Mai rivang, tadhau ayuh tuk uan Noel thun 2022 di Tòa Giám mục Giáo phận Phan Thiết, ban Phan Thiết, tỉnh Bình Thuận dalam page harei 16/12, Bí thư Trung ương Đảng, Akok  Ủy ban Trung ương Mặt trận Negar Việt Nam Đỗ Văn Chiến caong khin lac tui jalan diukrai “anit Chúa, ranam taneh ia”, Yam muc haong dom urang chức sắc saong bhap bini Kito patuijalan pambuak haong karja, dom gama karei saong dom rahra kham merat ngak tui dom bruk jak ba pakacah gauk anit ranam taneh ia, rik tame patagok kinh te -xa hoi, tani tanat chinh tri, khik kajap quoc phong, an ninh.

 Mesup ini (16/12), UBND tỉnh Kiên Giang peih bruk taduan mek Harak Inem kung ilamu phi vật thể pakat negar "Bruk ngak thủ công meng kan, ilamu bhap bini bruk ngak ia mesin Phú Quốc". Ini lac bruk hu yaom biak praong oh lac ka dom urang ngak bruk nan, bo daok rik daong khik kajap chất lượng, patagok angan je ia mesin Phú Quốc. Anak tal,  UBND tỉnh Kiên Giang daok brei khik ramik, pandar chỉ dẫn địa lý Phú Quốc ka bruk ngak ia mesin, gam haong nan, patagok bruk khik ramik karja, rik daong patagok khang kajap bruk ngak ia mesin meng kan Phú Quốc.

Dalam dom bruk ngak di harei pataom ikan pra mbang ka 1 thun ini, page ini 16/12 di huyen Hồng Ngự rah tabiak “Bruk ngak piah thau jang ka  ikan pra saong pandap OCOP tỉnh Đồng Tháp thun 2022”. Di labik piah thau jang ka ikan pra mbang ini hu labaih 40 D.N parang iek  dom pandap OCOP tỉnh Đồng Tháp saong abih di nyu lac hu rilo D.N parang iek dom pandap ngak meng ikan pra. Harei pataom mbang ini meda lac jalan lagaih ka dom D.N yaih khan angan je, pandap di drei tal urang blei pandar.

BHXHVN bahrau alin hadiah 150 sổ BHXH, dalam nan hu 60 sổ BHXH saong 264 thẻ BHYT ka bhap bini hu raidiuk kan kandah daok di ban Thủ Đức, TPHCM. Ini lac bruk ngak biak siam, ndung bak hatai anit, hatai ngak pahla, klah rabha di sarak BHXH, BHYT dalam bhap bini. Meng akaok thun tal ini, di TP.HCM, dom doanh nghiệp saong urang ngak pahla hu alin hadiah 1.200 sổ BHXH saong jaik 4.000 thẻ BHYT ka bhap bini hu raidiuk kan kandah haong yaom jien labaih 5 tỷ đồng.

Urak ini tỉnh Đồng Nai daok peih bruk padang ngak 80 bruk ngak tabiak pandap tui jalan hữu cơ ngan hoang 1.454 ha phun pala saong 23.720 anek raong. Dom bruk ngak tabiak pandap tui jalan hữu cơ lac urang ngak nong pandar veik pandap klak di nyam patam, kaya nong ngak tabiak di labik sraw haong pandap raong athur; pandar dom che pham vi sinh meng dom D.N hu pambuak bruk saong UB bhap bini tỉnh piah ngak hacih khak hareik meng athur raong, hareik klak tabiak di gah ngak nong…piah ngak jeng khak hữu cơ vi sinh pandar dalam pala drak.   

Triều Tiên hu ngak iek jamriak pandar nhiên liệu rắn prein jhul glaong piah patagok phao ndao bahrau. Bruk ngak iek phao ndao bahrau di Triều Tiên rah tabiak tuk Yam ndok Gah Năng lượng Nguyên tử Dunya Rafael Grossi daok daok di Seoul, ginum biai haong dom urang ngak praong Hàn Quốc piah pacang cakak danak dak hạt nhân di Triều Tiên.  Triều Tiên hu peih rio mbang ngak iek tên lửa dalam thun ini, dalam nan hu 1 tên lửa đạn đạo xuyên lục địa.

Dom urang ngak praong di Lien minh chau Au njauk gauk brei ba tabiak pok taong phạt  ka 9 ngan haong Nga. Dom jalan taong phạt birau meda ba veik jaik 200 menuac urang   saong kapul nyaom di Nga tame angan juk, pakauk oh brei buh jien tame gah kuac mek mỏ di Nga saong dom gah cong nghiep karei, jeng yau pakauk veik dom kênh papar binguk di taneh ia ini. Cagar veik bruk birau abih nan di EU, lambaok  Mentri Ngoại giao Nga kakei lac, Nga samar cagar veik bruk taong phạt ka 9, jeng yau dom bruk ngak halei pamaong tame taneh ia ini.

Takik di abih 2 urang metai saong yaok pluh urang karei daok gar hadei di sa mbang jaleih taneh rah tabiak tuk mesup aval harei 16/12 di bang Selangor, bhum tasik gah pai Malaysia. Gah cứu hộ saong pacang khuah mbang Selangor jeng daok kham duah 51 urang lahik. Jaleih taneh bhian rah tabiak di mbang Selangordo mai meng bruk jah tak glai saong peih taneh bilau. Labik ini urak ini daok dalam bilan hajan min oh hu hajan praong atau megei baoh taneh dalam melam 15/12./.