Tal ini dalam grauk negar hu labaih 123 ribau urang tut angan ka bruk alin mo, tang hadei tuk plang lahik. Tui pasak Dieu phoi negar ka bruk pagam rup pabhap urang menuac, meng akaok thun tal ini, dalam negar hu 21 urang metai glo akaok hu alin tang, hu meteh di bruk ini di sa dalam thun blaoh. Yaom lac dom urang ngak bruk ini dak harei dak tagok min tok pabak hu banah biak sit hatai pagam tang di urang ruak. Dalam tuk nan, yaok harei, Viet Nam hu tal 300 urang metai glo akaok saong labaih 6.000 mo, tang palai.

HĐ bhap bini tinh Ba Ria - Vung Tau mbang VII birau khan tapa dom sarak tacei pato bruk daong danak dak sang daok xa hoi, sang daok di gah bol lin saong danak dak njauk brei buh jien tame ngak dahlau. Dalam nan, jien daong ka dom danak dak  di Côn Đảo lac 80% jien buh tame ngak, di Ban Vung Tau, Phú Mỹ saong Ban Ba Ria hu daong 50% jien buh tame ngak, dom huyen daok veik hu daong 40%. Tui kuhria mboh dahlau thun 2027 tal thun 2030 tinh meda hu 11 danak dak hu daong jien ngak, rik tame peih ngak tal thun 2030 padang ngak jaik 22.000 baoh sang daok xa hoi.

Ban raya Ho Chi Minh kham merat ngak hu  bruk  brei peih radaih ndien jalan Metro (Bến Thành – Tham Lương) ka 2 dalam tukvak 2025-2030.Urak ini mbaok taneh piah padang ngak jalan Metro ka 2 anak meta hu salah blaoh, ha tang di dom sang ga daok hu padang ngak. Jalan Metro ka 2 brei hu padang ngak dalam puac thun ini. Tui quy hoach tal thun 2035, Ban raya HCM brei hu 7 jalan metro haong taaong abih atah 355km, daong patagok kinh te , rik tame bruk patakik gar jalan saong njom nerak alam moi truong.

UB bhap bini tinh Tien Giang birau brei thau ginup asar kadha pok tagok likau brei angan Palei pala birau thun 2024 saong taduan panuac rik tame meng di bhap bini. Piah peih ngak hu Danak dak pakat Negar ka bruk padang ngak palei pala birau meng thun 2011-2024, Tien Giang ja ba hu jaik 168 ribau ti dong. Urak ini dalam tinh hu 8 huyen taduan hu palei pala birau, 2 huyen mek hu angan palei pala ribau paglong. Mbiah tal tukvak ini, Tien Giang mek hu taong abih 8 tanut ka tinh palei pala bahrau.

Di tinh Kon Tum dom urang njauk ruak soi tagok samar drah. Jaik 3 bilan tapa hu 728 urang njauk ruak soi saong medil njauk ruak soi tagok 722 urang dut haong tukvak ini thun blaoh. Ngak bruk jhul khang bruk pathau khan tal dom bhum palei bhum atah bayah, bhum urang bangsa takik, gah y te tinh Kon Tum daok tagok bruk pacang caga jit ruak soi, dalam nan ba tabiak bruk kuhria salah blaoh hu ginup vaccine ka 95% urang daok dalam sarak brei klauk jru caga, di dalam bilan 3 ini.

Dom bruk ramik caga ka mbang nao rivang Nga di urang ngak praong di Trieu Tien Kim Jong-un dalam thun ini daok hu peih ngak. Dalam tuk nan, tui Hãng harak mbao Sputnich di Nga, Akok mentri Ngoại giao Nga Sergey Lavrov jeng hu ba tabiak bruk nao rivang Bình Nhưỡng, piah ginum biai haong Trieu Tien. Urak ini gah Trieu Tien oh ka thau bruk mai rivang nan.

Mentri Y re saong Yitvu nhan sinh Mỹ brei patrun labaih 10.000 bruk ngak grauk tukvak, kareik meteh jabat labik ngak bruk. Meyah hu peih ngak, ini lac takai yam patui veik dalam sarak patakik karja lien bang dalam tukvak ngak bruk di Tong thong Donald Trump. Akaok mentri Y te ndom cambaih laih, mbang patrun ini daong pasiam cau truc kapul piah pataom tame bruk hu makna jeng yau dom bruk bahrau njauk caik dahlau, abih di nyu nan lac bruk pasang iek saong jhul kadun bruk tagok dom ruak man tinh.

Dom urang ilamo Australia khan ka bruk ngak patih kaok karang oh ka bhian mboh di tasik gah Pei taneh ia ini, ngak jhak biak trak tal dom karang  Ningaloo danei angan, atah 300km. Ini lac karang jaik tapen tasik gheih mekre abih di dunya hu di Bein pakat negar Tasik Ningaloo – Ini lac Drap ar dunya hu UNESCO taduan brei angan di thun 2011. Urak ini, bruk ngak patih karang nan daok ngak rilo bruk jhak biak trak tal rilo janih karang karei./.