UB Bhap bini Ban raya Ho Chi Minh ba tabiak pathau khan ka bruk mek panuac ndom meyai di urang cu tri ka bruk ramik radak tinh Binh Duong, tinh Ba Ria – Vung Tau saong Ban raya Ho Chi Minh ngan haong kuhria rah tapa di 3 bhum palei mek hu 93,4% urang cu tri njauk hatai ka bruk pagam jeng sa. Ban raya Ho Chi Minh hadei tuk pagam jeng sa haong tinh Binh Duong saong ba Ria – Vung Tau ye brei hu mek angan Ban raya Ho Chi Minh hu taneh praong labaih 6.700 km², rahra dalam ban hu labaih 13,7 trieu urang, 168 jabat karja pakat xa, dalam nan hu 113 phuong, 54 xa saong sa dac khu.

Dom gah chuyen mon tinh Soc Trang saong UB bhap bini ban sit Vĩnh Châu peih bruk ndem biai nao mai haong dom baoh sang bhap bini gaok tavak tame dom danak dak dien hangin di xã Hòa Đông, Vĩnh Hải saong Lạc Hòa. Di var ndem biai nao mai haong dom baoh sang nan bhap bini caong khin brei bayar jien khat lahik ka bruk pala raong glang kaya dalam ia thun 2019 mbiah tal ini; daong jien lahik bruk ngak ka urang; bayar jien, daong jien taneh, jien panduan ba drap ar kaya kan, sang danaok dalam labik atah 300 m kuhria meng labik padang ngak ndien hangin; njauk bayar veik abih taneh…

Angan “Brah Viet Nam - tathuak nerak biar” lac bruk jak jeng meng “Danak dak patagok 1 trieu ha pala padai, asar siam, tathuak nerak biar pagam haong cakrok hijao di Bhum taneran kraong Cuu Long tal thun 2030”. Tui Mentri Ngak nong saong Patagok, bruk padang angan “Brah Viet Nam – tathuak nerak biar” oh tok padeih di jalan ngak bruk pablei salih bo daok lac sa takai yam hu jalan kuhria tani tanat pamaong tal bruk patagok yaom kaom brah Viet Nam, ngak ka gah ngak nong hijao saong patagok karo kajap.

Hoi dong Bhap bini tinh Binh Thuan brei tapa sarak peih bruk ramik pagam tinh Lâm Đồng, tinh Binh Thuan saong tinh Dak Nong. Tui nan, padang tinh Lam Dong, tui nan pagam 3 tinh tame: Lâm Đồng, Bình Thuận saong Đắk Nông. Tui kuhria tinh Lam Dong ( birau) hu 124 jabat karja pakat xa. Labik padang Pasak hanh chinh- chinh tri di tinh Lam Dong urak ini. Bruk pagam 3 tinh tame piah ramik pataom takik veik jabat karja gam ngak bruk hu lagaih,  hu siam sami samar, rik tame patagok kinh te - xa hoi di taneh ia lagaih haong bruk yau urak ini.

Hoi dong Bhap bini tinh Ninh Thuan bahrau brei tapa sarak salih labaih 14 ha glai di xa Vĩnh Hải, huyen Ninh Hải ka dua danak dak ngak labik padeih padei glaong pakat Vĩnh Hy saong Bein Karang. Tui pathau khan meng bruk pasang iek, dua danak dak jeng daok dalam labik yitvu hanh chinh di bein pakat Negar Núi Chúa, daok dalam Labik khik piah sinh quyen dunya. Kayua nan, brei sangka iek praong bruk pacang cakak njom mbak nerak alam langik saong ngak kanjah jhak tal he sinh thai bhum taneh hu makna dalam bruk padang saong ngak.

Rajaei Thai Lan khan lac, meda duah thau cambaic laic ka labaih 250.000 laik phone tangin hu tut ngan urang negar langiu dahlau ba tabiak bruk brei cakak jitvu pandar dom laik phone tangin nan atau ha-oh di bilan 6 anak tal. Ini lac sa dalam dom bruk piah pacang cakak kol pandar kong nghe pachot meblah drap ar suan hukum di taneh ia ini.

Trung Quốc bahrau ba tabiak tasik sa kapal gilai nduac di angaok tasik oh hu urang pandar meda hu luai samar drah dalam ia hu angan “Ikan ong hijao”. Hu ngak tabiak meda nduac hu di angaok mbaok ia saong dalam ia, “Ikan ong hijau” biak hu takre haong bruk nduac samar di angaok mbaok ia tagok tal 36 hai ly sa mon. Abih di nyu nan lac, Gilai meda hu luai dalam ia piah plaih dom bruk langik tasik oh lagaih yau ye rabuk praong saong khik tani tanat bruk luai dalam ia dalam tukvak labaih 1 bilan.

Roh duah birau meng  Đại học Michigan mboh lac, atah di  ini 41.000 thun, Baoh taneh rah tabiak bruk oh ka bhian mboh: Cuc Barak salih lih tapa chau Au, ngak cadu trun bruk pacang buc xa di langik. Muk kei di manuac sia diuk tapa hu thun bilan biak kan kandah nan mai meng thau roh duah hu bruk praong: kem luk pacang pandiak, thau jhik khan ao saong thau tame la-on ceik patau daok kandauk. Bruk roh duah nan oh lac piah hu thau ka meng kan dahlau bo daok hu makna ka harei ini saong anak tal, meyah hu bruk yau nan rah tabiak di dunya harei ini, bala biak trak: ve tinh truyen thong angaok langik dang padeih, vien thong angaok baoh taneh gaok kan kandah biak trak./.