Labaih 128.000 anek saih mai meng 25 tinh, ban bahrau tapa mbang pakacah taong yaom prein bac mbang ka 1 di Dai hoc Negar Ban raya Ho Chi Minh thun 2025. Dalam mbang pakacah mbang ka 1 ini rilo anek saih brei thau, kadha sua tangi atah, hu rilo ilamo ka rilo gah nan ye oh hu ginup tukvak ngak kadha pakacah. Meng thun 2025, Dai hoc Negar Ban raya Ho Chi Minh tok pabak Harak chung nhan tanut pakacah tui jalan online piah tut angan pilih saong caik takik abih 45% taong abih tanut pilih ruah meng jalan pakacah taong yaom prein bac. Urak ini hu labaih 100 sang bac pandar tanut pakacah mbang ini piah pilih ruah tame dai hoc.

Meng harei 4 tal harei 8/4 anak tal di Ban Can Tho peih ngak  Roya Ahar bhap bini Gah Meraong negar mbang XII. Ngan haong kadha “Khik ramik saong patagok kaya ahar bhap bini Nam Bo”, Roya  ahar thun ini peih ngak 231 labik parang ahar, meng bhum taneran kraong Cuu Long saong dom tinh gah Barak negar, bhum kreh negar, Tay Nguyen. Abih di nyu, roya hu ngak ahar bánh chưng praong abih di Bhum taneran kraong Cuu Long, trak jang 3 kilo, hu 20 urang riak ahar dalam 24 mon piah tuai damuai rivang iek. Tui nan, dom urang nghe nhan patui veik bruk tuh ahar bánh xèo “praong abiak praong” tal 9m, hatai ahar hu rilo ada siem, hadang saong 100 hadang bhong Nha Trang.

Bein phun durian di tinh Tien Giang daok yam tame puac bilan, yaom hu trun kayua hatai caong blei di darak pasar, min jeng daok di tanut glaong. Urak ini, urang ikak kaiy blei haong yaom trun jang dut haong adit dahlau meng 5.000 dong tal 10.000 dong/kg. Yau ye baoh durian pajaih Ri6 yaom kuhria rah tapa meng 50-55 ribau dong/kg, Mon thong hu yaom meng 100-110 ribau dong/kg. Dalam tinh Tien Giang hu labaih 25.500 ha phun durian. Gam haong thanh long, durian daok lac janih baoh kayau daong ka po bein hu jien mek tame glaong dalam bilan thu bilan bhang.

Pasak Pasang iek ruak kik tinh Binh Thuan hu 1 urang metai kayua ruak meruai di xã Hồng Liêm, huyện Hàm Thuận Bắc. Urang likei umo 48 thun  athau raong dalam sang kaik harei 25/1 min oh hu klauk jru pacang caga ruak. Mbiah tal harei 25/3, urang ruak hu ba tame balai y te dalam rup glaih, kan suak yawa, tok suan meng oxy, hu payua tame Sang iek ruak Đa khoa tỉnh Bình Thuận, hadei di nan ba tame Sang iek ruak Nhiet doi TPHCM dut iek mboh ruak meruai. Urang metai di harei 27/3. Meng akaok thun mbiah tal ini, urang metai kayua ruak meruai ka 2 di Binh Thuan. 

Pasak Kuhria langik – tasik negar hu ba tagok khau tin kakei dahlau ka bruk ia ndik di labik tapen tasik gah Meraong, abih di nyu nan lac dom tinh, ban gah Pur yau Ba Ria - Vung Tau, Ban raya Ho Chi Minh, Tien Giang saong dom labik tapen kraong, bhum taneh biar. Ia ndik mbang ini meda tagok tal tanut 4,15-4,2m dalam harei ini jaik tal tanut glaong abih dalam thun. Bruk ini mai meng bruk ia ndik yaok thun yau bhian pagam haong angin khang saong riyak praong angaok tasik. Bruk ia ndik ini rah tabiak njauk haong tuk tame bilan hajan, ngak tagok bruk mbuan gaok ia dauk ia sua dui atah lavik harei.

Gah Y te Dunya ( WHO) birau iew da-a urang daong  8 trieu USD piah daong urang saong pacang caga jit ruak tamuh tamuh di Myanmar dalam 30 harei anak tal. Mbiah tal ini, baoh taneh megei tayun ba tal labaih 1.700 urang metai di Myanmar, 3.400 urang njauk rambuac saong biak rilo urang lahik oh ka duah mboh. Dalam nan, takik abih di nyu 18 urang metai di Thai Lan. Tui bruk yaok kuhria di Jabat Pasang iek Dia chat Mỹ, dom urang metai  di Myanmar daok tagok veik labaih 10.000 urang.

Urak ini, jit ruak soi njom pambak prang tal 20 bang di My, taduan hu 483 urang njauk ruak saong takik abih lac 2 urang metai. Ini lac mbang tamuh ruak trak abih dalam rilo thun tapa di Mỹ. Dom urang ruak dalam 3 bilan akaok thun hu rilo jang dut haong taong abih urang ruak dalam thun blaoh. Dom urang chyen gia kakei dahlau, meyah oh hu jalan pasang iek siam lagaih, jit ruak meda tamuh praong veik tapa dom bang karei saong dui atah tal thun 2026.

Rajaei Mexico birau ba tabiak adat pakauk pablei dom janih kaya mbang hu saradang, limeh saong natri glong di dom sang bac. Urak ini Mexico hu takik abih di nyu lac 7 trieu uranaih dam dara labaih kilo. Tui hukum birau, dom sang bac brei ka anek saih mbang dom pandap mbang saong ia menyum hu ngak tabiak tui jalan pala bhian saong oh tauk huroh kakei ka prein yawa. Meyah ngak suan, sang bac meda njauk taong phạt tagok tal 5.000 USD ( sumu labaih 127 trieu dong), saong jien taong phat  meda tagok dua mbang meyah ngak suan veik.