Meng blaoh, harak mbao hu khan ka padai metai oh bhian mboh di labik jaik jalan Cần Thơ - Cà Mau peih drah samar. Yau ye, mblang hamu padai Dong Xuan di huyen Long Mỹ, tinh Hậu Giang di dua gah jalan peih drah samar  Cần Thơ - Cà Mau daok ngak metai kayua bruk kuac mek cuah ngak jalan. Kayua dua gah jalan peih drah samar hu anek ribong tathuak ia yau nan ye lakhun saong ia mbak sre tame hamu, Pho Thu tuong Trần Hồng Hà caong khin dom jabat karja brei ngak cambaic laic kayua halei ba tal padai di labik taphia jalan peih drah samar Cần Thơ - Cà Mau metai catuah yau nan saong ba tabiak jalan pasiam veik.

Pahadar 66 thun Harei padang gah thuysan Viet Nam, tinh Bạc Liêu birau brei palao yaok trieu drei hadang pajaih tame tasik piah ngak brei parilo kaya dalam ia. Bruk palao pajaih piah caik menek kaya dalam ia lac bruk hu ngak yaok thun di tinh Bạc Liêu piah ngak parilo kaya ia, khik siam alam moi truong tasik saong khik hu bruk kajap kaya dalam ia, tui nan paglong jalan sahaneng  ka bhap bini dalam bruk khik caga, cap mek kaya dalam ia.

Biar harei 2/4, urang jakar tinh Tra Vinh jak ba yaok rituh urang ngak bruk, urang lin, dam dara saong bhap bini pataom tame ngak pasiam veik ar ribong kraong njauk glut jaleih di labik ini, kayua ia ndik di melam harei 1 bilan 4. Pasak Kuhria mboh dahlau langik tasik pakat negar khan lac, tapen  tasik  Meraong negar daok dalam tuk ia ndik tagok glong. Ia ndik  meda ngak dauk labik dhaong biar; abih di nyu gam hu hangin khang ba tal khut drap ar, phun pala, njam patam.  

Harei roya ilamo bhap bini “ Ilamo klau bhum” – ini lac labik pataom tame dom siam gheih ka palei ngak meng kan, nghe thuat  bhap bini Viet Nam daok peih ngak di Thảo Cầm Viên Sài Gòn – TP.HCM, mbiah tal harei 7/4, uan raok Harei Pachit da-a Po Hung ( harei 10 bilan 3 tui saka ia bulan) saong Pahadar 50 thun peih paha gah Meraong negar, yasa taneh ia. Abih di nyu nan lac, di labik roya tuai damuai  hu mbang dom pandap mbang biak ralo, kaya bingi ndung bak ilamo yaok bhum palei. Gam haong nan lac rilo pandap mbang  biak bingi mai meng Chau A daong tuai damuai hu rivang iek, jarah ma-in.

Mong 16tuk 45 minit biar harei kabroi, di khu pho Dãy Ốc, phường Vĩnh Hiệp, TP Rạch Giá, tỉnh Kiên Giang apui khuah mbang 6 baoh sang jaik taphia gauk di labik ar kraong. Kuhria khat abiah 800 trieu dong, metuah oh hu manuac njauk hagait. Urak ini, jabat chuc nang duah thau ngak brei cambaic laic ka bruk nan.

Tong thong My Donald Trump hu mbaoh harak hukum ka bruk taong jien je pandap blei tame negar 10% ngan haong dom gah pambuak bruk ngak mbang pablei salih saong jien je hu buh tabiak dahlau di 60 taneh ia. Dom taneh ia brei kak jien je dahlau lac Lien minh chau Au, Trung Quoc, Viet Nam, Campuchia, Nhat Ban, Han Quoc, An Do saong dom taneh ia karei. Klau taneh ia njuak kak jien je glong abih  lac Campuchia, Lào saong Madagascar.

Rayo papar binguk karja MRTV di Myanmar khan lac, anak meta bol lin di Myanmar brei padeih mesruh dalam mbang taong pacang dom gah cagar veik hu phao karong. Dalam tuk ba khaw tin melam, urang ba panuac khaw tin MRTV hu khan cambaic laic, bruk brei padeih patuh phao piah taneh ia ini piah ramik pasiam hadei bala taneh megei tayun.  Dahlau di nan, harei 1 bilan 4, Liên minh Ba Anh Em jeng hu khan brei padeih patuh phao eng piah ngak bruk pahala daong dunya hadei bala taneh megei tayun.

Hu tal 3.028 urang di dunya hu angan tame Sarak urang kaya meda di dunya dalam thun ini di Forbes, rilo jang 247 urang dut saong thun dahlau. Ini lac mbang akaok meti urang kaya meda hu tal labaih 3.000 urang. Kuhria abih tih drap ar di urang nan glong abih 16.100 tỷ USD, tagok 2.000 ti USD dut saong thun dahlau saong rilo jang GDP di dom taneh ia di dunya, langiu taneh ia Mỹ saong Trung Quoc. Urang kaya meda abih di dunya ini lac Elon Musk, drap ar  kuhria hu 342 ti USD./.