Harei 18/1, lambaok Ủy ban Thường vụ Quốc hội, Akaok Quốc hội Vương Đình Huệ hu mbaoh tangin tame harak Pathau khan ka 404 ka bruk peih ngak quyen Akaok negar Cộng hòa xã hội chủ nghĩa Việt Nam. Tui nan, iek tui Hukum negar Cộng hòa xã hội chủ nghĩa Việt Nam; tui Hukum peih bruk Quốc hội ka 57 thun 2014; tui Sarak ka 83 harei 18/1/2023 di mbang nyaom oh caga dahlau mbang ka 3, Quốc hội mbang XV; tui kết luận di Mintri Chính trị ka bruk parabha Ủy viên Trung ương Đảng khik quyen akaok negar Cộng hòa xã hội chủ nghĩa Việt Nam; Ủy ban Thường vụ Quốc hội brei thau lac amuk Võ Thị Ánh Xuân, Phó akaok negar, khik quyen akaok negar Cộng hòa xã hội chủ nghĩa Việt Nam mbiah tal tuk Quốc hội pilih ruah hu akaok negar bahrau. Hukum negar thun 2013 tacei lac Akaok negar dang akaok taneh ia, lambaok ka taneh ia bruk đối nội saong đối ngoại. Daok tuk ka oh hu akaok negar ye Phó akaok negar khik quyen akaok negar mbiah tal tuk Quốc hội pilih ruah hu urang bahrau.

Melam 18/1, urang pan akaok Thành ủy, HĐ bhap bini, UB bhap bini, UBMT negar Việt Nam TP.HCM hu mbaok di var taom mbaok, tadhau ayuh Tết labaih 1.000 đoàn viên công đoàn, urang ngak hu raidiuk kan kandah daok dalam ban raya. Yaok pok yaom 300 rabau đồng saong bao lì xì 1 triệu đồng. Thun 2023 hu rilo siam lagaih pambuak haong dom kan kandah meng bruk di dunya, dom doanh nghiệp gaok kan kandah, jeng ngak kan kandah tal bruk ngak, jien mek tame di urang ngak. Urang pan akaok TP.HCM jeng brei thau veik bruk praong njauk ngak dahlau lac sangka tal urang kan kathaot, urang ngak gaok kan kandah, abih di nyu lac dom mikva urang nao atah palei, daok buh prein yava ngak bruk ka TP.HCM.

Ong Đoàn Tấn Bửu- Phó akaok UBND tỉnh Đồng Tháp brei thau, kapul daong duah urang njauk bala jeng daok kham marat peih ngak dom bruk ba rup tau di ranaih likei Thái Lý Hạo Nam (umo 10 thun) tagok langiu. Urak ini hu dom bruk gaok kan kandah tamuh tabiak, daong duah di dalam mala taneh cuac, dom kapul kham marat ngak habar piah langyah salamat saong takik kan kandah jang dut saong kuhria. Tui kuhria dalam harei 19/1, dom kapul daong duah urang njauk bala meda pataom prein tame ngak salah dom bruk hadei di bruk daong duah tagok, jalan ngak oh salih. Kapul daok di pak labik rahtabiak bala patui veik taoh talaih dom gah piah ngak plo akaok nding ghang bê tông labik tal 3 saong patui veik langyah, kayua rup tau di Hạo Nam daok dalam labik nan. Dom ilamo urak ini daok pataom tame rilo bruk ngak piah ngak habar salamat di abih.

Tập đoàn Điện lực Việt Nam brei thau, dalam dom harei Tết anek sak tapai thun 2023 (meng harei 20/01/2023 tal harei 26/01/2023, lac meng harei 29 Tết tal abih harei 05 bingun Tết), oh brei cakak điện, langiu di bruk cakak piah pasiam veik. Tập đoàn Điện lực Việt Nam saong dom gah pambuak tal hu padang jalan ngak piah khik kajap bruk pabak điện siam mekre, salamat, pacang caga khuah patuh, brei menuac hu mbaok khik iek luac harei melam, caga langyah dom bruk meda rah tabiak gah jalan điện. Dom kapul kham merat pambuak bruk haong dom pakat karja, công an, bol bala di labik, peih dom jalan ngak khik kajap sron mbon, pacang caga khuah patuh ka dom labik điện, jabat ngak bruk di karja, kho pandap... 

Kapul pasang iek bruk caga pandap panda, tani tanat yaom kaom ka darak pasa tết Nguyên đán thun sak tapai 2023 kayua Sở Công Thương Bình Phước par akaok hu brei thau lac: Tal tukvak urak ini, prein blei dom pandap panda tết di rahra mboh tagok min ngan haong bruk pabak ginup, samu di dom doanh nghiệp praong, dom kapul, cửa hàng nan ye yaom kaom jeng daok tani tanat, oh hu bruk kurang pandap panda tết. kayua thun ini, tết Dương lịch saong tết Nguyên đán jaik gauk, nan ye bruk caga pandap hu dom doanh nghiệp, cửa hàng pablei salih peih ngak meng aval. Dom pandap panda caga khik piah dahlau tui kuhria di Sở Công Thương tỉnh Bình Phước, tagok labaih 10-12% dut saong tukvak ini  thun dahlau, pabak hu hatai caong blei di rahra.

Brei panuac dalam mbang họp báo brei thau ka jalan ngak saong jalan tranh cử di Đảng Quyền lực Karja bhap bini pan quyền, Chủ tịch đảng, Phó Thủ tướng Thái Lan- ong Prawit sanya brei tagok phúc lợi xã hội, abih di nyu lac tagok jien daong yaok bilan ka urang hu jen mek tame takik tagok tal 700 baht (samu 490.000 đồng Việt Nam) ka yaok urang. Tui ong Prawit, dom yaom jien daong urak ini oh ginup ka rahra bayar dom jien pandar cai dak harei dak tagok glaong. Rajaei Thái Lan urak ini daok pabak yaom jien daong yaok bilan 300baht sa urang ka rahra hu jien mek tame yaok thun mala 30.000 baht (samu 21 triệu đồng Việt Nam) saong 200 baht sa urang ka dom menuac hu jien mek tame meng 30.000 tal 100.000 baht yaok thun. Jaik 22 triệu rahra Thái Lan daok tut angan likau mbang tui pok jien daong ini.  

Rajaei Indonesia ieu kakei jabat y tế puk palei njauk pasang iek biak catang ka bruk salamat pandap mbang, gam tui di nan jeng jak ba dom dom amaik ame paglaong bruk caik hatai hadei di tuk hu pathau khan ka dom uranaih njauk tame sang iek ruak kayua mbang dom pandap mbang hu ni-tơ lỏng. Dahlau di nan, Mintri Y tế Indonesia harei 11/1 jeng hu panuac pathau khan ka bruk oh salamat pandap mbang tuk mbang dom janih kẹo ini dalam tukvak suai lavik. Pandap mbang ini hu angan di palei ieu lac chiki ngebul daok hu ieu lac “suan yava di magirai” lac janih kẹo hu rilo sambo mau hu phủ khí ni-tơ lỏng. Tuk mbang janih kẹo ini, ranaih meda suak yava hu thak meng cambuai. Ini lac makna ngak ka janih keo ini hu uranaih biak takre. Min, bruk pandar ni-tơ lỏng biak rilo meda ba tal mbaih mbaoh jalan tung pruac, ngak kan kandah tal dom labik dalam tung pruac saong gaok kan kandah di jalan suak yava.

Tapa roh duah bahrau ini di Morning Consult, jabat duah thau bruk pablei salih dunya hu jabat daok di Mỹ, brei mboh lac, urang Ấn Độ maong iek Mỹ lac “mối đe dọa quân sự” praong ka 2, hadei di Trung Quốc. Jaik 43% dalam 1.000 menuac hu tangi sua, khan lac iek Trung Quốc – taneh ia bo Ấn Độ hu bruk meriak gauk meng lavik mai gah jalan tapen negar saong nyu patuh tabiak veik meng thun 2020 – lac mối đe dọa praong abih. Jaik 22% dom menuac hu tangi sua, iek Mỹ lac mối đe dọa an ninh praong ka 2./.