Po negar hu mbaoh harak taka so 689 ka bruk alin pandap ka urang hu ngak bruk cach mang bingun Pahadar 50 thun Harei Peih paha gah meraong negar, yasa taneh ia (30/4/1975-30/4/2025) saong 80 thun Harei padang Negar Cộng hòa xã hội chủ nghĩa Việt Nam (2/9/1945-02/9/2025). Tui harak di Po negar, pandap alin meng jien 500 ribau dong ka urang ngak cach mang dahlau harei 1/1/1945 tal Cach mang Bilan 8 thun 1945; Amaik VNAH; anh hung bol lin  bhap bini, anh hung urang ngak bruk dalam jaman mesruh metak; urang jaoh jo, urang hu mbang tui sarak yau thuong binh, thuong binh janih B, benh binh daok hu mbang tui sarak daong di karja yaok bilan. Dom urang hu ngak bruk karei jeng hu taduan jien 500 ribau dong.

Dalam tinh Cà Mau urak ini hu labaih 1.300 baoh sang, pataom tame ralo di huyen Thới Bình saong huyện U Minh kurang ia pandar dalam bilan pandiak. Piah langyah catang bruk kurang ia ka bhap bini, tinh Ca Mau hu buh jien tame labaih 15 ti dong piah padang ngak pasiam, peih praong jalan  brong ba ia do dom balai pabak ia ka 860 baoh sang daok di dom xa Khánh Lâm, Nguyễn Phích, Khánh An, Khánh Thuận (huyện U Minh). Ngan haong dom baoh sang daok atah gauk, tinh buh jien tame jaik 6,8 ti dong piah padang ngak kuang ia thauk tamra padang ia hanjan ka 377 baoh sang bhap bini hu caga ia piah ka dom bilan pandiak.

Dalam mbang nao ngak bruk di huyen đảo Phú Quý, tỉnh Bình Thuận kapol urang di Bộ Tư lệnh Vùng Cảnh sát tasik 3 nao pasang iek, duah thau  bruk an ninh chinh tri, salamat xa hoi di dom bhum tasik, tapen kaoh pulao. Dom urang jakar hu alin brei  10 paok pandap di pandap mbang, ao ndong saong hala dok negar ka dom baoh sang urang nao ngak mbang di tasik jaik kaoh pulao. Dom paok pandap nan yaom lac sit min pachreih hatai kham merat di mikva sahanang ngak mbang, khik iek tasik di palei negar.

Huyen Krông Búk, tỉnh Đắk Lắk harei kabroi  hu khan ba tabiak angan kapol "Sầu riêng Krông Búk", kayua Cuc So huu tri tua di Mentri Ilamo saong Kong nghe jao brei. Ini lac bhum palei ka 4 di tinh Đắk Lắk brei angan tui kapol ka baoh durian, hu pandar dalam 10 thun. Ini lac hukum karja piah huyen patui patagok angan je saong paglong kaya baoh durian di bhum palei. Huyen Krông Búk urak ini hu labaih 4.500 ha durian, dalam nan, hu labaih 2.700 ha brei paik baoh, kuhria labaih 44.000 tấn sa thun.

Melam kabroi 23/4, Kapol urang kumei tinh Hậu Giang peih bruk Danak dak daoh tamia pambuak bruk parang iek ngui cuh ao dhai, ao bà ba saong tamia tui kapol nyaom salam uan  pahadar 50 thun Harei Peih paha gah Meraong, yasa taneh ia; 135 thun Harei menek di Chủ tịch Hồ Chí Minh. Labaih 700 adei sa-ai kumei, urang jakar, urang bol lin, dom adei anek saih hu mbaok tame. Bingun ini, Kapol urang kumei tinh Hậu Giang hu jao brei 10 paok jien bac ka anek saih, 20 paok pandap ka urang kumei hu raidiuk kan kandah saong 5 radaih ahar bánh mì daong ka adei sa-ai kumei tani tanat raidiuk.

Karja Tong thong Hàn Quốc Han Duck-soo khan lac anak tal bruk ngak di rajaei lac ba taneh ini jeng sa dalam dom taneh ia dang akaok ka bruk kong nghe tri tue nhan tao AI. Rajaei Hàn Quốc buh jien tame 1.800 tỷ won (1,3 tỷ đôla Mỹ) ka gah AI, peih praong bruk AI kuhria  mboh dahlau, patagok bruk pandar AI dalam negar saong raong dom kong ti ngak AI. 

Chile hu jeng taneh ia ndik tapui takik abih di bhum My Latinh saong dalam nyaom dom taneh ia takik urang ndih tapui anek di dunya. Bruk ni ngak kan kandah tal rilo gah dalam raidiuk xa hoi di negar ini. Tui Vien yaok kuhria negar Chile, urang Chile ndih tapui  trun daok 1,1 uranaih, biar jang ralo dut saong tanut salih 2,1 piah khik hu ginup bhap bini.

Gah bol lin pacang matuy di tinh Bokeo, gah Barak negar Lào birau duah mboh saong chap mek ka baih 20 trieu asar matuy tong hop. Tui khaw tin meng jabat chuc nang, tuk gah bol lin pacang caga matuy ngak bruk di balai pasang iek di huyen Ton Pheung duah mboh sa sruh radaih tai medil lac hu pajeng pandap. Tapa duah thau, bol lin duah mboh labaih 20 trieu asar matuy tong hop, trak labaih 2.020 kilo hu padauk dalam radaih nan./.