Dalam mbang ngak bruk di tỉnh Bình Thuận, biar harei kabroi, kapul ngak bruk di Ủy ban Bangsa kayua ong Hầu A Lềnh, Ủy viên Trung ương Đảng, akaok mintri, Chủ nhiệm Ủy ban Bangsa dang akaok kapul, ngak bruk haong UBND tỉnh Bình Thuận. Di var ngak bruk, tinh caong khin Ủy ban Bangsa pambuak bruk haong Mintri Jien padai rami ramik, pabak bruk buh jien khik ramik, pasang iek, taong yaom khik caga glai kayua Mintri Jien padai brei adat khik ramik, ba pandar saong kuhri kuhria meng kadung jien karja peih ngak dom danak dak bruk ngak negar tukvak 2021-2025. Kapul hu mai ravang, tadhau ayuh Ka tê urang Cam daok di huyện Bắc Bình; pasang iek tapak di huyện Tánh Linh.

Mbang nyaom ngak iek “Quốc hội uranaih” mbang ka 2 hu peih tabiak meng harei 27- 29/9 tal di ban ine Hà Nội. Ini lac labik brei ka uraniah ndom biai, brei mboh hatai caong di drei, gam pasram bruk chính trị piah pabak hatai caong ka uraniah, menuac ngak po harei hadei di taneh ia, brei mboh bruk sangka di dom urang dang akaok Đảng, Karja, Quốc hội saong abih rahra brei ka uraniah saong bruk khik caga, iek glang, pato pakai uraniah. Mbang nyaom ngak iek  “Quốc hội uranaih thun ini, hu mbaok 306 uraniah naih gheih hu angan di  63 tỉnh, ban dalam taneh ia.

Mintri Padang ngak daok ngak dự thảo Sarak di Thủ tướng Rajaei ka bruk daong sang kan kathaot, sang jaik si kan kathaot, sang taik tahak. Tui dự thảo, sang kathaot, jaik kathaot hu daong sang daok min brei pabak dom bruk lac: ka oh hu sang daok atau hu sang daok min lac sang taik tahak atau yaok menuac daok oh ka tal 8m2; Sang daok brei hu padang ngak atau ramik ngak angaok taneh njauk adat hukum, lagaih haong quy hoạch hu pakat hu thẩm quyền pasang iek, brei ngak, oh daok dalam bhum mbuan glut jaleih; oh ka hu daong sang daok meng dom danak dak, sarak daong sang daok di Karja, dom kapul nyaom chính trị - xã hội karei karei

Harei kabroi, Sang bac Phổ thông Bangsa gam bac gam daok THCS - THPT Trà Cú, tỉnh Trà Vinh peih ngak dom bruk brei thau ka danak dak 8 “Bruk Likei kumei samu gauk saong langyah dom bruk samar drah ngan saong urang kumei saong uraniah” Dom bruk ngak nan, dui pachreih hu labaih 600 adei anek saih saong urang jakar, gru pato hu mbaok tame. Thun bac ini, sang bac hu taduan raok 487 anek saih, dalam nan anek saih Khmer hu jaik 98% saong 67% lac anek saih kamei. Gam haong bruk paglaong bruk pato saong bac, sang bac tuk halei jeng sangka padang labik bac megru abih gah saong pato pasram ilamu diukrai ka anek saih tapa dom bruk ngoại khóa saong dom asal kadha pablak tame dalam bài giảng.

UBND tỉnh Đồng Nai bahrau brei taong phat 180 triệu đồng ngak suan gah siam mekre salamat pandap mbang ngan saong Công ty TNHH Sản xuất Thương mại Dịch vụ Thiên Hồng Phúc. Gam haong nan, brei padeih taong abih dom bruk ngak pandap, pablei salih, pabak pandap mbang di công ty dalam tukvak 4 bilan. UBND tỉnh Đồng Nai pacap  Cty bayar abih jien langyah bruk njauk jru mek pandap mbang, khám saong taong ruak ka urang njauk jru mek. Ini lac labik pabak pandap mbang ka Công ty TNHH Dechang Việt Nam, di labik ngak kong Giang Điền, ngak brei jaik 100 urang ngak pandik tung, taglaoh ta-ok, njauk tame sang iek ruak cấp cứu.

Akaok negar Trung Quốc Tập Cận Bình harei kabroi tabiak panuac ieu dom urang ngak dalam gah hàng không vũ trụ taneh ia ini ngak bruk tari taring, jhul samar bruk padang taneh ia khang kadang gah không gian. Panuac ieu di Chủ tịch Trung Quốc Tập Cận Bình hu ba tabiak di mbang taom gaok lambaok dom urang ilamu khoa học saong kỹ sư vũ trụ hu mbaok tame roh duah saong patagok bruk duah thau Ia bulan  Hằng Nga-6 di Đại lễ đường bhap bini daok di ban ine Bắc Kinh. Chủ tịch Tập Cận Bình ndom lac, dalam 75 thun tapa, gah ngak hàng không vũ trụ Trung Quốc hu tagok meng sit tal khang saong cakrok ndung bak sajarah, chất lượng glaong saong yam tagok khang.

Dom urang ngak praong meng 9 taneh ia thành viên gah meraong Liên minh châu Âu (EU) meda pataom tame bruk mek pandar năng lượng ngin langiu tasik saong năng lượng ia harei piah ngak ka bhum Địa Trung Hải jeng pasak năng lượng tái tạo saong pacang cakak kanjah jhak mai meng biến đổi khí hậu. Dom taneh ia EU hu ngak dom danak dak ngak iek năng lượng ngin langiu tasik di bhum ia kaoh. Langiu di nan, daok hu dom bruk gah năng lượng ngak tabiak meng riyak saong dom gah quang điện pambuak. Tây Ban Nha brei thau lac dom taneh ia Địa Trung Hải “meda nao dahlau dalam bruk salih năng lượng” kayua ini lac dom taneh ia mbuan gaok bala abih anak bruk biến đổi khí hậu.

Yaok ratuh menuac ban Munich, bang Bavaria di negar Đức harei kabroi ba gauk cuk khan ao meng kan mekre abih di urang piah hu mbaok tame bruk diễu hành hóa trang hu angan ieu lac Oktoberfest gam haong kapul kèn đồng saong radaih saih. Ini lac sa adat hóa trang yaok thun rah tabiak di ban Munich. Bruk diễu hành hóa trang tuk halei jeng hu peih tabiak di harei som di tuk pataom mbia praong abih dunya. Harei pataom mbia Oktoberfest hu asal meng sa bruk pakacah saih rah tabiak di thun 1810. Bhap bini Bravia peih gilac veik bruk diễu hành hóa trang mbang camereip di thun 1835./.