang bruk ginum biai, pambuak gauk di Trung Quốc saong Mỹ. Dahlau di nan, di  nyaom biai pakat glaong dom taneh ia ngak kong cak rok patagok G7, Tổng thống Mỹ Biden brei thau lac njauk hatai  haong bruk di G7 ngan haong Trung Quốc, jalan ngak di G7 lac trun manieng dom bruk mbuan ba tal kan kandah, oh njauk lac neh tabiak atah Trung Quốc, gam haong nan hu  ndom lac talei pambuak gauk di Trung – Mỹ biak samar drah hu pasiam veik.

Dom chuyên gia dịch tễ di Australia brei thau lac, taneh ia ini daok dang anak bruk  mbuan tamuh tabiak jit ruak COVID-19 ka 5. Dalam adit tapa, dom urang njom ruak COVID-19 di taneh ia ini tagok jaik 20%, tapa nan patagok dom urang njom ruak bahrau hu mboh di dalam adit tapa tagok tal labaih 38 ribau urang. Anak bruk ini ngak ka dom chuyên gia dịch tễ di taneh ia ini kuhria mboh dahlau lac, Australia daok tame bruk mbuan njom mbak COVID-19 ka 5. Tui dom chuyên gia y tế, kayua mbang tamuh jit ruak ini meda rahtabiak di tuk Australia yam tame bilan liar, langik laar jang nan ye yaok urang oh njauk iek lap.

Labaih 60 ribau urang tabiak truh Sudan tapa negar jaik taphia Cộng hòa Chad meng di tuk bruk mesruh gauk tamuh tabiak di kreih bilan dahlau. Dalam nan hu 90% lac urang kumei saong uranaih, dom urang ini daok dalam kan kandah, kurang pandap mbang huak, abih di nyu nan lac tukvak bilan hajan daok mai jaik tal. Cộng hòa Chad llac labik mai tal di jaik 700 ribau urang tị nạn, rilo meng lac urang Sudan  nduac tabiak truh  dom bruk mesruh gauk dahlau di nan. Dom urang ini daok hu rilo jang tuk bruk mesuh gauk di dom gah ka oh mboh padeih..