Tỉnh Sóc Trăng hu labaih 35% bhap bini lac urang bangsa takik, rilo abih di bhum Taneran kraong Cửu Long. Tal urak ini, dalam tỉnh hu 775 Kapol kong nghe so dalam bhap bini di dom palei, puk ngan haong 5.045 urang, daong bhap bini ba kong nghe tame pandar dalam bruk ngak mbang pala drak, patagok kinh te baoh sang. Kapol kong nghe so bhap bini  brei pathau khan, tacei pato, daong bhap bini pandar kong nghe  so yau dom ung dung  VNeID, Bhap  bini Sóc Trăng, Zalo OA Sóc Trăng, STV…Gam haong nan, hu mbaok tame blah web pablei salih điện tử, bayar jien online, oh pandar jien tapak…Langiu di nan, daok daong pathau khan jalan tacei ba, sarak, hukum tal bhap bini.

Harei ini, Ủy ban MTTQ Việt Nam tỉnh Tiền Giang brei thau, bruk jak ba daong brei bhap bini gah brak gaok kan kandah kayua rabuk ka 3 hu dom pakat, dom gah, dom doanh nghiệp, dom agama saong bhap bini abih drei pachreih tui. Tal tukvak ini, tỉnh Tiền Giang jak ba hu labaih 18 tỷ đồng piah daong ka bhap bini gah barak khat lahik kayua rabuk ka 3; brei mboh bruk "hala siam pacang hala tahak”, dom harei tapa, hu biak rilo kapul ngak pahla di tỉnh Tiền Giang hu ba pandap, nao tal labik alin hadiah pandap ka bhap bini bhum kan kandah di dom tỉnh gah brak.

UB bhap bini huyen Krông Ana, tỉnh Đắk Lắk birau peih Nyaom pakacah duah thau hukum ka bruk bangsa. Mbang pakacah hu peih ngak angaok san khau, yaok kapol nyaom pakacah 4 kadha nan lac: Pakacah yaih khan; pakacah trac nghiem; pakacah langyah bruk rah tabiak saong pakacah dalikan. Huyện Krông Ana hu 5 xã, sa ban sit di bhum urang bangsa takik ngan haong 30 bangsa diukrai haong gauk. Dom kapol hu ba ilamo siam gheih di palei tame yaok kadha pakacah, ngak jeng sambo mau ilamo dom bangsa tagok mblang parang iek. Meng sarak, hukum angaok ba-ar hu salih tapa jeng kadha ilamo nghe thuat biak gheih.

Ong Nguyễn Long Biên, Phaok akaok UBND tỉnh Ninh Thuận brei thau, piah khik caga uranaih plaih di mblung ia, UBND tỉnh Ninh Thuận ieu samar pasang iek dom labik padang ia, kraong, danao, labik ia dalam bhian hu mblung ia atau mbuan hu bruk mblung ia piah ramik pasiam, ngak paga pacang piah caga bruk mblung ia meda rah tabiak. Dom sang bac dalam tỉnh Ninh Thuận patagok bruk brei thau, pathau khan ka nek saih thau ilamu piah pacang saong jalan caga plaih di bala mbung ia, abih di nyu lac dalam dom harei hajan ia sua.

Bruk “Pasang ngak jalan pho, khu pho oh hu hareik” hu daong ka khu pho di phuong Long Tâm, TP Bà Rịa, tỉnh Bà Rịa - Vũng Tàu salih abih, hu hacih sa-at siam mekre jang. Dahlau thun 2022, di labik ini lac labik nerak tachrauk. Dom baoh sang bhap bini daok klak hareik tabiak ban glai ban glo, ngak nerak tal mbaok meta do thi. Piah ngak brei hacih sa-at, urang ngak praong di phường Long Tâm hu jak ba dom urang đảng dalam saong langiu phường rik jien blei saong jao hu 1.176 thung buh hareik ka dom baoh sang bhap bini. Phường Long Tâm kham merat tal puac thun ini, 100% baoh sang dalam phường hu thung hareik anak sang.

Công ty khik ramik drap ar hu jabat daok di Mỹ lac Apollo Global Management hu panuac ieu buh 5 tỷ đôla tame labik ngak chip Intel. Dom bruk ginum biai dalam tukvak camereip saong oh ka hu salah abih. Panuac ieu hu ba tabiak dalam tuk Intel gaok rilo kan kandah tuk yaom cổ phiếu trun jaik 60% kuhria meng akaok thun. Akaok thun ini, Apollo brei thau lac meda blei 49% cổ phần dalam sa công ty liên doanh di Intel daok di Ireland haong yaom 11 tỷ đôla. Hãng Intel hu meng 5 pluh thun tapa, bhian lac labik ngak chíp praong abih di dunya.

Birau ini, labaih 5.100 gu dam dara lakhah sa tukvak haong gauk di graul labik dalam negar Trung Quốc. Ini lac ndam lakhah  peih ngak prong prang di Trung Quốc meng dahlau mai ini, hu peih ngak di 50 labik di dom tỉnh, ban saong bhum tự trị di Trung Quốc. Bruk ngak nan piah rik tame ngak mbuan mbiah adat ngak ndam lakhah, atah klak bruk ndok lakhah glaong saong ngak ndam abih rilo jien, pachreih ilamo lakhah saong baoh sang salih birau. Ndam lakhah tui kapol nyaom praong ini pamong tal bruk jak ba trun takik naong trak dalam bruk lakhak, patagok bruk lakhah saong ndih tapui anek dalam dam dara Trung Quốc.

Ấn Độ harei kabroi brei tabiak mbaok 3 hệ thống siêu máy tính Param Rudra, brei mboh takai yam tagok khang dalam kham merat jhul tagok ilamu kong nghe tui bruk Siêu máy tính di taneh ia ini. Dom siêu máy tính hu cakrok dalam taneh ia haong yaom sahui 19 triệu USD piah patagok prein roh duah ilamu di Ấn Độ. Thủ tướng Ấn Độ Narendra Modi ndom lac, meng hệ thống siêu máy tính Param Rudra, Ấn Độ hu takai yam tagok biak khang pamaong tal ngak po dalam gah điện toán saong jhul tagok salih bahrau dalam ilamu kong nghe./.