Anak dom panuac ndem biai nao mai ka bruk ba môn Lịch sử lac môn pilih ruah di pakat Trung học phổ thông, Mintri pato magru hu panuac ka bruk ini. Mintri pato magru ndom lac, di tukvak pato magru cơ bản (meng tal 1 tal tal 9), dalam pakat tiểu học saong Trung học cơ sở, abih tih anek saih jeng hu bac sajarah di bangsa Việt Nam ginup abih. Jeng tui Mintri patoo magru, tukvak kuhria ba jalan pato pakai bruk ngak (meng tal 10 tal tal 12), Lịch sử hu rami ramik lac sa môn bac dalam kapul nyaom Khoa học Xã hội. di tukvak ini anek saih njauk bac 5 môn bac pilih ruah dalam 3 nyaom môn bac, dalam nan yaok nyaom njauk pilih ruah takik di nyu lac 1 môn bac. Kayua yau nan ye, môn Lịch sử hu pato di abih tih dom sang bac THPT, njauk khik ginup siam lagaih kapul urang gru pato lịch sử hu blaoh.

Tui Trung tướng Tô Ân Xô, Chánh Văn phòng, urang brei panuac di mintri Công an, urak ni, dom bruk pasot dak harei dak jhak jang, yau : mek angan urang jarka jabat karja, gauk gar urang ngak praong pakat glong piah pasot likau bruk ngak , “chạy chức”, “chạy án”; pasot lac hu pandap payua brei, pasot mek angan  urang ngak di mblang kapan haoh, hải quan, je... ieu urang buh jien pajeng ba, jien je, phí, jien phạt... tame tài khoản di gilang pariak kayua dom urang nan batabiak bloh blah mek; pasot mek angan urang jakar công an, viện kiểm sát, tòa án ieu phone pathau khan ka po thuê bao hu pagam tal dom vụ án, đe dọa, ieu urang njauk pasot payua jien…Trung tướng Tô Ân Xô hu panuac kakei bhap bini paglong hatai sangka tuk taduan hu dom mbang ieu mai meng laik phone cố định, jhui khan brei thau hagait ka rup drei, ka laik phone, labik dok ka urang halei tuk oh ka thau cambaih urang nan.

Sang iek ruak đa khoa hu 700 manieng ndih iek ruak hu yaom jien buh tame ngak abih 1.600 tỷ đồng, saong lac sang iek ruak praong abih hu padang ngak di tỉnh Trà Vinh kuhria meng dahlau mai, bahrau hu peih pakah saong ba tame pandar di harei 24/4. Danak dak hu 25 hạng mục, hu pabak rilo pandap panda bahrau, ginup prein iek ruak saong taong dom janih ruak kan kandah.

Tui Sở ngak nong song patagok palei pala tỉnh Tiền Giang, urak ni , sang bein di pak ni daok kaoh klaak bein phun thanh long. Dalam nan  taeng   huyện Chợ Gạo hu labaih 500 ha phun  thanh long njauk kaoh klaak. Ni lac mblang taneh bein phun hata , hu takik baoh, njauk njom ruak, baoh oh siam. Langiu di nan, nan, dalam sa tuk vak atah meng bloh, labik pablei boh thanh long oh tani tanat  kayua bruk pablei tabiak negar langiu gaok kan kandah.  Hadei di tuk kaoh klaak bein thanh long biak takik urang nong pala veik phun ni  bo salih tapa pala dom janih phun mbang boh karei.

Lễ 30-4 saong 1-5 laik tame tukvak tapung glaong di bilan du lịch, gam tui di nan jeng kayua yaom xăng manyek tagok khang dalam tukvak jaik di ini nan ye dom tour, tuyến “hot” di tukvak ini jeng tagok yaom meng 10%-30%. Yaom dịch vụ tagok pataom tame harak vé kapal haoh, bilik khách sạn, nhà hàng… Min, dom hãng lữ hành brei thau, ngan haong jien ba jalan, peih dom tour tuk halei jeng hu doanh nghiệp khik ramik, oh tagok yaom piah khik tani tanat yaom kaom, tagok chất lượng pandap panda piah daong ka tuai damuai.

Dalam sa harak ndom puac batabiak di bier harei  24/4, Thủ tướng Campuchia Hun Sen brei thau, tong abih rahra Campuchia brei klauk takik di abih 3 mbanng vắc xin pacang Covid-19. Dalam harak nan, Thủ tướng Campuchia Hun Sen langyah lac mbang vaccine pacang  Covid-19 ka  3 piah padang bruk miễn dịch cộng đồng siam jang. Ni lac jalan piah rajaei meda pacadu tong abih dom jalan pacang caga urak ni, yau cuk pataih pacang mbaok, khik atah di gauk; gam song nan dong ka tuk vak peih pabah mbang tong abih ka gah kinh tế-xã hội di taneh ia patagok jang gac .

Dalam harei 24/4, takik di nyu 168 urang metai gam haong 98 urang njauk rambuac dalam bruk taong paoh di Darfur,  gah pai Sudan. Ini lac bruk taong paoh hu manuac metai lahik glaong abih di dalam bhum njauk palai pajoa dalam yaok pilih thun tapa kayua bruk mesuh gauk ini. Dom urang jakar ngak praong brei thau lac dom urang metai meda hu rilo jang.

  Hadei di tuk mboh lac jayah brei ka Tổng thống Prang urak ini, lac ong Emmanul Macron tuk mek hu  58,2% hala phiếu palih ruah  dut song 41,8% di muk  Marine Le Pen, rilo urang pal akaok dunya hu payua panuac tadhau yhut tal  Tổng thống Pháp Ma-crông, brei mboh bruk jum pataom gam song hatai khin pambuak bruk song Prang./.

Urang lang: Thu Thao & H.Pha – 25/4/2022