Page ini, di tỉnh Bình Dương, Thu tuong Phạm Minh Chính hu mbaok di Nyaom biai brei thau Quy hoach vaktu 2021-2030, pamong tal thun 2050 saong pachreih urang buh jien tame ngak mbang di Binh Duong. Brei panuac di labik nan, Thu tuong Phạm Minh Chính  taong yaom, hadei di jaik 30 thun padang veik tỉnh, mbaok meta tỉnh Bình Dương salih birau abih gah,  meng sa tỉnh kathaot urak ini hu jeng tỉnh kong nghiep sami samar, hu prein patagok đô thị drah, hu rilo urang kaya ngak mbang praong buh jien tame dalam saong langiu negar palih ruah  daok veik suai lavik. Tapa nan, tỉnh Bình Dương hu yaik khan bruk cakrok patagok, bruk lagaih patagok di tỉnh  saong jao brei Harak chung nhan  buh jien tame ngak 6 danak dak haong yaom jien abih tih lac 1,5 tỷ USD.  

Uan Sene Dolta di mikva urang bangsa Khmer, UBND ban sit Tịnh Biên, tỉnh An Giang hu nao ravang saong alin hadiah pandap brei ka 24 baoh baha Nam tông Khmer, dom Hòa Thượng, Thượng tọa dalam bhap bini bangsa Khmer; Taom mbaok, alin hadiah pandap ka urang jakar hưu trí hadah krah, urang jakar daok ngak bruk saong urang hu angan je dalam ban sit lac urang bangsa Khmer. Ini jeng lac tuk piah duah thau hatai sahneng di mikva bangsa  Khmer, brei mboh bruk jum pataom gauk di dom bangsa, daong ba gauk cakrok kinh tế - xã hội, khik ramik saong patagok ilamu bangsa.

UB bhap bini TPHCM birau hu harak pathau khan payua Thu tuong Rajaei ka jalan lang talaih dom kan kandah dalam bruk peih ngak danak dak Pacang ia dauk kayua ia ndik di Ban raya HCM hu kuhria tal bruk BĐKH. Danak dak piah pacang ia ndik saong caga dahlau bruk BĐKH ka bhum taneh 570 km2 ngan haong labaih 6,5 trieu bhap bini di bhum taneh gah hanuk kraong Bai Gon saong pasak TPHCM. Danak dak hu padang ngak meng kreh thun 2016 saong tui kuhri, hu ngak salah dalam bilan 4 thun 2018. Min kayua daok rilo kan kandah dalam bruk peih taneh saong phun jien nan ye hu rilo mbang brei kadun veik. Mbiah tal ini, danak dak ngak hu labiah 90%  bruk ba tabiak.

Uan harei Dunya urang praong thun (1/10), dom urang dang akaok tỉnh Bình Phước hu mai ravang, alin pandap ka urang praong thun hu angan je di tại huyện Đồng Phú. Kapul hu mai ravang dom ong muk lac: Nguyễn Thị Chuyển (umo 100 thun), Đỗ Đức Quỳ (umo 90 thun) daok di ban sit Tân Phú; ong Nguyễn Văn Tri (umo 90 thun) saong amuk Nguyễn Thị Hai (umo 100 thun) daok di xã Tân Lập. Di dom labik ravang nan, phaok akaok UBND tỉnh Bình Phước Trần Tuyết Minh hu payua panuac tadhau ayuh saong caong khin dom ong muk kajap kro umo tah, duikrai bui sambai, chreih chrai, patagok bruk “Umo thun glaong, kreih camin hadah”; kham merat hu mbaok tame dom bruk di palei, rik daong dak padang raidiuk ilamu bahrau, lac kreih camin hadah ka menuac sia ngak tui.

Thun bac ini, taong abih lien ndoi dalam Ban Cần Thơ peih ngak hu jak jeng bruk jak ba “ Uranaih Viet Nam pakacah gauk ngak tui 5 kadha Wa Ho pato pakai” ngan haong labaih 150 mbang nao rivang dom labik meriah bhong saong labik inem krung. Langiu di nan, 95.00 mbang urang đoàn  hu mbaok tame danak dak “ Dam dara halan hatian”, rik tame  labaih 10.000 harei ngak bruk  piah ngak dom danak dak dam dara, dalam nan hu bruk pala labaih 159.000 phun kayau hijao, ramik pasiam jalan mbak saong ngak brei hacih sang bac. Bruk jak ba “Anek saih 3 siam” hu pambak praong, ngan haong labaih 80% anek saih THPT mek hu angan meyaom nan.

Tui harak gar di rajaei Campuchia, gah pambuak bruk praong abih di taneh ia ini tuk ini jeng daok lac Hiệp hội dom taneh ia Đông Nam Á (ASEAN). Yaom jien pablei salih nao mai dua gah di Campuchia saong 9 taneh ia daok veik dalam ASEAN nyu tagok jaik 12% dalam thun ini. Việt Nam dang akaok dalam harak angan 5 gah pambuak bruk pablei salih praong abih di Campuchia dalam ASEAN, mangaok Thái Lan, Singapore, Indonesia saong Malaysia. Yaom jien pablei salih nao mai di Việt Nam - Campuchia hu labaih 5 tỷ USD dalam meteh akaok thun ini saong tui kuhria hu mai veik tanut mangaok 10 tỷ USD di puac thun ini.

Bhap bini ban ine Tokyo, Nhật Bản daok biak haduh hatai ka bruk njom nerak halau ia pandar, ngak jhak tal preih yawa bhap bini. Rilo baoh sang  di dom quận Sumida, quận Minato brei thau dalam ia pandar mbau saong mboh karei dreih ia sơn hỗn hợp hu gam asar hữu cơ saong vô cơ angan lac “Thinner”. Jabat khik ia hacih Tokyo tame pasang iek, dut iek halau ia saong ndem lac khaw tin nan njauk biak, gam kakei mikva  brei padeih pandar ia nan plaik jhak ka prein yava.

Ia kraong Ping daok tagok glaong nduac tapa ar ngak ka dom bhum pasak ban Chiang Mai, Thái Lan dauk dalam ia sua. Gah bol bala saong urang halan hatian hu ieu pataom samar drah lam pabak mbao cuah piah ngak jeng daning pacang ia sua, dalam tuk sa mbang ia sua karei daok tuh trun pasak Chiang Mai di melam ini. Karja ban Chiang Mai hu panuac kakei bhap bini paglaong bruk pacang ia sua, ngak paga pacang meng mbao cuah piah paglaong takai kraong, pacang ia sua nduac tame sang./.