Tui khau tin meng Mintri jalan mbak pajeng ba, Mban Khik ramik danak dak Mỹ Thuận hu payua taong yaom danak dak buh jien tame padang ngak  jalan cao tốc Mỹ An - Cao Lãnh tukvak 1, dalam nan hu likau tagok labaih 1.500 tỷ đồng jien buh tame ngak. Danak dak atah abih tih 26km, labik akaok hu pambuak haong jalan N2 di ban sit Mỹ An, huyện Tháp Mười; labik jhung di canah pak An Bình, huyện Cao Lãnh, tỉnh Đồng Tháp. Dalam tukvak ka 1, danak dak hu 4 làn radaih cao tốc, abih tih yaom jien buh tame ngak lac labaih 6.280 tỷ đồng.

BHXH tỉnh Bình Dương bahrau pambuak bruk haong dom gah pambuak tal, dom doanh nghiệp dalam tỉnh peih bruk alin hadiah thẻ BHYT brei ka urang hu raidiuk kan kandah daok di huyện Bàu Bàng, ngan haong kadha “1 blah thẻ, rabau anit ranam”. Urang pan akaok BHXH Bình Dương taong yaom, dom blah thẻ BHYT hu alin hadiah tuk ini, hu daong klah rabha kan kandah haong bhap bini, daong ka urang kan kandah hu mbang tui dom sarak an sinh yau ye BHYT. Gam haong nan, caong taduan hu rilo jang dom bruk pachreih daong di dom menuac urang, dom doanh nghiệp ba gauk tame daong prein ka an sinh bhap bini.

Di tỉnh Đồng Nai, rilo doanh nghiệp daok kuhria bruk brei ka urang ngak padeih Tết nguyên đán 2023 atah harei, gam tui di nan jeng hu daong radaih pajeng ba urang ngak nao mai dom tinh gah kreih negar, gah barak. Ngan haong dom urang ngak oh nao palei mbang tết, dom doanh nghiệp jeng hu caga peih rilo bruk ma-in harei Tết yau ye: Melam daoh take, labik ma-in siam bai, dom kadha ma-in meng kan, quay số trúng thưởng…; peih dom labik pablei pandap daong yaom, gam haong alin pandap ka urang ngak.

Urak ini dom doanh nghiệp di Tiền Giang blei baoh durian siam piah pablei tapa Trung Quốc haong yaom glaong abih kuhria dalam 5 thun tapa. Baoh durian janih 1 urak ini hu yaom tal 100.00/kg. Yaom glaong min durian thun ini takik baoh nan ye baoh durian oh ginup pablei. Tui yaom tani tanat yau urak ini, yaok ha phun durian, sang bein hu jien mek tame jaik 1 tỷ đồng sa thun. Tỉnh Tiền Giang urak ini hu jaik 16.000 ha phun durian, dang akaok gah taneh pala saong kein laba kinh tế duk haong 11 janih baoh kayau praong di tỉnh.

Thanh tra tỉnh Cà Mau pasang iek sarak daong ka bhap bini gaok kan kandah kayua jit ruak Covid-19 di 3 huyện Năm Căn, Cái Nước, Đầm Dơi mboh ngak suan 7,5 triệu đồng. Dom bruk ngak suan rilo meng lac angan brei tapa di tỉnh oh deih haong dom angan hu taduan mek jien. Tapa pasang iek tapak ye mboh rilo urang oh daok di pak ini, oh taom gaok hu. Harak mbaoh tangin mek jien oh njauk tui mẫu; suan angan, kurang akhar lót; harak biên bản họp kurang mboh tangin di urang hu mbaok, kurang harak ginum biai cambaih laih.

Dalam harei 12/11, yaok pluh rabau menuac tuh tabiak dom jalan praong di ban ine Mexico City di negar Mexico piah brei mboh lac oh njauk hatai haong bruk salih bahrau Viện Bầu cử negar (INE) saong ndom lac jalan ngak ini meda ngak brei tagaok bruk rajaei ba tangin tame bruk bầu cử. Rilo menuac trun jalan nao tapa dom jalan praong haong blah khan ao cuk yau guak sambo mbong patih hu in haroh "Khik caga INE". Min Tổng thống Mexico ndom lac, bruk salih bharau hu daong ka bhap bini pilih ruah tabiak dom urang lambaok naih gheih ka INE saong patrun bruk lih tame di kein laba kinh tế dalam chính trường.

Urang jakar Mỹ brei thau lac hu 6 urang metai dalam bruk kapal pal haoh paoh tame gauk di Labik parang iek kapar haoh di ban Dallas di bang Texas. Urak ini jabat chức năng nengar ini daok kham marat ngak cambaih angan dom urang njauk bala. Dom video hu ba tagok mạng xã hội brei mboh, sruh kapar haoh mesuh nduac samar tame  sruh kapar haoh palao mbom, ngak ka dua sruh samar laik trun mbaok taneh saong khuah biak khang, biak praong.. Dahlau di nan, di thun 2011, hu 11 urang metai di bang Nevada, tuk sa sruh kapar haong ginuh tame  menuac daok tui iek.

Gah Taliban daok khik iek taneh ia Afghanistan bahrau ba tabiak gac adat bahrau pakauk oh brei ngak ngan saong urang kumei, nan lac pakauk oh brei urang kumei Afghanistan nao tal dom labik pasram pahat rup saong labik menei công cộng. Dahlau di nan, Taliban jeng pakauk oh brei urang kumei nao tal mblang bein atau dom nyaom darak. Urang kumei jeng pakauk oh brei tabiak langiu bo oh hu gauk gar lac urang likei nao tui saong brei me-om khan sre akaok tuk tabiak truh sang. Kuhria meng di tuk Taliban meblah mek hu karja di Afghanistan di bilan 8/2021, Taliban brei pakauk urang kumei ngak bruk karja. Taliban jeng brei kreik jaik abih dom sang bac brei ka uraniah kumei./.

Urang lang: Thu Thảo & M. Phương