Mintri Lao động - Thương binh saong Xã hội bahrau hu harak pathau tagok Akaok negar ka bruk alin pandap ka urang hu buh prein ka cách mạng di tukvak Tết Nguyên đán thun sak tapai 2023. Dalam nan hu likau pandap hu 2 yaom lac: 300.000 đồng sa paok saong 600.000 đồng sa paok. Urak ini dalam taneh ia hu labaih 1 triệu 5 rituh rabau urang hu buh prein ka cach mang hu alin pandap Tết tui dom yaom nan, ngan haong abih tih yaom jien lac labaih 460 tỷ đồng, meng kadung jien kanja.

Tuk Tết thun ini, thun sak tapai 2023, Hội Chữ thập đỏ Việt Nam hu peih “Tết anit ranam” haong bruk daong 1 triệu urang kan kathaot, urang sang kan kandah. Tui kuhria abih tih yaom jien brei ka bruk ngak ini, lac 600 tỷ đồng. Dalam nan, hu dom bruk ngak lac: alin pandap saong tadhau ayuh Tết, “Darak Tết anit ranam,” “labik pablei pandap raok Tết,” peih bruk bui sambai Tết. Langiu di nan, daok hu alin hadiah pandap, bui sambai Tết di 10 tỉnh, ban, daong jien peih ngak danak dak ka 6 tỉnh, ban saong 14 tỉnh hu rilo menuac njauk jru mek klik kruac caong hu daong.

Tal urak ini, hu 17 doanh nghiệp di Cần Thơ tut angan hu mbaok tame pablei khik tani tanat yaom kaom ngan haong yaom di pandap panda daok caga lac labaih 2.236 tỷ đồng, piah pabak ka hatai caong blei di tukvak puac thun ini saong Tết Nguyên đán thun sak tapai 2023. Dom pandap panda daok caga piah rilo meng lac dom nyaom pandap mbang, pandap panda, ahar bánh kẹo, ia manyum, pandap pabak ka ngak mbang, ngak huac ngan haong 16 doanh nghiệp tut angan tame. Taphia di nan, hu 2 doanh nghiệp tut angan tame caga pataik pacang mbaok, ia jru rao tangin pametai anek ruak, bi-ar vệ sinh saong khan aw jhik manyim.

Sa labik ar kraong di xã Định Trung, huyện Bình Đại, tỉnh Bến Tre bahrau njauk glut jaleih praong, atah jaik 150 mét, gar 6 mét, ngak kan kandah ka bruk nao mai, pajeng ba pandap panda di bhap bini. Hu thau, bruk glut jaleih nan lac kayua ia ndik glaong. Min tui bhap bini daok di labik ini brei thau, dahlau daih hu bruk njuk mek cuah jaik takai kraong jeng lac makna ba tal jaleih takai kraong. Tui UBND huyện Bình Đại, bruk ini meyah oh hu ngak pasiam, ye bruk glut jaleih daok rah tabiak, ngak brei khat lahik trak jang, abih di nyu lac meng ini tal jhung thun, ia ndik daok tagok glaong saong ngin yuk khang.

Di puk Thiên Tuế, xã Lại Sơn, huyện Kiên Hải, tỉnh Kiên Giang bahrau peih tabiak Harei ngak adat Nghinh Ông huyện Kiên Hải thun 2022. Dalam harei ini, yaok ratuh sruh gilai, ghe gilai patok anak Đình Thần Nam Hải daok jaik takai tasik daok cang parang iek. Mikva daok di pulao Lại Sơn diukrai rilo meng bruk taong mek ikan nan ye bruk peih ngak adat Nghinh Ông Nam Hải lac sa dalam dom adat hu makna praong abih di dalam thun. Adat lac tukvak piah ka urang taong ikan brei mboh ilamo meng kan, ngan haong hatai caong hangin siam hajan lagaih, bruk saron mbon, salamat tuk tabiak tasik, caong taong mek hu biak rilo ikan, hadang, piah hu raidiuk siam mekre jang.

Harei ini (10/11) di ban ine Phnom Penh, Campuchia hu ngak adat peih mbaok nyaom biai pakat glaong Dom taneh ia Đông Nam Á ASEAN mbang ka 40, 41 saong dom nyaom biai pakat glaong pambuak tal. Ini lac tuk piah ka urang pan akaok dom taneh ia ginum biai ka dom kham merat dak padang ASEAN, patagok bruk jum pataom saong bruk ngak pasak di ASEAN, pasang iek veik saong ba tabiak jalan pambuak bruk di ASEAN haong dom gah pambuak bruk, ginum biai ka rilo bruk praong di bhum saong dunya. Bruk patagok talei pambuak bruk ASEAN haong Mỹ saong Ấn Độ tagok jeng pambuak bruk abih gah jeng hu pataom tame ginum biai.

Akaok negar Trung Quốc Tập Cận Bình meda gam haong Tổng thống Indonesia Joko Widodo maong iek bruk peih nduac iek gilai cao tốc đa năng di mangaok jalan gilai cao tốc camriep di Indonesia tapa online. Jalan cao tốc ini atah abih tih 142 km pambuak Ban ine Jakarta haong Bandung – lac ban hu rilo menuac  dang ka 4 di Indonesia saong jeng lac pasak di tỉnh Tây Java. Danak dak jalan cao tốc Jakarta – Bandung kayua po thầu Trung Quốc padang ngak, lac sa dalam dom danak dak praong pakat negar di rajaei Indonesia.

Sa Cty y sinh di Australia bahrau ini hu ngak iek vaccine caga COVID-19 janih candaih tauk tagok klik menuac, haong hatai caong ba tabiak darak pasar di thun 2025. Vaccine caga COVID-19 janih candaih lac sa candaih katak sit hu tauk tagok mangaok mbaok yaok rabau "vi tiêm" atau jrum klauk biak sit hu vaccine ginup piah njaom tapa mbaok langiu di klik. Urak ini dom candaih tauk nan hu ngak iek mangaok anek naih piah taong yaom. Dom candaih tauk ini meda pandar hu pak di sang./.

Urang lang: Thu Thảo & M. Phương