Bruk jao Giải mbao chi pakat negar mbang ka XVI thun 2021 hu peih tabiak tuk melam 21/6 di Cung Văn hóa lao động hữu nghị Việt - Xô saong hu papar sap tapak di mangaok riyak VOV1 Di Rayo sap ndem Việt Nam, papar binguk tapa di mangaok VTV1 Rayo papar binguk Việt Nam. Hội đồng Giải thuong mbao chi pakat negar hu pasang iek saong buh phieu pilih ruah hu 10 jai A, 22 jai B, 48 jai C, 35 jai Khuyến khích piah jao Giải Báo chí pakat negar mbang ka XVI, thun 2021. Tapa 16 thun peih tabiak, tal urak ini giải daok taduan hu bruk hu mbaok ginup gah, siam makre, chreih chrai di 18 kalup, kapul saong 35 dhar kapul trực thuộc.

Di tuk pahadar 97 thun Harei Báo chí Cách mạng Việt Nam (21/6/1925 – 21/6/2022) dom harei tapa, rilo kapul urang lambaok dom mintri, ban, ngành, kapul nyaom hu mai ravang saong tadhau ayuh Rayo sap ndom VN. Mai ravang saong tadhau ayuh Rayo sap ndom VN, Chuẩn đô đốc Phạm Văn Luyện, Phó Chủ nhiệm Chính trị Hải quân taong yaom glaong dom rik daong di rayo dalam tukvak tapa. Rayo biak caik hatai sangka tal bruk pathau khan di gah hải quân. Tapa riyak langik di Rayo, bhap bini dalam taneh ia hu thau saong thau cambaih jang dom bruk glaih glar, kan kandah di gah hải quân. Abih di nyu lac angaok riyak langik di Rayo sap ndom VN, hu danak dak Tasik pulao Việt Nam biak siam biak lagaih ba mai rilo kein laba ka gah hải quân.

Harei pataom Du lịch tasik Nha Trang ngan haong kadha “Nha Trang, Khánh Hòa - Gaok tal baoh hata” daok hu peih tabiak di ban Nha Trang meng harei 16 - 19/6. Bruk ini pachreih hu 200 gian hàng du lịch, pablei salih hu mbaok tame mayaih khan, parang pablei dom pandap panda, dom dịch vụ du lịch bahrau ngan haong rilo danak dak khuyến mãi pachreih hu rilo manuac; yaih khan pandap mbang Việt Nam saong pandap mbang jalan nao; parang iek dom pandap panda karei di Khánh Hòa saong dom tinh, ban karei di taneh ia. Ngan haong dom bruk siam makre, yau ye lharei pataom bia, harei pataom cà phê..., tỉnh Khánh Hòa caong meda pachreih hu labaih 100 ribau mbang tuai mai rivang iek, duah thau, blei pandar.

Dalam jaik 6 bilan akaok thun 2022, Tiền Giang hu ba labaih 13.000 ha mbaok ia tame raong kaya ikan dom janih pabak ka bruk blei mbang saong pablei tabiak negar langiu, rilo jang labaih 4,3% duk haong tukvak ini thun bloh. Tỉnh jeng cap mek hu jaik 81.000 tấn hadang ikan dom jnaih , rilo jang 9,6% duk haong tukvak ini thun bloh. Njauk caik hatai lac, piah pgalong kein laba bruk raong kaya ikan, Tiền Giang patagok bruk pachreih ngak ikan, pachreih ngak nong, ba brei ilamu, pambak praong dom bruk raong pala kaya ikan hu kein laba yau ye raong thâm canh, raong an toàn sinh học, raong hadang pandar ilamu glaong...

Adit tabung glaong di Festival Huế ngan haong kadha "inem krung ilamo haong bruk mbeik drei tame saong cak rok patagok" hu peih tabiak meng harei 25-30/6 ngan haong 8 danak dak praong saong 28 danak dak pachreih tui, nao gam. Urak ini, hu 8 kapul ilamo negar langiu hu brei thau lac hu mbaok tame Adit tabung glaong Festival Huế 2022. Gam haong nan, 15 kapul ilamo hu angan je dalam taneh ia ngan haong jaik 400 nghệ sĩ, diễn viên meng Sang daoh ilamo meng kan cung đình Huế, kapul nghệ sĩ Hoàng Rob, mBan nhạc pop Chillies, Kalup kapul ilamo Bangsa dom tinh Lào Cai,  Đắk Lắk, Kapul daoh tamia bhap bini Việt Bắc… meda ba mai yaok piluh kadha daoh tamia biak gheih, makre.

Dom urang ilamu y tế Australia daok ieu bhap bini taneh ia ini nao klauk vaccine mbang pabak pacang COVID-19 piah caga biến thể phụ BA.5 di Omicron. Tui pathau khan ka bruk jit ruak COVID-19 di Australia, dom urang njaom biến thể phụ BA.5 di taneh ia ini tagok jang 3 mbang kuhria meng akaok bilan 6, rilo jang dom urang njaom biến thể phụ BA.2, bhian tagok tal glaong abih di bang NSW di bilan 3 meng bloh.

Khí đốt di Moskva meblah labaih 40% taong abih dom janih khí đốt hu pandar di EU di thun bloh, ngak ka gah ini njauk meblah dom bruk pilih ruah janih pandar, tuk yaom xang manjek tagok biak samar saong gah pabak njauk cakak trun di dom taneh ia. Nga jeng pabak 27% dom manjek blei tame di EU saong 46% dang blei tame di bhum ini. Dalam tuk Trung Quốc pandar dang rilo jang dom taneh ia karei di dunya pagam veik, tanut pandar dang di EU trun khang labaih 60% dalam 30 thun tapa.

Sa adit hadei di tuk Thái Lan brei klaak cần sa tabiak truh angan dom janih ma túy meng harei 9/6, anak dom suh sah di bhap bini dalam taneh ia, Rajaei Thái Lan hu tabiak adat bahrau brei takik pandar cần sa. Tui adat bahrau, cần sa oh brei pandar di dom labik hu rilo menuac sia yau ye dom labik pato pakai, labik pablei pandap panda saong dom labik ngak bruk di karja. Rajaei Thái Lan jeng meda brei patagok bruk pasang iek cần sa dalam pandap mbang./.

 Urang lang: Thu Thao & M.P – 18/6/2022