Danak dak papar binguk  ngan haong kadha “Kadha ariya sron mbon” brei hu peih ngak dalam malam ini 5/4, pambuak 3 tinh ban, dalam nan hu Ha Noi, Dak Lak, Ban raya Ho Chi Minh. Ini lac sa dalam dom danak dak ndom biai ka chinh tri, rahra, adaoh tamia ka gauk iek hu akaok meti peih ngak pamaong tal harei pahadar 50 thun Harei peih paha gah Meraong negar, yasa taneh ia. Danak dak brei mboh jalan dui ba njauk lagaih di Ndang Cong san Viet Nam saong chu tich Ho Chi Minh, bruk patagok naih gheih di nghe thuat bol lin Viet Nam.

Bol lin saong bhap bini uan raok Tet Chol Chnam Thmay 2025 meda peih tabiak di xã Thới Xuân, huyện Cờ Đỏ, ban Cần Thơ ngan haong kadha “Bol lin - Bhap bini Cần Thơ uan raok  Chol Chnam Thmay 2025”. Dalam dom harei tet  meda hu rilo bruk ngak hu makna biak gheih yau ye: alain hadiah pandap ka baoh sang urang Khmer sang kathaot; alin paok jien bac ka anek saih yam tapa kan kandah; dut iek ruak, brei jru oh mek jien, alin pandap ka bhap bini; peih bruk padhih the thao, kadha ma-in bhap bini; pakacah ngak dom janih ahar  bhap bini; pakacah ghe ngo.

Di huyen Trà Ôn, tinh Vinh Long daok rah tabiak Danak dak “Tet Bol lin - Rahra” saong Harei raya Ilamo - Pahat padhih urang bangsa Khmer. Bingun ini huyen brei jhul khang bruk pathau khan ka sarak bangsa, agama di Ndang, Karja drei dalam bruk rah tabiak bahrau; ngak dom danak dak dalam grauk rahra pacang khik an ninh Negar; mbang jak ba padang baoh sang “5 oh, 3 hacih sa-at”; Hukum ngak bol lin, quyen ngak po tapen negar, tasik kaoh pulao pagam haong mbang jak ba”Grauk rahra gul pataom padang palei pala bahrau, ndo thi ilamo, bahrau”.

Kong an tinh Binh Thuan birau jak ba urang jakar tabiak ngal bruk tabung glong duah mek kol duis, khik brei salamat, pakacah gauk ngak hu siam bruk piah pahadar 50 thun Harei peih paha gah Meraong negar, yasa taneh ia. Dalam tukvak  nan  gah kong an  dalam tinh brei pakhang bruk pambuak  dom don vi piah peih ngak sumu gauk dom bruk, jhul pakhang bruk nao pasang iek khik brei salamat piah sumu duah mboh pacang cakak, langyah sumu dom bruk ngak jhak tal raidiuk bhap bini meng labik drei ngak bruk, oh caik rah tabiak bruk drei oh thau dahlau.

Danak dak ribaong Xuyên Tâm, di Ban raya Ho Chi Minh hu abih tih phun jien buh tabiak labaih 17.000 ty dong, dalam nan hu pasiam taong abih jalan ribaong atah labaih 6,6km saong 3 jalan dhan ribaong atah labaih 2,2km, ngak dalam tukvak 2023-2028. Taong abih taneh njauk mek lac labaih 197 ribau m2, ngak kan kandah tal labaih 2.200 baoh sang rahra. Bruk srap gap peih ngak danak dak pasiam alam langik, padang jalan mbak, gom hadah, sang bac, balai di jalan meng ribaong Nhiêu Lộc - Thị Nghè tal kraong Vàm Thuật daok hu ngak catang, khik kajap hu peih ngak dahlau harei 30/4 anak tal.

Malaysia brei padeih duah birau ini sa sruh kapal ahaok MH370 kayua langik tasik oh hu lagaih. Meng blaoh, Rajaei Malaysia hu mbaoh harak bruk duah kapal haok MH370 haong sa kong ti duah ala ia hu jabat ngak bruk di Anh saong Mỹ. Tui harak pambuak bruk, rajaei brei bayar jien meyah duah mboh dom pandap klaik di kapal haok, jien duah mboh lac 70 trieu  USD. Harei 8/3/2014, kapal ahaok Boeing 777 hu laik so MH370 pajeng 239 urang lahik oh mboh di radar tuk par meng Malaysia tal Trung Quoc.

Ribuk hangin saong langik oh lagaih praong hu yuk thac tame bhum Kreh Pei negar saong bhum Kreh Meraong negar Mỹ meng harei 2/4 (mon negar ini), ngak khut tayah dom sang glaong, veik pableik radaih saong yuk jaleih phun kayau…Labaih 23 trieu urang My hu mboh dom mbang angin gaving khang. Dom urang kuhria lac langik oh lagaih meda dui atah dalam rilo harei anak tal, pagam tui sa mbang ia sua theik biak praong meda hu rah tabiak dalam rilo harei anak tal. Pasak Kuhria Rabuk di Jabat Kuhria Langik tasik Negar Hoa Ky hu ba tabiak tanut kan kandah glaong 5/5 ngan haong langik.

Ban Birmingham lac do thi praong ka dua di Negar Anh daok gaok rilo kan kandah kayua hareik nerak labaih 17.000 tan hareik oh ka hu ramik hacih kayua urang ngak gah ramik hareik ndok padeih bruk dui atah. Anak bruk nan Birmingham brei pah manuac tame ngak  piah daong ramik hareik. Karja ban ini brei thau ka bruk “kan kandah trak”, tui nan iew brei samar hu jalan langyah piah padeih bruk trun jalan padeih ngak bruk, pasiam veik bruk ramik hacih hareik alam moi truong piah khik siam prein yawa ka bhap bini./.