Tổng Bí thư Nguyễn Phú Trọng hu jao Harak Quyết định di Mintri Chính trị brei bruk ka amuk Trương Thị Mai, Ủy viên Mintri Chính trị, Bí thư Trung ương Đảng, akaok mban Tổ chức di Trung ương ngak Thường trực Ban Bí thư mbang XIII, akaok mban Tổ chức Trung ương. Brei panuac di tuk taduan bruk, amuk Trương Thị Mai brei thau lac oh padeih bac magru, kham marat, pasram megru, paglaong bruk ngak di drei, caik hatai tui pang, patui jalan saong patagok hu dom ilamo di dom urang nao dahlau piah pabak hu bruk dak harei dak glaong di Đảng saong rahra.

Anak bruk jit cúm menuk ada H5N1 rah tabiak srau kadau di Campuchia, dom gah chức năng tỉnh Long An daok brei patagok pasang iek dom bruk nao mai di Long An haong 2 tỉnh: SvayRieng, PrayVeng di Campuchia. Di labik pabah mbang negar Mỹ Quý Tây, huyện Đức Huệ, bol lin biên phòng daok pasang iek catang dom jalan sit, jalan praong. Gam haong nan, daok pambuak bruk catang haong dom gah chức năng di pabah mbang negar, tui iek bruk pablei salih kaya pandap, abih di nyu lac menu ada, cim brim nao mai pabah mbang negar, pasang iek dom urang viêm phổi trak kayua virus di taong abih dom labik y tế, abih di nyu lac dom urang dahlau daih hu nao, mai meng bhum jit.

Urang raong ikan padok di tỉnh Trà Vinh daok chreih chrai, bui sambai kayua yaom ikan padok tagok glaong meng 48.000-50.000 đồng/kg (tui drei praong sit). Tui yaom yau ini, urang raong hu laba 15.000 đồng/kg. dalam huyen Trà Cú hu jaik 45ha mblang danao raong ikan padok, hu labaih 1.500 baoh sang raong. Taong abih sản lượng ikan padok pablei di thun 2022 tui kuhria lac labaih 46.000 tấn, meblah 80% sản lượng ikan padok di dalam tỉnh. Dom baoh sang raong jeng raong 2 vụ sa thun, haong tukvak raong labaih 5 bilan lac cap mek pablei, ikan trak meng 700 gr tal 1,2 kg sa drei. Tui yaom 40.000 đồng/kg, urang raong hu laba glaong.

Dom harei jaik ini, di TP.HCM gam gam hu bruk amaik ame di anek saih taduan hu phone ieu brei thau lac "anek daok cấp cứu di sang iek ruak Chợ Rẫy" saong ieu amaik ame payua jien chip piah blac raih. Melam 6/3, Sở Pato Megru TP.HCM hu harak ieu pasang iek, ramik veik bruk pathau khan, taom gaok di labik pato pakai haong sang di anek saih SV. Gam haong nan, ieu dom labik pato pakai, brei hu jalan pathau khan, tacei pato amaik ame di anek saih, SV, gru pato brei paglaong hatai sangka tuk hu phone ieu mai, duah thau cambaih laih, plaih bruk njauk urang pachot.

Bier harei 6/3, di tổ 8, puk An Hưng, ban sit An Phú, huyện An Phú, tỉnh An Giang hu pui khuah ngak ka 1 urang metai. Hu thau, pui khuah tabiak meng baoh sang ong Nguyễn Văn Sơn hadei di nan khuah tapa sang di amuk Lâm Thị Lang. Hadei di tuk taduan hu panuac khan, Công an huyện An Phú samar drah ba dom kapul saong rahra vil val nan hu mbaok tame padam khuah. Tal labaih maong 5, 35 minit bier harei nan, pacang padam hu. Apui mbang abih 2 baoh sang hu padang ngak meng kayau, tabung tôn. Di tukvak pui khuah, kayua ong Nguyễn Văn Sơn daok njauk ruak tai biến daok dalam sang sa drei,, oh nao hu, oh dang hu nan ye metai dalam pui khuah.   

Triều Tiên tabiak panuac lac patagok hu jamriak công suất glaong pandar ka tên lửa phóng vệ tinh, gam haong nan, daok brei thau lac, jamriak ini meda khik kajap ka bruk ba dom vệ tinh karei tagok langik di anak tal. Phaok yam ndok Jabat patagok Vũ trụ negar Triều Tiên Pak Kyong-su brei thau, Triều Tiên daok peih ngak khang bruk pandar dom jak jeng khoa học công nghệ vũ trụ dalam dom gah ngak nong, ngak ikan, pacang caga bala meng langik tasik…saong daok jhul patagok bruk cakrok abih gah di bruk dak padang chủ nghĩa xã hội. Dom jak jeng ini brei mboh dahlau sa harei hadei hadah hadai ka patagok bruk vũ trụ di Triều Tiên.

Bruk ngak di kapul Taliban ngan haong urang kumei saong uranaih di Afghanistan lac sa bruk ngak biak kanjak jhak, mesruh veik haong anek manuac. Ini lac panuac di Liên hợp quốc dalam sa pathau khan di harei 6/3 di Hội đồng Nhân quyền di Thụy Sỹ. Tui harak pathau khan di Liên hiệp quốc, meng bilan 7 tal bilan 12 thun 2022, Taliban hu ba tabiak dom sarak hu kuhria dahlau saong lac hu ba tabiak piah mek abih quyen anek manuac di urang kumei saong uranaih di Afghanistan, tapa nan piah ba urang tabiak truh raidiuk. Bruk ngak ini ba tal kan kandah suai lavik saong ini lac bruk kanjak jhak di dunya ka bruk kateik geik tal urang kumei saong uranaih.

Takik di abih 11 urang metai saong 50 urang karei lahik dalam mbang jaleih taneh harei kabroi 6/3 di labik Natuna, Indonesia. Tui panuac khan di urang jakar pak nan, menuac metai meda daok hu rilo jang kayua dom labik ini oh ka taom gaok hu abih. Gah chức năng hu panduan ba rahra tabiak truh dom labik mbuan hu bala saong daok duah dom menuac daok lahik. Thaot binguk hu ba tagok rilo mạng xã hội di Indonesia brei mboh, hadei di mbang hajan praong ngak brei glut jaleih taneh, tabung sang njauk ngin yuk par saong kayau patau tabuac gha di rilo labik. Tui kuhria mboh, langik tasik jeng daok jhak dalam dom harei tal./.