Mentri Noi vu bahrau hu harak pandar Uy mban bhap bini dom tinh, ban anak meta brei padeih Sarak ramik, padang labik hanh chinh pakat huyen, pakat xa. Mentri Noi vu jeng pandar dom bhum palei anak meta brei padeih bruk neh rabha labik hanh chinh dom pakat; anak meta brei pasang iek, taduan mek harak gar, ban do taneh labik hanh chinh dom pakat (Sarak 513) saong padang bahrau, pasiam, pabak harak gar, ban do taneh labik hanh chinh dom pakat tui Sarak di Uy mban Thuong vu Quoc hoi ka bruk ramik ngan haong yaok labik hanh chinh pakat huyen, pakat xa tukvak 2023 – 2025. (TTXVN) 

Mentri Pato Megru kuhria meng thun 2026 mbang pakacah tamat THPT brei peih ngak samar drah jang dahlau 1-2 adit hadei tuk tamat blaoh bruk bac. Tui Mentri Pato Megru, tukvak tapa labaih 1 bilan brei ka bruk caga ka bruk pakacah dahlau tuk pakacah tamat ye ngak rilo naong trak jien padai haong dom baoh sang oh hu kein lagaih. Bruk peih harei pakacah samar drah jang brei langyah siam bruk bac megru piah oh rah tabiak bruk pato saong bac di langiu.

Langik pandiak, hatai caong mbang menyum li-u rilo tagok ngak ka yaom baoh li-u tagok biak glaong. Urak ini hu rilo po blei li-u di bhum Pei negar hu tagok yaom tagok tal tanut 150.000 dong/12 baoh. Tanut yaom ini glaong jang dut haong tukvak akaok thun. Cagar haong baoh li-u, baoh kruac daok trun yaom khang. Urak ini yaom baoh kruac dalam bein di Vinh Long labaih 2.000 - 3.000 dong/kg. Tui mikva pala baoh karaoh, dom thun ini yaom baoh kruac trun khang nan mikva oh buh jien tame rilo, ngak ka chat luong oh glaong.

Thun 2024, Ban Can Tho hu 4 janih bala, lac jaleih ar kraong, hajan ba tui angin rabuk, hajan patau saong ia dauk ia sua, ia tagok, kuhria mboh ngak khat lahik labaih 20 ty dong. Tui panuac brei thau, thun ini, langik saong ia di Ban can Tho jeng rah tabiak srau kadau, abih di nyu nan lac dalam mbang hajan rabuk. Bilan hajan mai samar drah jag dut haong kuhria rah tapa rilo thun, taong abih hajan glaong jang labaih 5-15%. Anak bruk nan, bruk pacang caga bala saong pacang khik bruk diuk rai, drap ar mbang ngui di rahra hu karja Ban Can Tho maong lac bruk ngak brei hu ngak samar drah.

Dalam bilan thu thun ini, labaih 40 ribau ha padai Dong Xuan saong jaik 19 ribau ha dom bhum pala phun mbang baoh di Bhum taneran kraong Cuu Long njauk kanjah jhak kayua njom ia mbak. Piah pacang caga haong pandiak bhang saong njom ia mbak, dom bhum palei hu peih ngak dom jalan langyah piah pacang khik phun pala. Tui Kuk Kraong ribaong, bilan thu thun ini, labaih 40 ribau ha padai brei salih bilan pala saong tal tukvak ini dom taneh ini jeng daok hu khik kajap karo salamat.

Di Trung Quoc, labaih meteh urang umo praong thun njauk dalah kilo atau lamek bhi, meyah oh hu pasang iek, bruk ini meda tagok labaih 70% dalam thun 2030. Kayua nan Uy mban Y te Negar hu ba tabiak jalan padang veik rilo “bilik pasang iek kilo” di dom labik y te saong pasang iek prein yava, daong grauk urang trun kilo karo salamat saong salih tapa bruk diuk rai siam mekre jang. Bruk ba tabiak dom labik taong ruak lamek bhi hu dui pachreih rilo urang khang hatai jang dalam bruk patrun kilo.

Jabat chuc nang An Do bahrau taong tayah 357 blah web me-in mbia online saong 2.400 tai khoan gilang pariak, yaom kaom jaik 15 trieu USD njauk brei kareik, ngak tantu cambaih laih. Tui Mentri Jien padai An Do, rilo urang danei angan, dalam nan hu cau thu cricket, urang danei angan dalam Bollywood saong dom urang hu danei angan angaok mang xa hoi hu mboh yaih khan ka dom nen tang me-in mbia suan hukum.

Di bang Texas, Mỹ hu taduan labaih 300 urang njauk ruak soi, truh tapa taong abih urang njauk ruak di grauk labik di negar Mỹ dalam thun blaoh. Jabat y te pachreih, kayua bruk mbuan njom pambak glaong di ruak soi, rilo bruk meda rah tabiak veik dom urang ruak bahrau di labik tamuh ruak saong dom bol bhap taphia. Soi lac sa ruak njom pambak glaong, yaok thun ruak ini ngak metai yaok pluh ribau urang dalam dunya.