Di mbang nyaom ndom meyai di urang pan akaok UB Bhap bini Ban raya Ho Chi Minh haong dam dara rah tabiak di page ini 28/3, ong Nguyễn Văn Được, Akaok UB Bhap bini Ban raya Ho Chi Minh ndom lac, dam dara hu hatai caong takre piah rik daong prein ngak ka ban raya patagok, bruk nan jeng lac rik daong prein ngak patagok taneh ia. Mbang nyaom biai harei ini hu pang panuac ndom meyai, hatai caong takre di dam dara haong urang pan akaok ban raya. Dam dara khang hatai, tapak tapaiy khin ndom tabiak hatai caong takre piah urang pan akaok ban raya daong prein haong dam dara. Urang pan akaok ban raya hu caik abih tung tian piah pang.

Ban Can Tho daok pataom tame jhul pakhang bruk jak ba gauk pakacah ngan haong kadha “Daong gau ngak brei abih baoh sang oh daok taik tahak” di Ban saong kham merat ngak brei salah dahlau harei 30/4 meda ngak salah blaoh bruk ngak brei abih baoh sang oh daok taik tahak. Ban raya jak ba hu rilo gah saong ginup jien piah padang sang birau, pasiam veik baoh sang taik tahak ka dom urang hu angan dalam sarak. Mbiah tal ini, karja dom bhum palei hu padang ngak saong ramik pasiam hu taong abih 531 baoh sang  ka urang kathaot, baoh sang jaik kathaot, urang hu buh prein yawa ngak bruk daong cach mang saong ngak hu blaoh jao brei ka 141 baoh sang.

Di tinh Soc Trang, phun jien brei mesraiy tui sarak hu maong lac kein lagaih daong ka rilo baoh sang kathaot, jaik kathaot, uak drei tagok patruh kathaot karo kajap. Meng ngak siam lagaih phun jien brei mesraiy tui sarak bo tal ini hu 14.4000 baoh sang kathaot, brei bruk ngak ka labaih 9.400 urang ngak bruk, daong phun jien buh tame bruk ngak mbang pablei salih ka labaih 44.000 danak baoh sang rahra,… daong biak praong dalam bruk langyah bruk ngak, trun kathaot, paglaong raidiuk rahra di bhum palei.

Hadei labaih 2 thun padang ngak, danak dak tatua Rạch Miễu 2 hu ngak salah labaih 83%  bruk ngak, danak dak daok peih ngak drah samar  piah pambuak pagam tatua talei tuan hu ba tame pandar njauk tuk pahadar harei 30 bilan 4 saong harei 1 bilan 5 anak tal. Danak dak tatua Rạch Miễu 2 pambuak tỉnh Tiền Giang saong tỉnh Bến Tre, atah labaih 17,6 km. Danak dak kuhria abih tih jien buh tame labaih 6.810 ti dong, hu padang ngak di bilan 3 thun 2022, kham merat tal harei 2 bilan 9 thun ini ngak hu blaoh salah.

Kong an tinh An Giang anak meta daok kareik hinh su ngan haong Lê Văn Trường daok di palei Long Thạnh A, phuong Long Thạnh, ban sit Tân Châu, tinh An Giang piah duah thau ka bruk “Pametai urang menuac” . Trường hu medil lac urang hu pambuak tal bruk metai di kamuan K, umo 5 thun lac anek karei di diuk. Harei 27/3, Kong an phuong Long Thạnh taduan hu harak likau cakac rup atau kamuan di ame kamuan K piah ngak cambaih laih bruk metai di kamuan, kayua sa-ai medil lac payo di amaik kamuan pametai blaoh ba nao dan. Tapa bruk pasang iek, Kong an da-a Trường saong Nguyễn Thị Thúy Nguyên (amaik di kamuan K) mai jabat piah ngak bruk. Hadei rilo tukvak tangi sua Trường saong Nguyên meng khan lac hu taong kamuan K ba tal metai.

Mentri Thong nhat Han Quoc khan lac, taneh ia ini kham merat ba mai dalam siam mekre saong samar drah 2 bhap bini Triều Tiên hu duah mboh di labik jaik taphia  negar. Di bilan 3, bol lin Han Quoc duah mboh dua bhap bini Triều Tiên angaok gilai kayau theik ndong di gah meraong negar  tasik Hoàng Hải. Gah Han Quoc  mboh dom urang negar Trieu Tien tapa negar karei oh sahaneng hagait. Tui duah thau tapa rilo gah, dom urang nan oh khin mai veik Han Quoc min Seoul daok kuhria ramik piah dom urang nan gilac veik mai negar.

Uy mban chau Au bahrau ba tabiak jalan pacang caga bruk kan kandah akaok meti, pachreih rahra srap gap dahlau pandap mbang, ia menyum saong pandap njauk hu dalam bruk rah tabiak bala. Ini lac sa banah dalam bruk patagok prein pacang caga haong dom kan kandah praong yau langik salih karei, jit ruak, bruk kan kandah an ninh mang saong bruk mbuan rah tabiak mesruh metak gauk…Tui uy mban chau Au bruk caga oh lac daok ngak ka huac kadha, duh hatai, bo lac bruk ngak piah patakik khat lahik.

Dalam sarak angan dom ban hu radaih pajeng ba duh ka bhap bini siam abih di dunya ini brei mboh, Khu hành chính đặc biệt Hong Kong (Trung Quốc) hu angan dang akaok. Dom janih radaih pajeng ba duh ka bhap bini di Hong Kong biak ralo janih saong lagaih, nan lac radaih ndien, radiah pasei ndien, radaih buyt dua tal, radaih buyt sit, cap talei…Tui harak Tap chi "Time Out" di Anh, hu 98% bhap bini Hong Kong taong yaom ka bruk pajeng ba duh ka bhap bini di ban ini biak siam./.