Piah samar buh jien tame ngak jalan peih drak samar meng Ban Cà Mau tal Bhum taneh akaok meraong negar Đất Mũi, Rajaei njauk hatai jao bruk ini ka Mentri Quoc phong buh jien tame ngak jalan peih drah samar njauk tui hukum karja. Jalan nan hu ngak salah blaoh pambuak jalan peih drah samar Bac Nam gah Pur tal Đất Mũi saong pabah tasik Hòn Khoai di tỉnh Cà Mau, daong jhul khang bruk patagok kinh te - xa hoi saong khik kajap quoc phong, an ninh di bhum taneran kraong Cuu Long saong dalam negar. Tui kuhria mboh dahlau bruk peih taneh, brei padang ngak dahlau harei 2 bilan 9 thun ini.

Di Gilang khik piah drap ar Chien dich Ho Chi Minh daok peih bruk parang iek ngan haong kadha “ 50 thun danei miat miat kadha hung ca”. Parang iek hu jaik 500 blah thaok bingu, pandap panda sajarah hu makna biak praong ka bruk Chien dich Ho Chi Minh sajarah dakarai. Đại tá Nguyễn Như Trúc, Pho Akok Chinh tri Quan khu 7, Akok mban peih bruk sahaneng lac: Parang iek lac bruk ngak hu makna dalam dom bruk salam uan 50 thun yasa taneh ia, patao padar bruk ngak cach mang, hatai ranam taneh ia ka bhap bini, abih di nyu nan lac dom rairah dam dara, rik tame dak padang taneh ia  kaya meda saong khik caga  khang kajap palei negar.

Hu mbaok di var padang blaoh baoh sang birau ka urang kathaot saong alin 2 baoh sang ka urang ngak bruk daong cach mang lac bangsa Khmer di tinh Trà Vinh. Akok Mentri Bangsa saong  Agama Đào Ngọc Dung taong yaom lac Tra Vinh  kham merat biak ralo dalam bruk ngak brei abih baoh sang oh daok taik tahak ka urang kathaot. Tui nan, caong khin hu sang daok birau tani tanat blaoh, mikva urang Khmer sahanang hatai “padaok raidiuk, kuhria ngak mbang”, kham merat ngak bruk, pala drak raong glang patagok raidiuk, paih dak harei dak hu salih birau.

Ngan haong kadha “ Dam dara Dak Lak hadah mbaok meta, khang hatai jia tui Ndang”, dalam Bilan Dam dara thun ini, dom pakat ndoan di tinh Dak Lak hu padang jaik 300 kapol urang halan hatian, padang ngak 268 danak dak, bruk di dam dara; peih ngak yaok rituh bruk halain hatian daong bruk padang ngak palei pala birau saong do thi ilamo, khik alam moi truong, caga lagaih haong bruk langik salih karei. Labik ngak hu siam dalam dom bruk ngak di dam dara Dak Lak lac dom pakat ndoan dalam tinh rik tame hu labaih 1ti 300 trieu dong saong jaik 1.400 harei  ngak bruk  piah padang  birau hu 32 baoh sang dang dam dara sang kathaot, yam tapa kan kandah bac megru naih joi.

Ban raya HCM saong dom tinh Nam Bo langik pandiak di ralo labik dalam dom hadei anak tal dahlau hu hajan karei bilan veik. Dalam harei ini 9/4, langik pandiak di ralo labik daok rah tabiak, pandiak glong tal 37 do C di Dong Nai, Binh Phuoc, Bình Dương, Tây Ninh. Di dom tinh gah Pei negar, langik pandiak meng 35 tal 36 do C. Langik pandiak gam thu lagu, tathak hu meng 40 tal 45%. Yau nan ye, mbuan ba tal patuh, apui khuah di dom labik bhap bini daok biak glong, langiu doi nan njauk brei pacang caga apui khuah glai.

My kuhria mek jien je pabak veik 50% ngan haong pandap Trung Quoc saong jien je nan hu ngak tui meng harei 9/4 (tui tukvak di My). Dahlau di nan Tong thong My Donald Trump hu ndem yau nan, meyah taneh ia ini oh kadun veik jien je cagar veik pandap di Mỹ 34%. Yau nan, hu 20% jien je yau urak ini saong 34% jien je piah pabak sumu lac ndoi ung  dahlau di nan, Trung Quoc brei kak jien je abih tih 104% jien je ndap nda tame meng negar Mỹ.

Takik di nyu 44 urang metai saong labaih 150 urang njauk rambuac kayua glut jaleih tabung sang kalup kapol melam pak Cộng hòa Dominican Republic tuk subuh page harei 8/4 ( tui mon pak ini). Urak ini oh ka thau cambaic laic bala nan meng halei mai saong bruk duah saong daong urang gaok bala daok hu ngak sami samar. Labaih 400 urang ngak bruk duah daong hu mbaok di labik ini.

Dah page harei kabroi 8/4, ceik pui Kanlaon di bhum kreih negar Philippines pruh gilac veik, bau dhun mur pambuk tagok glong tal 4.000 met. Jabat karja bhum palei  daok tui iek tani tanat bau dhur mur ngak jhal tal dom labik daok di bhap bini saong khan lac brei kareih abih dom labik ngak bruk, sang bac. Dahlau di nan, bilan 9 thun 2024, yaok rituh bhap bini daok jaik Kanlaon brei panduan ba nao labik karei  hadei  ceik pui pruh tabiak yaok ribau tan khi jru mek dalam sa harei./.