Tỉnh Đồng Nai harei kabroi hu peih bruk Jao brei harak pok angan Amaik Viet Nam anh hung saong dom pandap meyaom Pakat negar thun 2024. Tapa nan, lambaok Đảng, Karja, Pho akaok negar Võ Thị Ánh Xuân hu alin brei  harak meyaom Amaik Viet Nam anh hung ka gauk gar 3 urang amaik metai lahik blaoh. Dalam mbang ini, tỉnh Đồng Nai hu 12 urang hu alin brei harak pok angan Gru pato naih gheih; 7 kapol nyaom, 14 urang taduan Huân chương Lao động; 13 urang hu taduan Huân chương Khik caga taneh ia saong rilo Cờ, Harak meyaom di Thu tuong Rajaei alin ka dom kapol nyaom saong menuac urang.

Kapul ngak bruk di Tỉnh ủy Kon Tum kayua ong A Pớt, Phó Bí thư Thường trực Tỉnh ủy Kon Tum dang akaok, harei kabroi hu mai ravang saong ngak bruk haong urang pan akaok Tỉnh ủy Trà Vinh ka bruk padang kapul urang jakar daok ranaih, urang jakar kumei saong urang jakar lac urang banghsa takik. Di var ngak bruk, urang pan akaok 2 tỉnh hu khan brei gauk thau ka bruk bangsa takik dalam tinh. Hu thau, tỉnh Kon Tum urak ini hu 25 bangsa hu abih tih jaik 600.000 menuac, dalam nan bangsa takik hu labaih 53%. Tỉnh Trà Vinh hu labaih 1 triệu menuac, 3 bangsa rilo menuac abih lac Yuan, Khmer saong Low, dalam nan, banghsa Khmer hu jaik 32%. Trà Vinh sangka bruk pato pakai, paglaong ilamu, rami ramik, ba pandar urang jakar lac bangsa Khmer.

Dalam tuk chreih chrai bui sambai uan raok Sen Đolta tui ilamo meng kan mai di bhap bini bangsa Khmer, Ban Cần Thơ hu peih bruk taom mbaok dom halau janeng, sư sãi naih gheih saong urang hu angan je dalam bhap bini bangsa Khmer. Di var taom mbaok,  Bí thư Thành ủy Cần Thơ Nguyễn Văn Hiếu taong yaom glong bruk rik daong di dom Hòa thượng, Đại đức, Sư sãi, A char, hu dom urang hu ngan je dalam bhap bini bangsa Khmer ngan hoang bruk patagok di ban Cần Thơ; abih di nyu nan lac dalam raidiuk  jalan sahaneng di bhap bini, khik ramik ilamo, patagok ilamo siam gheih di bangsa.

Mban Khik iek Nam Thành Thánh thất (Cao Đài) di TP Hồ Chí Minh bahrau peih bruk pahadar Harei tabiak agama Cao Đài thun ka 99 tui lich5 di agama ini saong pataom iek veik bruk ngak di agama dalam vaktu 2019-2024. Dom thun tapa, dom urang tui agama, dom đạo hữu Cao Đài Nam Thành Thánh thất tuk halei jeng ngak bruk agama, ngak njauk tui Hukum negar saong dom adat hukum tui jalan “Siam ka dunya, mekre ka agama”. mBan Khik ramik hu tacei pato, jak ba bhap bini tuk halei jeng thau jum pataom, anit ranam gauk, daong ba gauk, kham merat hu mbaok tame dom bruk pakacah gauk anit ranam taneh ia di palei, daong patagok bruk jum pataom abih bnagsa, rik prein tamedak padang saong patagok ban raya.

Meng hatai caong patui jalan caik hatai pang dom caong khin, brei thau jeng yau daong ka urang buh jien tame ngak mbang, urang ngak praong di tỉnh Bà Rịa - Vũng Tàu birau hu var taom mbaok ndem meyai haong jaik 100 doanh nghiep, urang ngak mbang dalam tỉnh. Dahlau di mbang taom gaok nan, tỉnh hu taduan 32 panuac caong di doanh nghiep, urang ngak mbang, hiep hoi. Ong Nguyễn Văn Thọ, Akok UBND tỉnh Bà Rịa – Vũng Tàu caong khin, langiu bruk dom doanh nghiep, urang ngak mbang, dom hiep hoi njauk rik tame dom jalan sahaneng ngak siam, piah meng nan rik tame jhul pakhang  bruk cakrok patagok kinh te, salih birau bruk buh jien tame ngak mbang, lang talaih dom kan kandah kham daong ka dom bruk ngak mbang, palei salih. 

Gilang pariak bhap bini Trung Quốc hu khan brei thau dom sarak pacadu jien padai piah daong kinh tế, darak pasar sang danaoh, taneh riya saong darak pasar chứng khoán. Ini jeng lac mbang camereip abih dalam 10 thun tapa, Trung Quốc cakak trun yaom jien laba saong yaom khik piah bắt buộc dalam sa harei haong gauk. Tui dom chuyên gia, ini lac sarak pacadu jien padai praong hu Trung Quốc ba tabiak dalam 3 thun tapa saong bruk 3 jabat khik ramik gah jien padai, gilang pariak saong chứng khoán ba gauk ngak bruk ini, lac bruk meng kan mai kan mboh.

Mentri Pablei salih Thái Lan harei kabroi brei thau bruk pablei salih tabiak negar langiu di taneh ia ini dalam bilan 8 hu tagok 7% dut saong tukvak ini thun dahlau, labaih 26 tỷ dola, yam tapa bruk caong khin 6%. Yau nan min, bruk jien Baht tagok  khang dalam 30 bilan tapa meda ba tal kan kandah bruk cakrok patagok di bruk pablei salih tabiak negar langiu dom bilan puac thun ini. Mentri Pablei salih Thái Lan patui nan khik veik hu bruk patagok gah pablei salih tabiak negar langiu  dalam thun meng 1 tal 2% saong sumu 290 tỷ USD. Kadha nan lac kayua bruk blei pandap panda meng negar langiu tame  Thái Lan meng dom darak praong daok siam tagok.

Mintri Y tế, Lao động saong Phúc lợi Nhật Bản brei adat ngak saong pablei Donanemab – lac sa janih jru bahrau piah taong ruak Alzheimer kayua hãng jru Mỹ Eli Lilly patagok. Ini lac janih jru ka 2 di Nhật Bản hu brei adat ngak, hadei di jaru Recanemab. Tui dom chuyên gia y tế, Donanemab lac janih jru hu prein tah klaak sa janih protein bất thường hu angan ieu lac “amyloid-β” pataom veik dalam glo akaok, lac makna ba tal ruak Alzheimer./.